24 Dec 2016, 21:43
ށ. ޅައިމަގުގައި އަންހެނެއްގެ މޫނަށް ކެމިކަލް ޖެހި މައްސަލާގައި ދެވަނަ މީހަކު ހައްޔަރު ކޮށްފި އެވެ.
އެ މައްސަލާގައި މިއަދު ވަނީ 23 އަހަރުގެ މީހަކުވެސް ހައްޔަރުކޮށްފަ އެވެ.
ފުލުހުންގެ މީޑިއާ އޮފިޝަން 'ސަން' އަށް ވިދާޅުވީ ކެމިކަލް ޖެހި މައްސަލައާ ގުޅިގެން ކޯޓު އަމުރެއްގެ ދެވަނަ މީހަކު ހައްޔަރުކޮށްފައިވާ ކަމަށެވެ. އެއީ 21 އަހަރުގެ ޒުވާނެއް ފުލުހުން ބުންޏެވެ.
ކެމިކަލް ޖެހި މައްސަލަ ފުލުހުން ބަލަމުންދާއިރު ޖަހާފައި ވަނީ ކޮން ކަހަލަ ކެމިކަލެއްކަން އަދި ވަނީ ސާފުވާގޮތް ނުވެފަ އެވެ.
މިއަދު ފަތިހު ހިނގި އެ ހާދިސާގައި ކެމިކަލް ޖަހާފައި ވަނީ ޅައިމަގު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސާ ހަލީމާ އާދަމްގެ މޫނަށެވެ.
އެ އަންހެން މީހާއަށް ކުޅުދުއްފުށީ ރީޖަނަލް ހޮސްޕިޓަލުގެ ވޯޑުގައި ފަރުވާ ދެމުންދާ އިރު، އެ ހޮސްޕިޓަލުގެ އޮފިޝަލަކު ސަން މިއަދު ވިދާޅުވީ ހަލީމާގެ ލޮލަށް ކެމިކަލްގެ އަސަރުކޮށްފައިވާ ކަމަށާއި ނަމަވެސް އޭނާގެ ހާލު ރަނގަޅު ކަމަށެވެ.