23 Dec 2016, 11:21
ހއ. އިހަވަންދޫގައި އުމުރުން ދުވަސްވީ އަންހެނަކު މިއަދު ދަންޖެހިގެން މަރުވެއްޖެއެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ، އިހަވަންދޫގައި އުމުރުން 64 އަހަރުގެ މީހަކު ދަންޖެހިގެން މަރުވެފައިވާ ކަމުގެ މައުލޫމާތެއް މިއަދު ހެނދުނު 8:30 ކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
އަދި އޭނާގެ ހަށިގަނޑު މިހާރު އެރަށު ސިއްހީ މަރުކަޒަށް ގެންގޮސްފައިވާ ކަމަށް އޮފިޝަލު ވިދާޅުވިއެވެ. ނަމަވެސް މައްސަލަ ތަހުގީގު ކުރަމުންދާތީ އިތުރު ތަފްސީލެއް ނުދެއްވައެވެ.
މައުލޫމާތު ލިބިފައިވާ ގޮތުގައި މަރުވެފައިވަނީ އެރަށު މަތިވައްގެ، ފަރީދާ ހަސަން ނަމަކަށް އަންހެނެކެވެ. ނަފުސާނީ ބަލިކަމެއް ހުންނަ އެ މީހާ މީގެ ކުރީންވެސް ދަންޖެހިގެން މަރުވާން އޭނާ މަސައްކަތްކުރި ކަމަށްވެސް ސަން އަށް ވަނީ މައުލޫމާތު ލިބިފައެވެ.