16 Jan 2017, 18:46
މުދަލާއި ހިދުމަތުން ނަގަމުން އަންނަ ޓެކްސް ކަމަށްވާ ޖީއެސްޓީ ނުދައްކާ 109 ފަރާތެއްގެނަންމޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން އާންމުކޮށްފިއެވެ.
ޖީއެސްޓީއަށް ރަޖިސްޓަރީކޮށްފައިވާ ފަރާތްތަކުގެ މިދިޔަ އަހަރުގެ ތިންވަނަ ކުއާޓާގައި ބަޔާން ހުށަނާޅާ އަދި ޖީއެސްޓީ ނުދައްކާ ފަރާތްތަކުގެ ތެރޭގައި ޓޫރިޒަމް ދާއިރާގައި ވިޔަފާރިކުރާ ހަތް ފަރާތަކާއި އެ ނޫން ދާއިރާތަކުގައި ވިޔަފާރިކުރާ 102 ފަރާތެއް ހިމެނެއެވެ.
މިހާތަނަށް އާންމުކޮށްފައިވާ ލިސްޓްގައި ހިމެނެނީ މާލެ ސަރަހައްދުގައި ވިޔަފާރި ކުރާ ފަރާތްތަކެވެ.
މީރާއިން ބުނީ އެފަރާތްތަކުގެ މައުލޫމާތު ހާމަކުރުމުގެ ކުރިން އެ ފަރާތްތަކަށް އެކި ފަހަރު މަތިން ފޯނުން ގުޅައި، ޓެކްސް ނުދައްކާ ފަރާތްތަކަށް ޤާނޫނުގައި ކަނޑައަޅައިފައިވާ އަދަބުތައް ކިޔައިދެވިފައިވާނެ ކަމަށެވެ. ހަމައެހެންމެ އެސްއެމްއެސްގެ ޒަރީއާއިންނާއި އެ ތަންތަނަށް ގޮސް އެ ފަރާތްތަކަށް އެ ކަން އެންގުމުގެ މަސައްކަތްކޮށްފައި ވާނެ ކަމަށް މީރާއިން މައުލޫމާތު ދެއެވެ.