27 Dec 2016, 11:18
އެއްބައިވަންތަކަމުގެ ދުވަސް ފާހަގަ ކުރަމުންދާއިރު، އެންމެ ބޮޑު އިސްކަމެއްދީގެން މަސައްކަތް ކުރަން ޖެހިފައި ވަނީ، ރާއްޖޭގައި އުފެދިފައި އޮތް އެއްބައިވަންތަކަން ދެމެހެއްޓުމަށް ކަމަށް ޑިފެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
ދިވެހިންގެ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރާއްޖޭގެ އެއްބައިވަންތަ ކަމަށް ނޭދެވޭ އަސަރުކޮށްފާނެ ކަންތައްތަކާ ދޭތެރޭގައި މިއަދު ވިސްނަން ޖެހޭ ކަމަށެވެ.
"އަޅުގަނޑުމެން މިއަދު އެއްބައިވަންތަކަމުގެ ދުވަސް ފާހަގަކުރަމުންދާއިރު، އެންމެ ސަމާލުކަން ދޭންޖެހިފައި އޮތް އެއް ކަމަކީ، އަޅުގަނޑުމެންގެ ތެރޭގައި މިއަދު އުފެދިފައި އޮތް އެއްބައިވަންތަކަން ދެމެހެއްޓުމަށްޓަކައި އަޅުގަނޑުމެން މަސައްކަތް ކުރުން،" މިނިސްޓަރު ވިދާޅުވި އެވެ.
ރަނގަޅު މުޖުތަމައުއެއް ބިނާ ކުރުމަށް އެ މުޖުތަމައުގައި ބޮޑެތި ވަމުންދާ ކުދިންނަކީ، އަޅާލުމާއި އޯގާތެރިކަމާއި ލޯބި ލިބިގެން ބޮޑެތިވާ ކުދިންނަށް ވާންޖެހޭ ކަމަށް މިނިސްޓަރު ވިދާޅުވި އެވެ.
އެޖަލްސާގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ދެއްކެވި ވާހަކަފުޅުގައި ތަރައްގީވެފައިވާ ގައުމުތައް ތަރައްގީވެފައިވަނީ، އެބައެއްގެ ތެރޭގައި އެއްބައިވަންތަކަން ގާއިމް ކުރެވިގެން ކަމަށް ވިދާޅުވި އެވެ.
"ދުނިޔެ ދައްކާފައިވާ ތެދު ހަގީގަތަކީ އެއްބައިވަންތަކަމެއް ނެތް ތަނެއްގައި ހަމަ ޖެހުމެއްނެތް. ހަމަޖެހުމެއް ނެތް ތަނެއްގައި ކުރިއެރުމެއް ތަރައްގީއެއް ތަހުޒީބެއް ގާއިމް ވެފަ އެއް ނެތް،" މިނިސްޓަރު ވިދާޅުވި އެވެ.
ނާޒިމްގެ ވާހަކަފުޅުގައި، އެއްބައިވަންތަކަން ފެށިގެން އަންނަނީ، ހިތްހެޔޮކަމާއި، ރަހްމަތްތެރިކަމާއި އަދި އޯގާތެރިކަމުގެ ތެރެއިން ކަމަށް ވިދާޅުވި އެވެ. އަދި އެއްބައިވަންތަކަމުގެ ދުވަހެއް ފާހަގަކުރުމުގެ ބޭނުމަކީ، ގައުމު ކުރިއަށް ގެންދިއުމަށް ކުރާ މަސައްކަތަށް އެކަކު އަނެކަކަށް ހިތްވަރުދީ ދަތި ހާލަތްތަކުގައި އެކަކު އަނެކަކަށް އެހީތެރިވެ އުޅުމަށް ކަމަށް ވިދާޅުވި އެވެ.
ނާޒިމް ވިދާޅުވީ، ގައުމުގެ މުޖުތަމައުގައި ހަމަނުޖެހުން އުފެދުނު ކޮންމެ ފަހަރަކުވެސް އެ ހަމަނުޖެހުމެއް އުފެދިފައިވަނީ، ދިވެހިންގެ ތެރެއިން އުފެދުނު ހިތްހަމަ ނުޖެހުންތަކެއްގެ ސަބަބުން ކަމަށް ވިދާޅުވި އެވެ.