22 Dec 2016, 09:42
އޮއްވަޅުގޮނޑިއެއް ފަދަ މާލޭގެ މަގުތައް މަރާމާތު ކުރަން ފަށާފައިވާ އިރު އަނެއްކާ ވެސް ފެންނަނީ ކުރިއެކޭ އެއްގޮތަށް ގާއަތުރައިގެން އެ މަސައްކަތް ކުރާތަނެވެ. މާލޭގެ މަގުތައް ގަދަ ކަނޑުތަކުގެ ބާންޏަށް ބަދަލުވެ ފެން ނުހިނދެން ދިމާވާ މައިގަނޑު މަގުސަދަކީ މަގުތަކުގައި އަތުރާފައިވާގާތަކުގެ މައްސަލަ އެވެ.
ބޮޑުތަކުރުފާނުމަގުގެ ބައެއް ފިޔަވައި މާލޭގެ ދެން ހުރިހާ މަގެއްގައި ގާއަތުރާފައިވާ އިރު އަބަދުހެން ކަހަލަ ގޮތަކަށް ކޮންމެވެސް މަގަކުން ގާތައް ނައްޓައި މަގުތައް ކޮނެ ހަދަ އެވެ. އެއީ އެކި ބޭނުންތަކަށް މަގުތަކުގައި ވަޅުލާފައިވާ ހޮޅިތަކާއި ކޭބަލްތައް މަރާމާތު ކުރުމަށެވެ. މަސައްކަތް ނިންމައި ގާތައް އަތުރާއިރު މަގުތަކުގެ ހަމަހަމަކަން ގެއްލެނީ އެވެ. މިހާރު ހަދާމަގުތަކުގައި ވެސް ގާއަތުރާއިރު ހަމަ އެކަން ތަކުރާރުވާނެތާ އެވެ.
މާލޭ މަގުތައް ރަނގަޅު ފެންވަރެއްގައި ހެދުމުގެ މަޝްރޫއުގެ ދަށުން މަޖީދީމަގުގައި ޖަހާފައި ހުރި ގާތަށް ނަގާ މަގު އެއްވަރު ކުރަނީ: ފޮޓޯ/ ހައުސިން މިނިސްޓްރީ
ގިނަ ބައެއްގެ އެކަންބޮޑުވުމަށް ޖަވާބު ދެއްވަމުން ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ މަގުމަތީގައި ދުއްވާބައި އެކި މަސައްކަތްތަކަށް ގާތައް ނަގަން ޖެހޭނެ ކަމަށާއި ނަމަވެސް ކުރިއަށް ވުރެ ހަރުކަށި ގޮތަކަށް އެކަންކަން ބަލަހައްޓާނެ ކަމަށެވެ. ގާނަގައިގެން ކުރާ މަސައްކަތަށް ފަހު ހައުސިން މިނިސްޓްރީން ދީފައިވާ ގައިޑްލައިނަކަށް މަގުތައް ހަމަހަކޮށް ގާއަތުރަން ޖެހޭނެ ކަމަށް މިނިސްޓަރު ވިދާޅުވި އެވެ.
"އެކަމުގައި އުޅޭ ފަރާތްތަކަށް ވެސް މިދަނީ އަންގަމުން، މައިގަނޑު ގޮތެއްގައި މިކަހަލަ މަސައްކަތް ކުރާ ކުންފުނިތަކާއި އަޅުގަނޑުމެން ވާހަކަ ދައްކަމުން މިދަނީ އަޅުގަނޑުމެން މިންގަނޑެއްދީ އަޅުގަނޑުމެން ބުނާ ގޮތަކަށް މިސާލަކަށް މަގުމަތީގައި ހޮޅިއެއްވަޅުލަން ކޮންނަން ޖެހުނަސް، ކޮނެފައި އަލުން ކޮންޕެކްޓުކޮށްފައި އަލުން ލެވަލްކޮށް ގާ އަތުރާގޮތަށް،" މިނިސްޓަރު ވިދާޅުވި އެވެ.
ޕޭވްމެންޓުން ގާ ނެގުމަށް ނިމުމެއް!
މަރާމާތު ކުރާ 11 މަގުގެ އަޑީގައި ވަރަށް ފުންކޮށް ވަޅުލާފައި ހުރި ކޭބަލްތައް އުސް ކުރުމަށް ވަނީ ހަމަޖެހިފަ އެވެ. މިކަން ކުރުމުން، ކޭބަލް ޖަންކްޝަންގެ މަތިގަނޑު ހުންނާނީ ޕޭވްމަންޓުގަ އެވެ. ޕޭވްމަންޓް ކޮންނާކަށް ނުޖެހޭނެ އެވެ. ޕޭވްމަންޓުގައި ޖަހަން ނިންމާފައި ވަނީ، ހުޅުމާލޭގެ ޕޭވްމަންޓުތަކުގައި ވެސް ހުންނަ ފަދަ، އެއް އަކަފޫޓުގެ ގަލެވެ.
މިނިސްޓަރު ވިދާޅުވީ މިހާރު ހަދަމުންދާ މަގުތަކުގެ ޕޭމަންޓް ގާތައް ނަގައި ކުރަން ޖެހޭ މަސައްކަތްނުކޮށް އެކަންކަން ހަމަޖެހޭނެ އުސޫލެއް ހަމަޖައްސާފައިވާ ކަމަށެވެ.
"އެކިއެކި ކޭބަލްތައް އަޅާފަރާތްތަކަށް ވެސް މިހާރު ވަރަށް ފަސޭހަ ވާނެ، މިހާރު ނުޖެހޭނެ ޕޭމަންޓުގެ ގާތައް ނަގާކަށެއް، ޕޭމަންޓް ގަލުގެ ލެވަލްއަށް މިހާރު ވާނީ ހުރިހާ ކޭބަލް ޖަންގުޝަންތަކެއް އުސްކޮށްފައި، މަތިގަނޑު އެކަނި އުފުއްލާލާފައި މިހާރު މަސައްކަތް ކުރެވޭނެ،" މިނިސްޓަރު ވިދާޅުވި އެވެ.
ހައުސިންގް މިނިސްޓަރު ޑރ. މުހައްމަދު މުއިއްޒު -- ސަން ފޮޓޯ/ފަޔާޒު މޫސާ
އަލަށް ހަދާމަގުތައް އެއްވަރުކޮށްގެން ގާއެތުރުމާއި "ސުޓޯމް ވޯޓާ ޑުރެއިނިޖު ސިސްޓަމެއް" ގާއިމް ކުރެވިގެންދެ އެވެ. މަޖީދީމަގުގައި އެންމެ ބޮޑަށް ފެންބޮޑުވާ ސަރަހައްދުކަމަށްވާ މާފަންނު ސަހަރާގެ ހުޅަނގަށް އޮތް ސަރަހައްދަށް ދިމާވާ މައްސަލަ އެއާ އެކު ހައްލުވާނެކަމަށްބެލެވެ އެވެ. ހަމައެއާ އެކު ކާނުތައް ބެދުން ފަދަ މައްސަލަތައް ހައްލުވާނެ ކަމަށް ބެލެވެ އެވެ.
"ކުރިއަށް ވުރެ މާ އަވަސްވާނެ ފެން ހިނދޭލެއް، މިހާރު އެހެރީ މުޅިންއާ ޑުރެއިނޭޖް ސިސްޓަމެއް ގާއިމްކުރެވިފައި، ކުރިއަށް ވުރެ ކާނުތަކުގެ ސައިޒު ވެސް ބޮޑުވާނެ، އަދި އެއް ކާނުން އަނެއްކާނަށް ގުޅާލެވިފައިވާ ހޮޅިތައް ވެސް ބޮޑެތިވާނެ،" މިނިސްޓަރު ވިދާޅުވި އެވެ.
މަގުތަކަށް އަންނާނެ ތަރައްގީ
މިދައުރު ނިމެންވާއިރަށް މާލޭގެ 13 މަގެއް މަރާމާތު ކުރުމުގެ މަސައްކަތް ކުރުމަށް ސަރުކާރުން ނިންމާފައި ވަނީ، މަގުގައި ހުރި ގާތައް ނެގުމަށް ފަހު، ލެވެލް ކޮށްގެންނެވެ. ހުރިހާ މަގެއް ލެވެލް ކުރުމުން، ބައެއް މަގުތައް އުސްވުން ފަދަ މައްސަލަތައް ނެތިގެން ދާނެ އެވެ. އަދި ތިރިކޮށް ހުންނަ މަގުތަކުގައި ފެންބޮޑުވާ މައްސަލައަށް ވެސް ހައްލެއް ލިބޭނެ އެވެ.
މަޖީދީ މަގު---ސަން ފޮޓޯ: މުހައްމަދު އަފްރާހް
މަގުތައް އަލުން ހަދާ އިރު، ހަދަނީ ނުކުޅެދުންތެރިކަން ހުންނަ މީހުންނަށް ޕޭވްމެންޓުތަކަށް އެރޭނެ ގޮތަކަށެވެ. ފުރޮޅުލީ ގޮނޑީގައި އުޅޭ ފަރާތްތަކަށް ޕޭވްމަންޓުން އަރައި ފޭބުމަށް ރޭމްޕު ހެދޭނެ އެވެ.
މަގުތައް އަލުން ހަދާއިރު މަގުގައި ފަޔާ ހައިޑްރަންޓު ޖަހަން ވަނީ ނިންމައިފަ އެވެ. ފަޔާ ހައިޑްރަންޓަކީ އަލިފާނުގެ ހާދިސާއެއް ހިނގައިފި ނަމަ އަލިފާން ނިއްވުމަށް މަސައްކަތް ކުރާ ފަރާތްތަކަށް ފެން ލިބޭނެ ކަނެކްޝަން ޕޮއިންޓެކެވެ. ރަށުގެ މެދުތެރޭގައި މިފަދަ ހާދިސާއެއް ހިނގައިފި ނަމަ، މޫދާ ހަމައަށް ހޮޅި އަޅައިގެން އަލިފާން ނިއްވުމުގެ މަސައްކަތް ކުރާ ކުރުމަށް ނިމުމެއް އައިސް، އެ މަސައްކަތަށް ފަސޭހަކަމެއް ލިބިގެން ދާނެ އެވެ.
ގާތައް ނަގައިގެން މަސައްކަތް ކުރަން ޖެހޭ އިރު މިހާރުގެ ހާލަތަށް އަނެއްކާ ވެސް މަގުތައް ވެއްޓޭނެ ކަމަށް ގަބޫލުކުރެވެ އެވެ. ނަމަވެސް ހަރުދަނާ މޮނީޓަރިން ނިޒާމެއް ގެންގުޅޭ ނަމަ އެކަންކަމަށް ހައްލު އަންނާނެ އެވެ. ހައުސިން މިނިސްޓްރީން ބުނަނީ ހަރުދަނާ އުސޫލެއްގެ މަތިން މޮނީޓާ ކުރާނެ ކަމަށެވެ.