26 Dec 2016, 10:01
އަލް ގުދުސް (ޑިސެމްބަރު 26): އިސްރާއީލުން ފަލަސްތީނުގައި ގެދޮރު އެޅުން ހުއްޓާލުމަށް ގޮވާލާ ގަރާރު ފާސްކުރުމަށް އެމެރިކާ އިން ފުރުސަތު ދިން މައްސަލައިގައި އެމެރިކާގެ ސަފީރު ޑެނިއެލް ޝަޕީރޯ އިސްރާއީލުގެ ފޮރިން މިނިސްޓްރީއަށް ހާޒިރުވާން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަންގަވައިފި އެވެ.
އެމެރިކާ އިން ވަނީ މިއަދުގެ ވަގުތެއްގައި ޝަޕީރޯއާ ނަތަންޔާހޫ ބައްދަލު ކުރައްވާނެ ކަމަށް ބުނެފަ އެވެ.
މީގެ ކުރިން އިސްރާއީލުން ވަނީ ގަރާރު ފާސްކުރުމަށް ވޯޓުދިން ސަލާމަތީ މަޖިލީހުގެ 14 މެމްބަރުންގެ ތެރެއިން އިސްރާއީލުގައި އެމްބަސީތައް ހުންނަ 10 މެމްބަރު ގައުމެއްގެ ސަފީރުން އެގައުމުގެ ފޮރިން މިނިސްޓްރީއަށް ހާޒިރުކޮށްފަ އެވެ.
އިސްރާއީލާ ދެކޮޅަށް ފާސްކުރާ ގަރާރުތަކާ ދެކޮޅަށް މީގެ ކުރިން އެމެރިކާ އިން ފިޔަވަޅު އެޅި ނަމަވެސް ރައީސް ބަރަކް އޮބާމާގެ ސަރުކާރުން ވަނީ އެ ގަރާރު ވީޓޯ ކުރުމަށް މިފަހަރު ދެކޮޅު ހަދައިފަ އެވެ. ސަލާމަތީ މަޖިލީހުގައި ގަރާރު ފާސްކުރުމަށް ބޭއްވި ވޯޓުގައި އެމެރިކާ އިން ބައިވެރިވެފައި ނުވެ އެވެ.
އެހެންކަމުން، އދން ފާސްކުރި ގަރާރުގެ ފަހަތުގައި ވަނީ އެމެރިކާ ކަމަށް ނަތަންޔާހޫ ވަނީ ތުހުމަތު ކުރައްވާފަ އެވެ.
"އަޅުގަނޑުމެންނަށް ލިބިފައިވާ މައުލޫމާތުން އެއްވެސް ޝައްކެއް ނެތް ގޮތުގައި އެނގެނީ އެގަރާރު ހުށަހެޅުމަށް އިސްނަގައި، އޭގެ ފަހަތުގައި ތިބެ، ގަރާރު އިބާރާތްކޮށް އަދި ފާސްކުރުމަށް ބާރުއަޅާފައި ވަނީ އޮބާމާގެ ސަރުކާރުންކަން،" ނަތަންޔާހޫ ވިދާޅުވި އެވެ.
އެމެރިކާ އިން ވަނީ އެތުހުމަތުތައް ދޮގުކޮށްފަ އެވެ.
މީގެ އިތުރުން ނަތަންޔާހޫ ވަނީ ސަލާމަތީ މަޖިލީހުގެ ނިންމުން ބަދަލު ކުރަން މަސައްކަތް ކުރައްވާނެ ކަމަށާއި އެމެރިކާގެ ކޮންގްރެސްގައި ތިބި އިސްރާއީލަށް ތާއިދު ކުރާ ފަރާތްތަކާއި އެމެރިކާއަށް ދެން އަންނަ ސަރުކާރާ އެކު ގަރާރާ ދެކޮޅަށް މަސައްކަތް ކުރައްވާނެ ކަމަށް ވިދާޅުވެފަ އެވެ.
އދ.ގެ ސަލާމަތީ މަޖިލީހަށް އެންމެ ފުރަތަމަ އެ ގަރާރު ހުށަހެޅީ މިސްރުންނެވެ. ނަމަވެސް އެމެރިކާގެ ރިޔާސީ އިންތިހާބު ކާމިޔާބު ކުރެއްވި ޑޮނަލްޑް ޓްރަމްޕާއި އިސްރާއީލުގެ ޕްރެޝަރުގެ ސަބަބުން ގަރާރު އަނބުރާ ގެންދިޔައީ އެވެ.
އަދި ޓްރަމްޕް ވަނީ ޖެނުއަރީ 20ގައި އޭނާ ވެރިކަމަށް ވަޑައިގަތުމުން އދ.ގައި ކަންތައްތައް ހިނގާ ގޮތް ބަދަލު ވާނެ ކަމަށް ވިދާޅުވެފަ އެވެ.
ސަލާމަތީ މަޖިލީހަށް ގަރާރު ހުށަހެޅި ގައުމުތަކުގެ ތެރެއިން ނިއު ޒީލޭންޑާއި ސެނެގާލްގައި ހުންނަ ސަފީރުން އަނބުރާ ގައުމަށް ވަޑައިގަތުމަށް އިސްރާއީލުން ވަނީ އަންގައިފަ އެވެ. އަދި ސެނެގާލްއަށް ފޮނުވާ ހުރިހާ އެހީގެ ޕްރޮގްރާމްތައް ހުއްޓާލާނެ ކަން އިއުލާންކޮށްފަ އެވެ. ގަރާރު ހުށަހެޅުމުގައި ދެން ބައިވެރިވި މެލޭޝިއާ އާއި ވެނެޒުއޭލާއާ އިސްރާއީލާ ދެމެދު ޑިޕްލޮމެޓިކް ގުޅުންތަކެއް ނޯވެ އެވެ. (ބީބީސީ)