13 Jan 2017, 11:10
ނަޓެއްލާ އުފެއްދުމުގައި ބޭނުން ކުރާ ޕާމް އޮއިލް އިން ކެންސަރުޖެހުމުގެ ފުރުސަތު ބޮޑުވާ ކަމަށް ބުނާ ރިޕޯޓަކާ ގުޅިގެން ނަޓެއްލާ އުފައްދާ ކުންފުނި، ފެރާރޯ އިން ނަޓެއްލާ ދިފާއު ކުރުމަށް މީޑިއާ ކެމްޕެއިނެއް ފަށައިފި އެވެ.
ޔޫރަޕިއަން ފުޑް ސޭފްޓީ އޮތޯރިޓީ (އީއެފްއެސްއޭ) އިން މިދިޔަ އަހަރުގެ މެއި މަހު ނެރުނު ރިޕޯޓެއްގައިވާ ގޮތުން 200 ޑިގްރީ ސެލްޝިއަސްއަށް ވުރެ އިތުރަށް ޕާމް އޮއިލް ހޫނު ކުރުމުން އޭގައި ކެންސަރު ޖެހުމަށް މަގުފަހިވާ މާއްދާތައް ނުވަތަ ކާސިނޯޖެނިކްސް އިތުރުވެ އެވެ.
ނަމަވެސް އެރިޕޯޓުގައި ޕާމް އޮއިލް ބޭނުން ކުރުން ހުއްޓާލުމަށް އިއުތިމާޒު ކުރުމުގެ ބަދަލުގައި ބުނެފައި ވަނީ ޕާމް އޮއިލް އާއި ކެންސަރާ އޮތް ގުޅުން އިތުރަށް ދިސާރާ ކުރަން ޖެހޭ ކަމަށެވެ. ޕާމް އޮއިލް ބޭނުން ކުރުން ހުއްޓާލުމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ވެސް އިންޒާރެއް ދީފައި ނުވެ އެވެ.
އެ ރިޕޯޓުގެ ސަބަބުން ނަޓެއްލާ އުފައްދާ ގައުމު ކަމުގައިވާ އިޓަލީގެ އެންމެ ބޮޑު ސުޕަމާކެޓް ޗެއިން، ކޯއޮޕް އިން ވަނީ ޕާމް އޮއިލް ހިމެނޭ ގިނަ ބާވަތްތައް ވިއްކުން ހުއްޓާލާފަ އެވެ. އަދި ޕާމް އޮއިލަކީ ޕީނަޓް ބަޓާ އިން ފެށިގެން ނޫޑުލްސްއަށް، އަދި ސައިބޯނި ފަދަ ތަކެތީގައި ވެސް ބޭނުން ކުރާ އެއްޗެއް ނަމަވެސް ނަޓެއްލާއަކީ މުޅި ދުނިޔޭގައި ވެސް މަޝްހޫރު ބްރޭންޑެއް ކަމުން، ނަޓެއްލާއަށް ލިބުނު ސަމާލުކަން އިތުރުވި އެވެ. އަދި އޭގެ ސަބަބުން ނަޓެއްލާގެ ވިޔަފާރިއަށް އަސަރު ކުރަން ފެށުމުން ފެރާރޯ އިން ވަނީ ޓީވީ އާއި ނޫސްތައް މެދުވެރިކޮށް ނަޓެއްލާއަކީ ކެއުމަށް ރައްކާތެރި އެއްޗެއްކަން ޔަގީންކޮށްދޭން ފަށާފަ އެވެ.
އެގޮތުން ނަޓެއްލާ އުފެއްދުމަށް ބޭނުން ކުރަނީ ތާޒާ މޭވާ ކަމަށާއި، ޕާމް އޮއިލް ރިފައިން ކުރާ އިރު ނުރައްކާތެރި މާއަދާތައް ނުއުފެދޭ ކަން ޔަގީން ކުރުމަށް ހާއްސަ ޕްރޮސެސްއެއް ބޭނުން ކުރާ ކަމަށް ބުނެފަ އެވެ. މީގެ އިތުރުން، ފެރާރޯއިން ދާދި ފަހުން ނެރުނު ބަޔާނެއްގައި އެ ކުންފުނިން ވަނީ ނަޓެއްލާ އުފެއްދުމަށް ޕާމް އޮއިލް ބޭނުން ނުކުރާ ނަމަ އެއީ "ފަހަތަށް އެޅޭ ފިޔަވަޅަކަށް" ވާނެ ކަމަށާއި، އޭރުން ނަޓެއްލާގެ ކޮލިޓީ ދައްވާނެ ކަމަށް ބުނެފަ އެވެ.
ނަޓެއްލާ އުފެއްުދުމުގައި ޕާމް އޮއިލް ބޭނުން ކުރުން ހުއްޓާލުމަށް ފެރާރޯއިން ދެކޮޅު ހަދަނީ ނަޓެއްލާ އުފެއްދުމުގެ އަގު އިތުރުވެދާނެތީ ކަމަށްވެސް ބައެއް ރިޕޯޓުތަކުގައިވެ އެވެ. ރޮއިޓާސް އިން ލަފާ ކުރާ ގޮތުގައި ޕާމް އޮއިލްގެ ބަދަލުގައި އެހެން ވެޖިޓެބްލް އޮއިލްތައް ބޭނުން ކުރަން ފަށައިފި ނަމަ ނަޓެއްލާގެ އުފެއްދުމަށް އަހަރަކު ހޭދަ ކުރާ މިންވަރު 18 މިލިއަން ޕައުންޑަށް އިތުރުވާނެ އެވެ.