25 Dec 2016, 19:01

ށ. ޅައިމަގު އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ރައީސާ ހަލީމާ އާދަމްގެ މޫނަށް ކެމިކަލް ޖެހި މައްސަލަ ތަހުގީގު ކޮށް، ހަލީމާ އަށް ހަމަލާ ދިން ފަރާތެއް ހޯދައި، އިންސާފުވެރި ޝަރީއަތެއް ކުރިއަށް ގެންދިއުމަށް ެިއަންހެނުންގެ ހައްގުތަކާއި އިންސާނީ ހައްގުތަކަށް މަސައްކަތް ކުރާ ޖަމިއްޔާ ޖަމާއަތްތަކުން ގޮވާލައިފި އެވެ.

އެ ހަމަލާ ތަހުގީގުކޮށް އިންސާފުވެރި ޝަރީއަތެއް ކުރުމަށް ގޮވާލާފައި ވަނީ، ޓްރާންސްޕޭރެންސީ މޯލްޑިވްސް، ސޮސައިޓީ ފޮރ ހެލްތު އެޑިއުކޭޝަން (ޝީ)، މޯލްޑިވިއަން ނެޓްވާކް ޓު އެމްޕަވަރ ވިމެން، އައްޑޫ ވިމެންސް އެސޯސިއޭޝަން، ވޮއިސް އޮފް ވިމެން، ވިމަން އެންޑް ޑިމޮކްރަސީ އަދި އުތަމަ އިން ނެރުނު ބަޔާނެއްގަ އެވެ.
ހަތް އެންޖީއޯ އަކުން ގުޅިގެން ނެރުނު ބަޔާނެއްގައި ބުނެފައި ވަނީ، ރާއްޖޭގައި މީހެއްގެ ހަށިގަނޑަށް ކެމިކަލް ޖެހި ހަބަރު ލިބުމުން ބޮޑު ކަންބޮޑުވުމެއް ލިބިފައިވާ ކަމަށެވެ. އެގޮތުން، މީހުންގެ ފުރާނައަށް ނުރައްކާވާ ގޮތަށް ހަށިގަނޑަށް އެސިޑު ނުވަތަ ކެމިކަލް ޖެހުމަކީ އަވަށްޓެރި އިންޑިއާ އަދި ބަންގްލަދޭޝް ގައި ހަމަލާ ދިނުމަކީ އާންމު ކަމެއް ނަމަވެސް ރާއްޖޭގައި އެފަދަ ހަމަލާ އެއް ދިނުމަކީ އާދަޔާ ޚިލާފު ކަމެއް ކަމަށް އެންޖީއޯތަކުން ވަނީ ސިފަކޮށްފަ އެވެ.
"ދިވެހިރާއްޖޭގެ އެއްވެސް ހިސާބެއްގައި މިފަދަ ނޭއްގާނީ އަމަލެއް އެއްވެސް މީހަކާ ދެކޮޅަށް ހިންގުމަކީ ނުހަނު ކަންބޮޑުވާ ކަމެކެވެ." އެންޖީއޯތަކުގެ ބަޔާނުގައިވެ އެވެ.
އެފަދަ ހަމަލާ ތަކަކީ ޖިސްމާނީ ގޮތުންނާއި ނަފްސާނީ ގޮތުން އަސަރު ކުރާ، އަދި އެކަމުގެ ސަބަބުން ލިބޭ ގެއްލުން އިއާދަނުކުރެވޭ ފަދަ ކަންތައްތައް ކަމަށާއި، އެފަދަ ހަމަލާތަކުގެ ޝިކާރައަކަށްވާ މީހުން އުމުރު ދުވަހަށް އެކަމުގެ ހިތްދަތިކަން ތަހައްމަލް ކުރަން ޖެހޭ ކަން އެންޖީއޯތަކުގެ ނޫސްބަޔާނުގައި ވަނީ ފާހަގަކޮށްފަ އެވެ.
ހަލީމާ އާދަމްގެ މޫނަށް ޖަހާފައި ވަނީ ފާހާނަ ސާފުކުރަން ބޭނުންކުރާ ކެމިކަލް އެވެ. އެހެންކަމުން ހަންގަނޑަށް އެއްވެސް ގެއްލުމެއް ނުވާ ކަމަށާއި، އަދި ކެމިކަލް ޖެހުމުގެ ސަބަބުން ލޮލުގެ ފެނުމަށް ވެސް އަސަރުކޮށްފައި ނުވާ ކަމަށް ހަލީމާ އަށް ފަރުވާދޭ ޑޮކްޓަރާ ހަވާލާދީ ކުޅުދުއްފުށީ ރީޖަނަލް ހޮސްޕިޓަލުން ވަނީ ބުނެފަ އެވެ.

އެ މައްސަލަ ފުލުހުން މިހާރު ތަހުގީގު ކުރަމުން އަންނަ އިރު، މައްސަލަ އާ ގުޅިގެން ދެ މީހަކު ވަނީ ހައްޔަރުކޮށްފަ އެވެ.

ހަލީމާ އަށް ހަމަލާ ދިން މީހާ އޭނާ އަށް އެނގޭ ކަމަށް ބުނެ، އޭނާ އާ ހަވާލާދީ އެރަށު ކައުންސިލުން ވަނީ ބައެއް މީޑިއާ ތަކަށް މައުލޫމާތު ދީފަ އެވެ. ނަމަވެސް ފުރާނަ އަށް ބިރުން، އެއީ ކާކުކަން ހާމަކުރަން ހަލީމާ ޖެހިލުން ވާކަމަށް ވެސް ވަނީ ބުނެފަ އެވެ.

އެކަން ފާހަގަކޮށް އެންޖީއޯ ތަކުން ވަނީ، އެފަދަ ހާލަތަކަށް ހަލީމާ ދިއުމަކީ މުޅި ދިވެހި މުޖުތަމައަށް ލިބޭ ނިކަމެތި ކަމެއް ކަމުގައި ސިފަކޮށްފަ އެވެ.

"ހަލީމާ އާދަމް އަށް ހަމަލާ ދިން ފަރާތެއް ހޯދައި، ހާދިސާ ތަހުގީގުކޮށް، އިންސާފުވެރި ޝަރީއަތެއް ހިންގުމަކީ ދިވެހި ދައުލަތުގެ ކަމާބެހޭ ފަރާތްތަކުން ކަށަވަރު ކޮށްދެއްވަންޖެހޭ ކަންތައްތައްކަން ވެސް ފާހަގަ ކުރަމެވެ." ބަޔާނުގައިވެ އެވެ.

އަދި އެފަދަ ހާދިސާތައް ތަކުރާރު ވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އިތުރަށްހަރުދަނާ ކުރުމަކީ ދައުލަތުގެ މުއައްސަސާތަކުގެ މައްޗަށް އޮތް ޒިންމާއެއް ކަމަށް ވެސް އެންޖީއޯތަކުން ވަނީ ފާހަގަކޮށްފަ އެވެ.

"ދިވެހިރާއްޖޭގައި ދިރިއުޅޭ ކޮންމެ އަންހެނެއްގެ ވެސް ހައްޓާއި ފުރާނައިގެ ރައްކާތެރިކަމާއި، މިނިވަން މާހައުލެއްގައި މަސައްކަތްކޮށް ދިރިއުޅުމަކީ ގާނޫނު އަސާސީގެ ދަށުން ދަށުން ޔަގީންކޮށްދީފައިވާ އިންސާނީ ހައްގުތަކަށް ވީހިނދު، އެ ހައްގުތައް ފަހިކޮށްދީ، އެއިން ހައްގެއް ނިގުޅައި ނުގަނެވޭނޭކަން ކަށަވަރުކޮށްދިނުމަކީ ދައުލަތުގެ މައްޗަށް އޮތް ފުސްތީރީ ވާޖިބެކެވެ." އެ ބަޔާނުގައި ބުނެފައިވެ އެވެ.

އެންޖީއޯ ތަކުން ވަނީ ދިވެހި މުޖުތަމައުގައި އަންހެނުންނަށް ކުރިމަތިވަމުން އަންނަ އަނިޔާވެރި ޖަރީމާތައް ހުއްޓުވައި، އެފަދަ ޖަރީމާތައް ހިންގާ ފަރާތްތަކާ މެދު ފިޔަވަޅު އަޅައި އިންސާފު ކުރުމަށް ރާއްޖޭގައި އަދުލު އިންސާފު ގާއިމު ކުރުމުގެ ޒިންމާ އޮތް އެންމެހައި ފަރާތްތަކަށް ގޮވާލައިފަ އެވެ.