30 Dec 2016, 22:59
ކުޑަކުދިން ހިތްއުފާކޮށްލާ ކުޅެވޭނެގޮތަށް ށ. މިލަންދޫގައި "ސަރުދާރު މައިޒާން" ގެ ނަމުގައި މައިޒާނެއް ހުޅުވައިފި އެވެ.
އެ މައިޒާން ހުޅުވާފައި ވަނީ ށ. މިލަންދޫ ރަށުތެރެ ތަރައްގީ ކުރުމުގެ ޕްރޮގްރާމްގެ ދަށުންނެވެ.
މިލަންދޫގައި އެ މައިޒާން ރަސްމީކޮށް ހުޅުވާދެއްވީ ރައްޔިތުން މަޖިލީހުގެ މިލަންދޫ ދާއިރާގެ މެންބަރު ހަސަން މުފީދު އަބްދުލް ޤާދިރެވެ.
މިލަންދޫ ކައުންސިލްގެ ރައީސް އަބްދުﷲ ފާއިޒު ހަސަން ވިދާޅުވީ އެ މައިޒާނަކީ މިލަންދޫ ކައުންސިލާއި މެންބަރު މުފީދުގެ ދީލަތި އެހީތެރި ކަމާއެކު ނިންމާފައިވާ މައިޒާނެއް ކަމަށެވެ.
އެ މައިޒާން ހެދުމަށް ޖުމްލަ ހަތަރު ލައްކަ އަށްވުރެ ގިނަ ރުފިޔާ ހަރަދުވި ކަމަށްވެސް އޭނާ ވިދާޅުވިއެވެ.
އެ މައިޒާނަށް ސަރުދާރު މައިޒާންގެ ނަމުން ނަންދެވުނީ ށ. މިލަންދޫ އުދަރެސް އަލްމަރުޙޫމް ޔޫސުފް އަލީ (ސަރުދާރު ޔޫސުބު) މިލަންދޫގެ އިޖްތިމާއީ ކަންކަމުގައި ކޮށްދެއްވާފައިވާ އަގުހުރި މިންނަތް މަސައްކަތްތަށް ރަމްޒުކޮށް، އެބޭފުޅާގެ ނަން އަގުހުރި މިސާލެއްގެ ގޮތުގައި ދިރުވާ އާލާކުރުމަށް ކަމަށް މިލަންދޫ ކައުންސިލުން ބުންޏެވެ.