28 Dec 2016, 17:49
ބެއިޖިންގް (ޑިސެމްބަރު 28) : ހަނދުގެ އަނދިރި ފަރާތަށް ޖައްވީ އުޅަނދެއް ފޮނުވަން ޗައިނާ ތައްޔާރުވަމުން އެބަގެންދެއެވެ.
ފަޒާއާބެހޭ ޗައިނާގެ އިދާރާއިން ބުނީ މިއުޅަނދުގެ ބޭނުމަކީ ހަނދުގެ އަނދިރި ފަރާތް (ބިމަށް ނުފެންނަ ފަރާތް) ޖިއޮލޮޖިކަލް ގޮތުން ދިރާސާކުރުމަށް ބޭނުންވާ މައުލޫމާތު ހޯދުމެވެ. މި މައުލޫމާތުގެ ތެރޭގައި ހަނދު އުފެދުނުގޮތާއި ހަނދަށް އައިސްފައިވަ ޖިއޮލޮޖިކަލް ބަދަލުތައް ހިމެނެއެވެ.
މިކަމަށްޓަކައި ތައްޔާރުކުރާ ޖައްވީ އުޅަނދުގެ ނަމަކީ "ޗާންގް އާހް 5" އެވެ. މިއުޅަނދު 2017 ވަނަ އަހަރު ނިމުމުގެ ކުރިން ތައްޔާރުކޮށް 2018 ވަނަ އަހަރުގެ ކުރީކޮޅު ހަނދަށް ފޮނުވާނެ ކަމަށްވެސް ފަޒާއާބެހޭ ޗައިނާގެ އިދާރާއިން ބުނެއެވެ.
މީގެ އިތުރުން ސޯލާ ސިސްޓަމްގެ ޕްލެނެޓެއްކަމަށްވާ މާސްގެ ސަތަހު ދިރާސާކުރުމަށް ބޭނުންވާ އުޅަނދެއްވެސް ޗައިނާ ގެންދަނީ ތައްޔާރު ކުރަމުންނެވެ. މިއުޅަނދު 2020 ގައި މާސް އަށް ފޮނުވާނެކަން ފަޒާއާބެހޭ ޗައިނާގެ އިދާރާއިން ވަނީ ހާމަކޮށްފައެވެ. މާސްއަށް އުޅަނދެއް ފޮނުވުމުގެ މަޝްރޫއަކީ ޗައިނާއިން މިހާތަނަށް ފެށި ފަޒާއާބެހޭ އެންމެ ބޮޑު މަޝްރޫޢެވެ. މިމަޝްރޫއު އިޢްލާން ކުރުމާގުޅިގެން އެމެރިކާ އަށްވަނީ ފަޒާގެ ދާއިރާގައި ޗައިނާ އެމެރިކާއާ ވާދަކުރާކަމުގެ އިޙްސާސް ކުރަންޖެހިފައެވެ.
އިންޑިޔާވެސް ގެންދަނީ މާސްއަށް އުޅަނދެއް ފޮނުވުމުގެ މަޝްރޫޢެއް ތަންފީޒުކުރަމުންނެވެ. ޗައިނާވަނީ 2013 އަހަރު ހަނދަށް ދިރާސީ އުޅަނދެއް ފޮނުވާފައެވެ. އެ އުޅަނދު ("ޗާންގް އާހް 4") ފޮނުވާފައިވަނީ ހަނދުގެ ބިމާވީ ފަޅި (ބިމަށްފެންނަ ފަޅި) އަށެވެ. އެއީ މީހުންނެތް އުޅަނދެކެވެ.
މިހާތަނަށް އެއްވެސް ގައުމަކަށް އިންސާނަކު ހަނދަށް ފޮނުވިފައެއް ނުވެއެވެ. އެމެރިކާއިން 1969 ވަނަ އަހަރު ހަނދަށް އިންސާނަކު ފޮނުވިކަމަށް ބުނެ ފަތުރާފައި ވަނީ ދޮގު ޚަބަރުތަކެއް ކަމާއި އެއީ ސިޔާސީ ބޭނުމެއްގައި ޑްރާމާއެއްކަން ދާދިފަހުންވަނީ ސާބިތުވެފައެވެ. މިކަން ޔަގީންވީ ވިކިލީކްސް އިން ލީކުކޮށްލި އެމެރިކާގެ ޖައްވީ އިދާރާ ނާސާގެ ސިއްރު ލިޔުންތަކަކުންނެވެ.
މިއާއެކު ނާސާގައި އެ ދުވަސްވަރު މަސައްކަތްކުރި ސައެންސްވެރިއަކުވެސް ދާދި ފަހުންވަނީ ހަނދަށް އިންސާނަކު ފޮނުވި ކަމަށްބުނެ އެމެރިކާއިން ހަދާފައި ވަނީ ދޮގެއް ކަމާއި އެމެރިކާއިން ކުޅުނީ ޑްރާމާއެއްކަން ކަށަވަރުކޮށްދީފަ އެވެ. މިގޮތުން ހަނދަށްދިޔަކަމަށްބުނެ އެމެރިކާއިން ކުޅުނު ޑްރާމާ ކުޅެފައިވަނީ ނަސާގެ ސްޓޫޑީޔޯއެއްގަ އާއި އެމެރިކާގެ ސްޓޭޓްއެއް ކަމަށްވާ ނެވާޑާގެ ހަނަފަސް ބިމެއްގައި ކަމަށްވެސް ނަންހާމަކުރަންނޭދޭ އެމެރިކާގެ ސައެންސްވެރިޔާ ހާމަކުރައްވާފައިވެއެވެ.
ހަނދަށް ދިޔަކަމަށްބުނެ އެމެރިކާ އެޕޯލޯ 11 ގެ މަޝްރޫއާ ގުޅިގެން ނާސާއަށް ސައެންސްވެރިން ކުރިމަތިކުރި ފަންނީ އަދި އިލްމީ އެއްވެސް ސުވާލަކަށް ނާސާއަށް މިހާތަނަށް ޖަވާބު ދެވިފައެއް ނުވެއެވެ.(ނޫސްއެޖެންސީތައް)