12 Jan 2017, 13:56
މިދިޔަ އަހަރުގެ ތެރޭގައި އެއާޕޯޓު ސާވިސް ޗާޖުގެ ގޮތުގައި ދައުލަތަށް ލިބިފައިވާ އާމްދަނީގެ މިންވަރު 8.2 ޕަސެންޓު އިތުރުވެއްޖެ އެވެ.
މީރާއިން އާންމުކޮށްފައިވާ މިދިޔަ އަހަރުގެ ތަފާސް ހިސާބުތަކަށް ބަލާއިރު، އެއާޕޯޓު ސާވިސް ޗާޖުގެ ގޮތުގައި މިދިޔަ އަހަރު ލިބުނީ 537.5 މިލިއަން ރުފިޔާ އެވެ. މިއީ އަހަރު ދުވަސްތެރޭ ދައުލަތަށް ލިބުނު މުޅި އާމްދަނީ (14.5 ބިލިއަން ރުފިޔާ)ގެ 3.7 ޕަސެންޓެވެ.
މިދިޔަ އަހަރު އެއާޕޯޓް ސާވިސް ޗާޖުގެ ގޮތުގައި ލިބުނު އާމްދަނީގެ މިންވަރު 2015 ވަނަ އަހަރު ލިބުނު ވަރާ އަޅާބަލާއިރު 8.2 ޕަސެންޓު އިތުރެވެ. ދެހާސްފަނަރަ ވަނަ އަހަރު އެއާޕޯޓު ސާވިސް ޗާޖުގެ ގޮތުގައި ލިބުނީ 496.6 މިލިއަން ރުފިޔާ އެވެ.
އެއާޕޯޓު ސާވިސް ޗާޖަކީ އެއާޕޯޓުން ދޭ ޚިދުމަތްތަކަށް ނަގާ ޓެކްސެކެވެ. މި ޓެކްސް ހިމަނަނީ ފުރާ ޕަސިންޖަރުންގެ ޓިކެޓުގަ އެވެ. ޓިކެޓު ނަގާ އިރު މި ޓެކްސްއަށްވާ ފައިސާ ނަގާނެ އެވެ. އެގޮތުން އެއާޕޯޓު ސާވިސް ޗާޖުގެ ގޮތުގައި ދިވެހިންގެ އަތުން ނަގަމުން އަންނަނީ 12 ޑޮލަރެވެ. ބިދޭސީންގެ ގޮތުގައި ނަގަނީ 25 ޑޮލަރެވެ.
މިދިޔަ އަހަރު އެއާޕޯޓް ސާވިސް ޗާޖުގެ ގޮތުގައި ދައުލަތަށް ވަތް އާމްދަނީގެ މިންވަރު އިތުރުވެފައި ވަނީ، ރާއްޖޭގެ އެއާޕޯޓުތަކުން ދަތުރު ކުރި ދިވެހިންނާއި ބިދޭސީންގެ އަދަދު އިތުރުވެފައި ވާތީ އެވެ.
އެއާޕޯޓު ސާވިސް ޗާޖުގެ އިތުރުން މިއަހަރުން ފެށިގެން އިތުރު ޓެކުހެއް ވެލާނާ އިންޓަނޭޝަނަލް އެއާޕޯޓުން ނަގަން ސަރުކާރުން ވަނީ ނިންމާފައެވެ. އެއީ އެއާޕޯޓު ޑިވެލޮޕްމެންޓް ޗާޖު، އޭޑީސީއެވެ. މިއަހަރުގެ ޖެނުއަރީ އެއްވަނަ ދުވަހުން ފެށިގެން މި ޓެކްސް ނަގާނީ އެއާޕޯޓުން ފުރާ ކޮންމެ ދިވެހި ޕަސިންޖަރެއްގެ އަތުން އިތުރު 12 ޑޮލަރުގެ މަގުންނެވެ. އެ އެއާޕޯޓުން ފުރާ ބިދޭސީންގެ އަތުން އޭޑީސީގެ ގޮތުގައި އިތުރު 25 ޑޮލަރު ނަގާނެ އެވެ.