24 Dec 2016, 12:03
ބާސެލޯނާގެ އަޖެންޓީނާގެ ފޯވާޑް ލިއޮނަލް މެސީއަށް ކޮންމެ މަގާމަކަށް ވެސް ކުޅެވޭނެ ކަމަށާއި އޭނާ ވަރުގެ ކުޅުންތެރިއަކު ނެތް ކަމަށް ބާސެލޯނާގެ ކޯޗު ލުއިސް އެންރިކޭ ބުނެފި އެވެ.
ބާސާ ޓީވީއަށް ދިން ބަސްދީގަތުމެއްގައި އެންރިކޭ ބުނީ މެސީ ސެންޓަރ ބެކަށް ލީ ނަމަވެސް އެނާ ބީޓް ކުރެވޭނެ ފޯވާޑެއް ނުހުންނާނެ ކަމަށާއި މުޅި ޓީމުގައި ވެސް އެންމެ ރަނގަޅު ޑިފެންޑަރަށް އެނާ ވެގެންދާނެ ކަމަށެވެ.
"މެސީއަށް ކުޅެވޭނެ އޭނަ ބޭނުން ކޮންމެ މަގާމަކަށް ވެސް. އެހާ ގާބިލްކަން އެބަހުރި އޭނާގެ ކިބައިގައި. ހުނަރުގެ ގޮތުން ބެލި ނަމަވެސް އެވަރުގެ ކުޅުންތެރިއެއް އަދި އުފެދިފައެއް ނެތް. އެއީ ހަމަ ތަފާތު ކުޅުންތެރިއެއް،" އެންރިކޭ ބުންޏެވެ.
މެސީއަށް ތައުރީފްކޮށް އެންރިކޭ ވާހަކަ ދައްކާފައިވާ އިރު ފްރާންސް ފުޓްބޯޅަ މަޖައްލާއިން ހޮވި އަހަރުގެ މޮޅު ކުޅުބްތެރިޔާއަށްދޭ ބެލޯންޑިއޯ އެވޯޑް ވަނީ ވާދަވެރި ރެއާލް މެޑްރިޑްގެ ޕޯޗުގީޒް ފޯވާޑް ރޮނާލްޑޯ ހޯދައިފަ އެވެ. ނަމަވެސް އަދި ވެސް އެންމެ ގިނަ ފަހަރު ބެލޯންޑިއޯ ހޯދާފައި ވަނީ މެސީއެވެ. އެއީ ރޮނާލްޑޯއަށް ވުރެން އެއް އަހަރު އިތުރަށް ލިބި ޖުމްލަ ފަސްފަހަރު އެވޯޑް ހޯދައިގެންނެވެ.
"އިންޑިވިޖުއަލް އެވޯޑްގެ ގޮތުން ބެލިނަމަވެސް މެސީ ފަހަތަށް ޖައްސާލެވޭނެ ކުޅުންތެރިއެއް ނެތް. އެހެން ކަމުން މެސީ އާއި އެހެން ކުޅުންތެރިން އަޅާ ކިއުމަކީ ވެސް އަހަރެންނަށް ވަރަށް ޖޯކު ކަމެއް،" އެންރިކޭ ބުންޏެވެ.
އެންރިކޭ ވަނީ ބަސެލޯނާ ލީގްގައި މިހާރުއޮތް މަގާމާއި ގުޅޭ ގޮތުން ވެސް ވާހަކަ ދައްކައިފަ އެވެ. ލީގްގެ އެއްވަނާގައި ބާސެލޯނާއަށް ވުރެން އެއް މެޗު މަދުން ކުޅެ ތިން ޕޮއިންޓްގެ ލީޑަކާ އެކު ރެއާލް މެޑްރިޑްއޮތް އިރު އެންރިކޭ ބުނީ ކުރިއަށް ވަރަށް ގިނަ މެޗުތައް އެބަހުރި ކަމަށާއި ލީގްއާ މެދު ކުރާ އުންމީދު އެއްވެސް ވަރަކަށް ފަނޑު ނުވާ ކަމަށެވެ.