22 Dec 2016, 12:35
އަންމާން (ޑިސެމްބަރު 22) : އުރުދުންގެ ސަލަފީ ޖިހާދީ ފިކުރުގެ މަޝްހޫރު ލީޑަރެއް ކަމަށްވާ އަބޫ ސައްޔާފް، އައިއެސް ޖަމާއަތަށް ބަހުގެ ޙަމަލާތަކެއް ދީފި އެވެ.
އުރުދުންގައި ދިން ބަޔާނެއްގައި އަބޫސައްޔާފްގެ ނަމުން މަޝްހޫރުވެފައިވާ މުހައްމަދު އައްޝަލަބީ ބުނީ އިސްލާމީ ރަނގަނޅު ޚިލާފަތެއް އިރާގާއި ސޫރިޔާގައި ގާއިމް ކުރުމުގެ ހުރިހާ ފުރުސަތުތަކެއް އޮތް ނަމަވެސް އައިއެސް ޖަމާއަތަށް އެކަން ނުކުރެވުނު ކަމުގަ އެވެ.
އައިއެސް އިން އިރާގާއި ސޫރިޔާގައި ގާއިމްކުރީ ހަގީގީ އިސްލާމީ ޚިލާފަތެއްނޫން ކަމަށާއި އެއީ ބަދަލުހިފުމުގެ ނިޒާމެއް (އެންޓިޓީއެއް) ކަމަށާއި އެ ނިޒާމު މިހާރު ވަނީ ބަލިކަށިވެ ރޫޅިގެންދިޔުމުގެ މަގުމަތީގައި ކަމަށް އަބޫ ސައްޔާފް ބުންޏެވެ.
އުރުދުންގެ އަލްކަރަކް ޕްރޮވިންސްގައި މިހަފްތާގައި ހިންގި ޓެރަރިސްޓް ޙަމަލާތަކެއްގައި 11 މީހުން މަރުވެ، 30 އަށް ވުރެ ގިނަ މީހުން ޒަޚަމްވެފައިވާ އިރު މީގެ ތެރޭގައި ގިނައީ އުރުދުންގެ ސަލާމަތީ ބާރުތަކުގެ މީހުންނެވެ. އެޓެރަރިސްޓް ޙަމަލާގެ ޒިންމާ އުފުލާފައި ވަނީ އައިއެސް ޖަމާއަތުންނެވެ. އެޙަމަލާ އުރުދުންއަށް ދިނީ އުރުދުންއަކީ އައިއެސްގެ ޚިލާފަތް ނައްތާލުމަށް ހަނގުރާމަކުރާ ސަލީބީ ގައުމުތަކަށް ވާގިވެރިވާ ގައުމަކަށް ވާތީ ކަމަށް އައިއެސް އިން ބުނެފައިވެ އެވެ.
އައި އެސް އިން ވަނީ އެޖަމާއަތުން ހައްޔަރުކުރި އުރުދުންގެ އަސީރަކު ދިރިހުއްޓައި އަލިފާނަށް ލައިގެން އަންދާލި މަންޒަރު ހާމަކޮށްފަ އެވެ. އައިއެސް އިން އުރުދުންއަށް ހަމަލާދިނީ އުރުދުންގައި އައިއެސްގެ ޚިލާފަތެއް ގާއިމް ކުރުމުގެ ވިސްނުމުގައި ކަމަށް ތުހުމަތު ކުރަމުން އަބޫސައްޔާފް ބުނީ އިސްލާމީ ރަނގަނޅު ޚިލާފަތެއް އިރާގާއި ސޫރިޔާގައި ގާއިމް ކުރުމުގެ ހުރިހާ ފުރްސަތުތަކެއް އޮތްވައި އެކަން ނުކުރެވުނު ޖަމާއަތަކަށް އުރުދުންގައި އެކަން ކުރެވޭނެ ކަމަށް ގަބޫލުނުކުރެވޭނެ ކަމުގައެވެ. އަދި އިސްލާމީ ޚިލާފަތް ގާއިމް ކުރަނީ މިފަދަ ޙަމަލާތައްދީގެން ނޫންކަމަށް ވެސް އަބޫ ސައްޔާފު ބުންޏެވެ.
އައިއެސް އާ ދެކޮޅަށް ދިން ބަޔާނުގައި އަބޫ ސައްޔާފު ވަނީ އައިއެސްއިން އެޖަމާއަތުން ނުދޭ ޓެރަރިސްޓް ޙަމަލާތަކުގެ ވެސް ޒިންމާ ނަގަމުން ގެންދާ ކަމަށާއި އެކަން ކުރަނީ އައިއެސްގެ ބާރު ދެއްކުމުގެ ގޮތުންނާއި ގާބިލްކަން ދެއްކުމުގެ ގޮތުން ކަމުގަ އެވެ.
ސަލަފީ ޖިހާދީ ފިކުރުގެ ބައެއް ލީޑަރުންނާއި އެފަދަ ޖަމާއަތްތަކަކީ އެއްބަޔަކު އަނެއް ބަޔަކާ ވަރަށް ދުޝްމަން ބައެކެވެ. މިގޮތުން ސޫރިޔާގައި ބައްޝާރުގެ ވެރިކަމާ ދެކޮޅަށް ހަނގުރާމަކުރާ އައިއެސްއާއި ޖަބްހަތުއްނުސްރާ އަކީ ވެސް އެދެ ޖަމާއަތް އެއްބަޔަކު އަނެއް ބަޔަކާ ދެކޮޅަށް ތަޅާފޮޅާ ދުޝްމަން ދެ ޖަމާއަތެވެ. އަދި އައިއެސް އާއި އަލްގާއިދާ އަކީ ވެސް އެހާ ހަތުރުވެރި ދެ ޖަމާއަތެވެ. އަދި ތާލިބާނުންނާއި އައިއެސް އަކީ ވެސް ވަރަށް ހަތުރުވެރި ދެ ޖަމާއަތެވެ.
ސޫރިޔާގެ ހަނގުރާމައިގާ ބައްޝާރުގެ ވެރިކަން ވައްޓާލުމަށް ހަނގުރާމަކުރާ އެތައް ސަތޭކަ ޖަމާއަތެއް އޮންނަ އިރު މީގެތެރޭގައި ހިމެނޭ ސަލަފީ ޖިހާދީ ފިކުރުގެ ޖަމާއަތްތަކަކީ އެއްޖަމާއަތް އަނެއް ޖަމާއަތް ކާފަރުކޮށް އެއްޖަމާއަތް އަނެއް ޖަމާއަތް ނައްތާލުމަށް ޓަކައި ތަޅާފޮޅަމުން ގެންދާ ޖަމާއަތްތަކެކެވެ. އުރުދުންގެ ސަލަފީ ޖިހާދީ ފިކުރުގެ ލީޑަރު އަބޫ ސައްޔާފްއަކީ ވެސް އައިއެސް އާ އިދިކޮޅު ލީޑަރެކެވެ. (ނޫސްއެޖެންސީތައް)