26 Jan 2017, 11:48
ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމްގެ ހާއްސަ މަންދޫބެއްގެ ގޮތުގައި އދ. އަތޮޅުގެ ރަށްތަކަށް އެންވަޔަރަންމަންޓް މިނިސްޓަރު ޠާރިގު އިބްރާހީމް ދަތުރުފުޅެއް ފައްޓަވައިފި އެވެ.
މިނިސްޓަރުގެ އެ ދަތުރުގައި އދ. އަތޮޅުގައި މީހުން ދިރިއުޅޭ ހުރިހާ ރަށަކަށް ޒިޔާރަތް ކުރުމަށް ހަމަޖެހިފައިވާ އިރު، ޒިޔާރަތްކުރާ ރަށްރަށުގެ ކައުންސިލާއި މުއައްސަސާތަކުގެ ބޭފުޅުންނާ ބައްދަލުކުރައްވައި ކުރިމަތިވެފައިވާ ގޮންޖެހުންތައް އޮޅުންފިލުވުމަށް ހަމަޖެހިފައިވާ ކަމަށް އެންވަރަމަންޓް މިނިސްޓްރީން ބުންޏެވެ.
ރައްޔިތުންގެ ހާލު ބައްލަވައި، މުއައްސަސާތައް ހިނގާ ގޮތް އޮޅުން ފިލުވުމަށް ރައީސް ޔާމީންގެ އިރުޝާދުގެ ދަށުން ކުރައްވާ އެ ދަތުރުފުޅުގައި މިނިސްޓަރު ޠާރިގު މިހާރު ހުންނެވީ ހަންޏާމީދޫގަ އެވެ.
އެންވަޔަރަންމަންޓު މިނިސްޓްރީން ބުނީ ހަންޏާމީދޫގެ އިތުރުން އެ އަތޮޅުގެ އިތުރު ދެ ރަށަކަށް މިނިސްޓަރު މިއަދު ވަޑައިގަތުމަށް ހަމަޖެހިފައިވާ ކަމަށެވެ.