25 Dec 2016, 10:14
މޮސްކޯ (ޑިސެމްބަރު 25): ބްލެކް ސީގައި އޮންނަ ރިޒޯޓު ރަށެއް ކަމަށްވާ ސޯޗީއިން ނައްޓާލި ރަޝިއާގެ ބޯޓެއް ރާޑަރުން ގެއްލިފައިވާ އެގައުމުގެ މީޑިއާތަކުން ބުނެފި އެވެ.
ރަޝިއާގެ އެމާޖެންސީ ސާވިސަސްއާ ހަވާލާދީ އެގައުމުގެ މީޑިއާތަކުގައިވާ ގޮތުން ރާޑަރުން ގެއްލިފައި ވަނީ އެގައުމުގެ ޑިފެންސް މިނިސްޓްރީއަށް ނިސްބަތްވާ ޓޫ-154 މަރުކާގެ ބޯޓެކެވެ.
މިހާތަނަށް ލިބިފައިވާ މައުލޫމާތުން އެނގިފައިވާ ގޮތުގައި އެބޯޓުގައި ގާތްގަނޑަކަށް 70 މީހުން ތިބި ކަމަށް އެމާޖެންސީ މިނިސްޓްރީއާ ހަވާލާދީ ރަޝިއާގެ ނޫހެއްގައިވެ އެވެ.
ަބައެއް ނޫސްތަކުގައިވާ ގޮތުން ސޯޗީން ނައްޓާލިތާ ގާތްގަނޑަކަށް 20 މިނިޓު ތެރޭ ގެއްލުނު ބޯޓު ދަތުރު ކުރަމުން ދިޔައީ ސީރިއާގެ ލަޓަކިއާއަށެވެ.
މިދިޔަ ހަފްތާ ތެރޭގައި ވެސް ރަޝިއާގެ ޑިފެންސް މިނިސްޓްރީއަށް ނިސްބަތްވާ ބޯޓެއް ވެއްޓިފައިވެ އެވެ. ހޯމަ ދުވަހު ހިނގި އެހާދިސާގައި ބޯޓުގައި ތިބި 39 މީހުންގެ ތެރެއިން އެއްވެސް މީހަކު މަރުވެފައި ނުވި ނަމަވެސް 16 މީހަކަށް ސީރިއަސް އަނިޔާތައް ލިބިފައިވެ އެވެ. (އާރުޓީ)