11 Jan 2017, 09:07
އަފްޣާނިސްތާނުގެ ގާނޫނު ހަދާ މަޖިލީހުގެ ބޭރުގައި ދިން ބޮމުގެ ހަމަލާއެއްގައި 30 މީހުން މަރުވެ 80 މީހުން ޒަހަމްވެއްޖެ އެވެ.
މީޑިއާ ރިޕޯޓުތައް ބުނާ ގޮތުގައި މި ހަމަލާ ދީފައިވަނީ އެސަރަހައްދުގެ ކާރުބާރު ބޮޑު ވަގުތެއްގަ އެވެ. ބޮން ގޮއްވާލާފައިވަނީ މަޖިލީހުގެ މުވައްޒަފުން ޑިއުޓީ ނިންމާފައި މަޖިލީހުން ނުކުންނަކިކޮށް ކަމަށް ޚަބަރުތައް ބުނެ އެވެ.
މި ހަމަލާތަކަކީ ތާލިބާނުން އެގައުމުގެ އެކި ސަރަހައްދުތަކުގައި ދެމުން އަންނަ ސިލްސިލާ ހަމަލާތަކުގެ ތެރެއިން ހަމަލާއެކެވެ. އެގޮތުން މަޖިލިސް ކައިރިއަށް ދިން ހަމަލާގެ ޒިންމާ ވެސް އެ ޖަމާއަތުން ވަނީ ނަގާފަ އެވެ.
ތާލިބާނުން ހަމަލާދިން ތަންތަނުގެ ތެރޭގައި، ހެލްމަންޑުގެ ވެރިރަށް ލަޝްކަރުގައްއާއި އެގައުމުގެ ކަންދަހާރް ޕްރޮވިންސު ހިމެނެ އެވެ.
ލަޝްކަރުގައްގައި ދިން ހަމަލާއަކީ ފިދާއީ ހަމަލާއެކެވެ. އެހަމަލާ ދީފައިވަނީ އެގައުމުގެ އިންޓަލިޖެންސް އޮފިޝަލަކު އުޅެމުން ދިޔަ ގެސްޓް ހައުސްއަކަށެވެ. އެ ހަމަލާގައި ހަތް މީހަކު މަރުވެ އިތުރު ހަ މީހަކު ޒަހަމްވެފައިވެ އެވެ. އޭގެ ފަހުން ހަމަލާ ދީފައި ވަނީ ކަންދަހާރް ޕްރޮވިންސުގެ ގަވަރުނަރު ދިރިއުޅޭ ގެއަށެވެ. އެހަމަލާގައި އެއްވެސް މީހަކަށް ގެއްލުމެއް ވެފައި ނުވި ނަމަވެސް، އެ ގެއަކީ ބޭރުގެ އޮފިޝަލުންނާއި ޔުނައިޓެޑް އަރަބް އެމިރޭޓްސްއިން އެގައުމަށް ކަނޑައަޅާފައި ހުންނަވާ ސަފީރު ދިރިއުޅުއްވަމުން ދިޔަ ގެއެވެ.