03 Jan 2017, 23:46
ރެއިންބޯގެ ހެޑް އޮފީހަށް 600،000 އެއްހާ ނަގުދު ފައިސާ ހިފައިގެން ދަނިކޮށް، މޫނު ނިވާކޮށްގެން ތިބި ބަޔަކު ސައިކަލެއްގައި ގޮސް އެ ފައިސާތައް ފޭރިގެންފި އެވެ.
ފުލުހުންގެ މީޑިއާ އޮފިޝަލަކު "ސަން"އަށް ވިދާޅުވީ، ރެއިންބޯގެ ހެޑް އޮފީހަށް ފައިސާތަކެއް ހިފައިގެން ދިޔަ މަގުމަތީގައި ބަޔަކު އައިސް އެ ފައިސާ ދަބަސް ފޭރިގަނެގެން ދިޔަ ކަމުގެ މައުލޫމާތެއް ފުލުހުންނަށް އިއްޔެ ހެނދުނު 10:00 ކަންހާއިރު ހުށަހަޅާފައިވާ ކަމަށެވެ.
ފޭރިގަނެފައި ވަނީ ހަ ލައްކަ ރުފިޔާ ކަމަށް ވެސް ފުލުހުންގެ އޮފިޝަލު ވިދާޅުވި އެވެ. އޭނާ ވިދާޅުވީ އެ މައްސަލާގައި އަދި މިހާތަނަށް މީހަކު ހައްޔަރުކޮށްފައި ނުވާ ކަމަށާއި އެކަން ތަހުގީގު ކުރަމުންދާ ކަމަށެވެ.
އެކަން ހިނގި ގޮތް އިތުބާރު ހުރި ފަރާތަކުން "ސަން"އަށް ވަނީ ކިޔައިދީފަ އެވެ. އޭނާ ކިޔައިދިން ގޮތުގައި އަލިކިލޭގެފާނު މަގުގައި ހުންނަ ރެއިންބޯ ހެޑް އޮފީހަށް ގެންދަން އުޅުނު ފައިސާއަކީ ޗާންދަނީމަގުގައި ހުންނަ "ރެއިންބޯ މޯލް" އަށް ލިބުނު ފައިސާ ކަމަށާއި އެ ފައިސާތައް ހިފައިގެން ސައިކަލެއްގައި ދެ މީހަކު ދަނިކޮށް، ފޭރިގަތީ ލިލީމަގާއި ޑޭސީމަގު ގުޅޭ ކަންމަތިން ކަމަށެވެ. ފައިސާ ފޭރުނީ މޫނު ނިވާކޮށްގެން ތިބި ދެ މީހަކު ސައިކަލެއްގައި ގޮސްގެން ކަމަށް އޭނާ ބުންޏެވެ.
"މޫނު ނިވާކޮށްގެން ތިބި ދެ މީހަކު ސައިކަލެއްގައި ގޮސް، ފައިސާ ހިފައިގެން ދިޔަ ސައިކަލުގައި ޖައްސައި ވައްޓާލައި، ފައިސާ ފޭރިގަނެގެން ފިލީ،" އެ ހާދިސާ ކިޔައިދިން މީހާ ބުންޏެވެ.