15 Jan 2017, 23:54
ލޯކަލް ކައުންސިލް އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ ލިސްޓު އާންމުކޮށް، އެ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލައިފި އެވެ.
އިލެކްޝަންސް ކޮމިޝަނުން ބުނި ގޮތުގައި ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައި ވަނީ މި މަހުގެ 23 ވަނަ ދުވަހުގެ ނިޔަލަށެވެ. ޝަކުވާ ހުށަހަޅާ ފޯމު އެ ކޮމިޝަނުގެ ވެބްސައިޓުންނާއި ރަށްރަށުގެ ކައުންސިލް އިދާރާތަކުން ލިބެން ހުންނާނެ ކަމަށް ކޮމިޝަނުން ބުނެފައިވެ އެވެ.
އެކޮމިޝަނުން ބުނީ ޝަކުވާ ބަލައިގަތުން ކުރިއަށްދާނީ ރަސްމީ ބަންދު ނޫން ކޮންމެ ދުވަހެއްގެ ހެނދުނު 08:00 އިން ފެށިގެން ހަވީރު 03:00 އާ ހަމައަށް ކަމަށެވެ. ރަސްމީ ބަންދު ދުވަސްތަކުގައި ޝަކުވާ ފޯމު ބަލައިގަތުން ކުރިއަށް ދާނީ ހެނދުނު 09:00 އިން ފެށިގެން ހަވީރު 03:00 އާ ހަމައަށެވެ. އަދި ހުކުރު ދުވަހު ޝަކުވާ ފޯމު ބަލައިގަތުން ކުރިއަށްދާނީ ހަވީރު 03:00 އިން ފެށިގެން ހަވީރު 05:00 އާ ހަމައަށް ކަމަށް ވެސް ކޮމިޝަނުން ބުންޏެވެ.
މާލެ ފިޔަވައި އެހެން ރަށަކުން ނަމަ އެރަށެއްގެ ކައުންސިލް މެދުވެރިކޮށް ފޯމު ލިބޭނެ އެވެ. ޝަކުވާ ފޯމު ހުށަހަޅަން ޖެހޭނީވެސް ކައުންސިލް އޮފީހަށެވެ.
ެއެކޮމިޝަނުން ބުނި ގޮތުގައި މާލެގައި ޝަކުވާ ފޯމު ބަލައިގަންނާނީ، ހަމައެކަނި ބާ ޖަމާލުއްދީނުގައި ގާއިމްކޮށްފައިހުރި އިންތިޚާބީ މަރުކަޒުން ކަމަށެވެ. އަދި އިލެކްޝަންސް ކޮމިޝަނުގެ އޮފީހުން ފޯމު ބަލައިނުގަންނާނެ ކަމަށްވެސް އެ ކޮމިޝަނުން ބުންޏެވެ.