25 Jan 2017, 13:08
ޏ. ފުވައްމުލަކަށް މަސްތުވާތަކެތި ގެންދިޔަ މީހަކު އުމުރަށް ޖަލަށްލުމާއެކު 100،000 ރުފިޔާ އިން ޖޫރިމަނާކޮށްފި އެވެ.
މއ. ކްލޯވާ، މުހައްމަދު މަނިކުގެ މައްޗަށް އެ ހުކުމް ކުރީ މިދިޔަ އަހަރުގެ ޖެނުއަރީ 25 ވަނަ ދުވަހު އިބްރާހީމް ނާސިރު އިންޓަނޭޝަނަލް އެއާޕޯޓުން މޯލްޑިވިއަންގެ ފްލައިޓެއްގައި ޏ. ފުވައްމުލަކަށް މަސްތުވާތަކެތި ގެންދިޔަ މައްސަލައާ ގުޅިގެންނެވެ.
ކްރިމިނަލް ކޯޓުން އިއްޔެ ކުރި ހުކުމްގައި ބުނެފައި ވަނީ ފުވައްމުލަކު އެއާޕޯޓްގެ އެރައިވަލް ޓާމިނަލްގެ ގޮނޑިބަރީގައި އިންދައި ހައްޔަރުކޮށް އޭނާގެ ހަށިގަނޑު ބަލައި ފާސްކުރަމުން ދަނިކޮށް އޭނާގެ ބޮކްސާގެ ދަށުން ވެއްޓުނު ޖޫސްޕެޓީ ކޮތަޅެއްގައި މަސްތުވާތަކެތި ހުރި ކަމަށެވެ.
ޝަރީއަތުގެ މަޖިލީހުގައި އޭނާ ދައުވާ އަށް އިއުތިރާފުވެފައިވާ ކަމަށް ވެސް އެ ހުކުމްގައި ވެއެވެ.
އޭނާގެ އަތުން ފެނުނު މަސްތުވާތަކެތީގެ ބަރުދަނުގައި 3239.74 ގްރަމް ޑައިމޯފިން (ހެރޮއިން) ހުރި ކަމަށް އެތަކެތީގެ ތަހުލީލު ރިޕޯޓުން ދައްކާ ކަމަށް ވެސް އެ ހުކުމްގައި ވެއެވެ.
ޖޫރިމަނާގެ ފައިސާ އެއް މަސް ދުވަހުގެ ތެރޭގަައި ކްރިމިނަލް ކޯޓަށް ދައްކައި ޚަލާސްކުރުމަށް ވެސް އެ ހުކުމްގައި އޭނާ އަށް ވަނީ އަންގައިފައެވެ.