28 Jan 2017, 11:35
ރަށްދެބައިމަގާއި ނީލޯފަރުމަގާ ގުޅުނު، އިރުދެކުނު ކަންމަތީގައި ހުންނަ ބިހުރޯޒު މިސްކިތުގެ ގޯތިތެރޭގައި ހައްދާފައިވާ ބޮޑު ހިތި ގަހެއް ވެއްޓިއްޖެއެވެ.
މިއަދު ހެނދުނު އެގަސް މިސްކިތުގެ ގޯތި ތެރެއަށް ވެއްޓުނުއިރު އެ މިސްކިތަށް އަދި މީހަކަށްވެސް ގެއްލުމެއް ނުވެއެވެ.
މިއީ މާލެ ސަރަހައްދަށް ވިއްސާރަ ދުވަހެކެވެ. މެޓް އޮފީހުން މޫސުން ލަފާ ކުރާގޮތުގައި މާދަމާ ހެނދުނު 10 ޖަހަންދެން ހުޅަގުއުތުރާއި އުތުރުން ގަޑިއަކު 7 މޭލާއި 17 މޭލާ ދެމެދުގެ ބާރުމިނުގައި ވައިޖެހޭނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ބާރުވުންއެކަށީގެންވެއެވެ.
ބިހުރޯޒު ކަމަނާ މިސްކިތުގެ ގޯތިތެރޭގައި ހުރި ބޮޑު ގަހެއް ވެއްޓިއްފައި-- ސަން ފޮޓޯ: އަޙްމަދު މުޖްތަބާ
ބިހުރޯޒް ކަމަނާ މިސްކިތަކީ ވަރަށް ޒަމާންވީ މިސްކިތެކެވެ. މާލޭގައި ހުރި އެންމެ ޒަމާންވީ މިސްކިތްތަކުގެ ތެރޭގައި އެކުޑަ ކުޑަ މިސްކިތް ހިމެނެއެވެ.
އައްސުލްޠާނުލްޣާޒީ މުޙައްމަދު ތަކުރުފާނުލް އަޢުޒަމް (އުތީމު އަލްޣާޒީ މުޙައްމަދު ބޮޑުތަކުރުފާނު) އާއި އެ ރަދުންގެ ކޮއްކޯފުޅު، އަލްޣާޒީ ޙަސަން ރަންނަބަނޑޭރި ކިލެގެފާނާއި މި ދެ ބޭފުޅުންގެ މަހާނަފުޅު ހުރި ޒިޔާރަތެއް ހުންނަ މި މިސްކިތް ބިނާކުރައްވައިފައިވަނީ ބިހުރޯޒު ފާށަނާކަލޯ އެވެ.
ބިހުރޯޒު ކަމަނާ މިސްކިތުގެ ގޯތިތެރޭގައި ހުރި ބޮޑު ގަހެއް ވެއްޓިއްފައި-- ސަން ފޮޓޯ: އަޙްމަދު މުޖްތަބާ
މި މިސްކިތާ ބެހޭ އެންމެ މުސްކުޅި ލިޔުމުން ދައްކާގޮތުގައި، 993ހ. (1585މ.) ގައި އައްސުލްޠާނުލްޣާޒީ މުޙައްމަދު ބޮޑުތަކުރުފާނު ސިރީސަވާދީއްތަ މަހާރަދުން އަވަހާރަވެ ފަސްދާނުލެވުނުއިރު މި މިސްކިތް ހުރެއެވެ. އަދި އެއިރު އެ މިސްކިތަށް ބިހުރޯޒު ފާށަނާކަލޯ މިސްކިތް މި ނަން ކިޔައި އުޅުނުކަން ވެސް އެނގެއެވެ.
----------------------------------------
*--ނޯޓް:މިސްކިތުގެ ތާރީޚާ ގުޅޭ މައުލޫމާތުނަގާފައި ވަނީ، ޑިޕާޓްމަންޓް އޮފް ހެރިޓޭޖްގެ ވެބްސައިޓުން.