15 Jan 2017, 13:04
އާ ސީޒަނަށް ތައްޔާރުމުގެ ގޮތުން ނިއު ރޭޑިއަންޓް ސްޕޯޓްސް ކްލަބްގެ ފަރިތަކުރުންތަށް މާދަމާ ފެށުމަށް ހަމަޖެހިފައިވާއިރު ކުޅުުންތެރިންނަށް ހިތްވަރު ދިނުމުގެ ގޮތުން ސަޕޯޓަރުން ވެސް ބައިވެރިވާން ތައްޔާރުވެއްޖެއެވެ.
ނިއުގެ ސަޕޯޓާސް ޔޫނިއަންގައި އިސްކޮށް ހަރަކާތްތެރިވާ ފަރާތަކުން 'ސަން ސްޕޯޓްސް' ޓީމަށް ބުނީ މާދަމާގެ ފަރިތަކުރުމަށް ޓީމް ހާޒިރުވާއިރު ސަޕޯޓަރުން ޓާފް ދަނޑަށް ޖަމާވެ ފަރިތަކުރުންތަށް ބަލާލައި ކުޅުންތެރިންނާ ބައްދަލުކޮށްލުމަށް ހަމަޖެހިފައިވާ ކަމަށެވެ.
"މާބޮޑު ހަރަކާތްތަކެއް މާދަމާއެއް ނޯއްނާނެ. ހަމަ އެކަނި ފަރިތަކުރުންތަށް ބަލާލައި ކުޅުންތެރިންނަށް ހިތްވަރު ދިނުމަށް މި ގޮސްލަނީ،" ނިއުގެ ސަޕޯޓަރެއް ބުންޏެވެ.
ރާއްޖޭގެ އެންމެ ގިނަ ސަޕޯޓަރުން އޮންން އެއް ކްލަބަކީ ނިއު އެވެ. އާ ސީޒަނަށް ނިއުގެ ސްކޮޑް ވަރުގަދަކޮށްފައިވާއިރު އެ ކްލަބްގެ ސަޕޯޓަރުން އަންނަނީ ސޯސަލް މީޑިއާގައި ގިނަ ހަރަކާތްތަކެއް ހިންގުމަށް ރާވައި ފަޑުވެފައިވާ އެޓީމްގެ ސަޕޯޓަރުން ހޯދައި އެއް ގްރޫޕެއްގެ ގޮތުގައި މަސަތްކަތްކުރުމަށް ފަށާފައެވެ.
"މިއީ ހަމަ އެކަނި ނިއުއަށް ސަޕޯޓްކުރުމަށް ހިންގޭ ހަރަކާތްތަކެއް ނޫން. މިއީ ވަޅުޖެހިފައިވާ ދިވެހި ފުޓްބޯޅައިގެ ފޯރި އިތުރުކުރުމަށް ހިންގޭ ހަރަކާތްތަކެއް،" ނިއުގެ ސަޕޯޓާސް ޔޫނިއަންގައި އިސްކޮށް ހަރަކާތްތެރިވާ ފަރާތެއް ބުންޏެވެ.
އާ ސީޒަނަށް ނިއު ވަރުގަދަ ކުރުމުގެ ގޮތުން ވަނީ ރާއްޖެ އާއި ރާއްޖޭން ބޭރުން ތަޖުރިބާކާރު ހުނަރުވެރި ކުޅުންތެރިންތަކެއް ގެނެސްފައެވެ. އެގޮތުން މިދިޔަ ސީޒަނުގައި މާޒިޔާގެ ގޯލު ބެލެހެއްޓި އިމްރާން މުހައްމަދު އާއި ޓީސީގެ ޑިފެންޑަރު އަހުމަދު އަބްދުﷲ (ލިލީ) އާއި އަލީ ފާސިރު (ސެންޓޭ) ވަނީ ނިއުުއަށް ގެނެސްފައެވެ.
ރާއްޖޭން ބޭރުން ގެނައި ކުޅުންތެރިންނަކީ ސްޕެއިން ފޯވާޑެއް ކަމަށްވާ އެޑްރިއަން ގަލާޑޯ ވަލްޑެސް އާއި ޖަޕާނުގެ މިޑްފީލްޑަރެއް ކަމަށްވާ ކެއިސޫކޭ އޮގާވާ އާއި ނެދަލެންޑްސްގެ މިޑްފީލްޑަރެއް ކަމަށްވާ ޖަމެލް ލީފްލޭންގް އިތުރުން ޗެލްސީގެ 18 އަހަރުން ދަށުގެ ޓީމުގެ ކެޕްޓަންކަންކޮށްފައިވާ ގާނާގެ ޑިފެންޑަރެއް ކަމަށްވާ ޑެނިއަލް ޕަޕޯ އެވެ.
މާދަމާ ހަވީރު 15:45 ގައި އެއްނަމްބަރު ޓާފް ދަނޑުގައި ފަށާ ފަރިތަކުރުންތަކުގައި ނިއުއާ އަލަށް ގުޅުނު ކުޅުންތެރިންގެ ތެރެއިން ބައެއް ކުޅުންތެރިން ބައިވެރިވާނެ ކަމަށް ނިއު އިން ބުނެއެވެ.
ނިއު ރޭޑިއަންޓުގެ ކޯޗަކަށް އާ ސީޒަނަށް ހަމަޖައްސާފައިވަނީ ޕޯޓޯ އާއި ބެންފީކާގައި މަސައްކަތްކޮށްފައިވާ ޕޯޗުގަލްގެ ބެނާޑޯ ޓަވަރެސްއެވެ. އޭނާ އާއި އެކު ފިޓްނަސް ކޯޗަކަށް ހަރަކާތްތެރިވާނީ ޕޯޗުގަލްގެ ޔަކީމް ވެލިންހޯއެވެ.