10 Jan 2017, 11:32
ކަނޑު އުޅަނދުފަހަރު އިންޝުއަރެންސް ކުރަން ލާޒިމްކޮށްފައިވާ އިރު އެންމެ ކުންފުންޏަކުން އެ ހިދުމަތްނަގަން މަޖުބޫރުކޮށްފައި ވާތީ ސަފާރީތަކުގެ ޖަމިއްޔާ ލިވްއަބޯޑު އެސޯސިއޭޝަނުން އޮފް މޯލްޑިވްސް(ލޭމް) އިން ކަންބޮޑުވުން ފާޅުކޮށްފި އެވެ.
މި އަހަރުން ފެށިގެން ރާއްޖޭގެ ކަނޑުގެ ސަރަހައްދުގައި ދުއްވާ އުޅަނދާއި މުދާ ހިމެނޭ ގޮތަށް "ޓޯޓަލް ލޮސް އިންޝުއަރެންސް" ޕޮލިސީއެއް ނެގުމަށް ޓުރާންސްޕޯޓް އޮތޯރިޓީ އިން ވަނީ ލާޒިމްކޮށްފަ އެވެ. އެއިންޝުއަރެންސް ނަގަންޖެހެނީ ހަމައެކަނި އެލައިޑް އިންޝުއަރެންސްއިން ކަމަށް ވެސް ޓުރާންސްޕޯޓުން ވަނީ އަންގައިފަ އެވެ.
ރާއްޖޭގައި 160 ސަފާރީ ދުއްވާ އިރު އޭގެ ތެރެއިން ކޮންމެ އުޅަނދެއް ވެސް އިންޝުއަރެންސްއަށް ބޮޑު ހަރަދެއް ކުރެއެވެ.
ލިވްއަބޯޑު އެސޯސިއޭޝަންގެ ސެކެއްޓަރީ ޖެނެރަލް، މުހައްމަދު އިގްނާޒް އަލީ މިއަދު ސަން އަށް ވިދާޅުވީ ސަފާރީތަކުން އެކި އިންޝުއަރެންސް ކުންފުނިތަކުން ހިދުމަތް ހޯދަމުންދާ އިރު ވަކި ކުންފުންޏަކުން އެއިންޝުއަރެންސް ނެގުމަށް މަޖުބޫރު ކުރުމަކީ ކަންބޮޑުވުމެއް ކަމަށެވެ.
"މޮނޮޕޮލީ އަކީ އަޅުގަނޑުމެން ތާއީދު ކުރާކަމެއް ނޫން، ރާއްޖޭގައި އިންޝުއަރެންސް ހިދުމަތްދޭ ކުންފުނިތައް އެބަހުރި، މިގޮތަށް ނިންމުމުން ކޮމްޕެޓިޓިޝަނެއް ނެތް، މީގެ ގެއްލުން ވާނީ އުޅަނދުތަކުގެ ވެރިންނަށް،" އިގްނާޒް ވިދާޅުވި އެވެ.
އިގްނާޒު ވިދާޅުވީ ބައެއް ސަފާރީތަކުން އެހެން ކުންފުނިތައް މެދުވެރިކޮށް އިންޝުއަރެންސް ކުރާތާ އެތައް އަހަރެއްވެފައި ވަނިކޮށް ކުއްލިއަކަށް ބަދަލުވުމަކީ ބޮޑު ގޮންޖެހުމެއް ކަމަށެވެ.
"މިހާރު ކޮށްފައިވާ އިންޝުއަރެންސް ސުކީމްތަކުގެ ތެރެއިން އުޅަނދާ އެކު ފަޅުވެރިން ވެސް އިންޝުއަރެންސްވޭ، އެކަމަކު އަލަށް އައި ބަދަލާ އެކު މިޖެހެނީ ފަޅުވެރިން ވަކިން އިންޝުއަރެންސް ކުރަން،" އިގްނާޒް ވިދާޅުވި އެވެ.
އެ ހިދުމަތް ދިނުން ހަމައެކަނި އެލައިޑަށް ދިނުމުން އިންޝުއަރެންސް ހިދުމަތްދޭ ކުންފުނިތަކުން ވެސް އަންނަނީ ކަންބޮޑުވުން ފާޅުކުރަމުންނެވެ.
އެކަމާ ގުޅިގެން ޓުރާންސްޕޯޓްޕޯޓްގެ ބަހެއްވަނީ ލިބޭގޮތް ނުވެފަ އެވެ.
އެއިންޝުއަރެންސްގެ ހިދުމަތް ދިނުމުގެ ހުއްދަ ހަމައެކަނި ލިބިފައިވާ އެލައިޑް އިންޝުއަރެންސްގެ މާކެޓިންގް މެނޭޖަރު ނިއުޝާދު ޝަރީފު ވިދާޅުވީ އެ ކުންފުނިން ދޭ ޕެކޭޖުން ކަވާކުރާނީ ކަނޑުމަތީގައި ދިމާވާ ހާދިސާއެއްގެ ސަބަބުން އުޅަނދު އެކީގައި ހަލާކުވާ ފަދަ ހާލަތެއް ދިމާވުމުން ކަމަށެވެ.
ނިއުޝާދު ވިދާޅުވީ 'ނިޔާމަ' އަކީ ފައިދާ ބޮޑު ޕެކޭޖެއް ކަމަށާއި އޮޑިފަރަށް އެރުމުން، ނިޔާމައިގެ ދަށުން އޮޑި ފުންކުރަންދާ ޚަރަދާއި ބޯޓު ޔާޑަށް ގެންދަން ދާ ޚަރަދު ފަދަ ކަންކަން ވެސް އެ ޕެކޭޖުގެ ދަށުން ކަވާ ކުރާނެ ކަމަށެވެ.