25 Jan 2017, 10:14
ދިހަ ކިލޯ މީޓަރުގެ ގައުމީ ރެކޯޑް 18 އަހަރަށް ފަހު އުންމީދީ ދުވުންތެރިޔާ ޒައިދު ޝަރީފް މުގުރާލައިފި އެވެ.
އެ ރިކޯޑް މީގެ ކުރިން އޮންނަނީ ނަސީރު އިސްމާއިލް އަތުގަ އެވެ. 1999 ވަނަ އަހަރު އޮތް މާލޭ މެރަތަންގައި ނަސީރު ދިހަ ކިލޯ މީޓަރުގެ ރިކޯޑް ގާއިމް ކުރީ 35:05 ސިކުންތުން ރޭސް ނިންމައިގެންނެވެ.
މިހާރުގެ ކޯޗު ނަސީރު އިސްމާއިލްގެ 18 އަހަރުވީ ރިކޯޑް ޒައިދު މުގުރާލީ މިދިޔަ ހުކުރު ދުވަހު ޔޫނަައިޓެޑް އަރަބި އެމަރޭޓްސްގެ ވެރިރަށް ދުބާއީގައި އޮތް ދުބާއީ މެރަތަންގައި ވާދަކޮށް 34:40 ސިކުންތުން ރޭސްް ނިންމައިގެންނެވެ. ޒައިދު އެ ރޭސް ނިންމައި ރިކޯޑް ގާއިމް މިކުރީ ނަސީރަށް ވުރެން 0.65 ސިކުންތު ކުރިން ރޭސް ނިންމައިގެންނެވެ.
ޒައިދު(ކ) އޭނާގެ ކޯޗު އަބްދުﷲ އިބްރާހިމް(މ) އާއި އެކު ---
މޯލްޑިވްސް ޕޮލިސް ސާވިސްގައި ލާންސް ކޯޕްރަލްއެއްގެ މަގާމު އަދާކުރަމުންދާ އުމުރުން 24 އަހަރުގެ ޒައިދު ދުވުމުގެ ތެރެއަށް ވަނީ މިދިޔަ އަހަރުއެވެ. އޭނާ ފުރަތަމަ ބައިވެރިވި ރެޑްބުލް ކެޗްދަފެރީ ރޭހުން ދެ ވަނަ އަދި ދިރާގު ރޯޑްރޭހުގެ 10 ކިލޯމީޓަރު ދުވުމުން ވަނީ އެއް ވަނަ މަގާމު ހޯދާފަ އެވެ.
ޒައިދު ވަނީ މިދިޔަ އަހަރުގެ 10،000 މީޓަރު ދުވުމުން އެއް ވަނަ ހޯދައި 5000 މީޓަރު ދުވުމުން ދެ ވަނަ ހޯދި އެވެ. މިއީ ކުޑަ ދުވަސްކޮޅެއްގެ ތެރޭގައި ދުވުމުގެ ތެރެއަށް އަލަށް ވެދެ ރާއްޖޭގެ އެތުލީޓަކު ހޯދި މިފަދަ އެންމެ ބޮޑު އެއް ކާމިޔާބީކަން ވެސް ފާހަގަކޮށްލެވެ އެވެ. އަދި އޭނާއަކީ އެތުލެޓިކަސްގައި ރަނގަޅުު މުސްތަގްބަލެއް އޮތް ދުވުނެތެރިއެއް ކަމަށް ތަޖުރިބާކާރު ގިނަ ކޯޗުން އަންނަނީ ފާހަގަކުރަމުންނެވެ.