17 Dec 2016, 18:03
އަންކަރާ (ޑިސެމްބަރު 17) : ތުރުކީގެ މެދުތެރޭގެ ރަށެއްކަމަށްވާ ގައިސަރީގައި ބާރުގަދަ ބޮމެއް ގޮއްވާލުމުގެ ސަބަބުން 13 މީހުން މަރުވެ 55 މީހުން ޒަޚަމްވެއްޖެއެވެ.
ތުރުކީ ސިފައިންނަށް އަމާޒުކޮށްގެން މިހަމަލާދިނުމަށް ބޭނުންކޮށްފައިވަނީ ކާރުބޮމެއްކަމަށް ބެލެވޭކަމަށް ތުރުކީ ސިފައިންގެ ތަރްޖަމާނަކު ވިދާޅުވިއެވެ. މިހަމަލާގައި މަރުވެ އަދި ޒަޚަމްވި މީހުންގެ ތެރޭގައި ގިނައީ ސިފައިންނެވެ. އަދި ހަލާކުވެފައިވެސްވަނީ ސިފައިން ދަތުރުކުރަން ބޭނުންކުރާ ބަހެކެވެ.
މިހަމަލާ ދީފައިމިވަނީ ތުރުކީގެ އެންމެ ބޮޑު ސިޓީ ކަމަށްވާ އިސްތަންބޫލުގެ ފުޓުބޯޅަ ސްޓޭޑިއަމްއެއް ކައިރީގައި މިދިޔަ އަދީއްތަ ދުވަހު ދިން ބޮމުގެ ދެ ހަމަލާއެއްގައި 29 މީހަކު މަރުވެ، 166 މީހަކު ޒަޚަމްވެފައިވަނިކޮށެވެ. ސްޓޭޑިޔަމްގެ ކައިރީގައި ދިން ޙަމަލާގެ ޒިންމާ އުފުލާފައިވަނީ ކުރުދީންގެ ހަނގުރާމަވެރި ޖަމާއަތެއް ކަމަށްވާ ޕީކޭކޭ ޖަމާއަތުންނެވެ.
ޕީކޭކޭ އަކީ ތުރުކީގެ ބައިމަދު ކުރުދީ ދަރިކޮޅުގެ މީހުންގެ ސިޔާސީ އަދި މަދަނީ ހައްގުތައް ހިމާޔަތް ކުރުމަށާއި ކުރުދީންގެ ސަރަހައްދުގައި ލާމަރުކަޒީ ވެރިކަމެއް ގާއިމްކޮށް ދިނުމަށް މަސައްކަތްކުރާ ޖަމާއަތެކެވެ. ތުރުކީ ސިފައިން ގެންދަނީ އެޖަމާއަތާ ދެކޮޅަށް ވަރުގަދައަށް ހަނގުރާމަ ކުރަމުންނެވެ. ތުރުކީ ސިފައިން ޕީކޭކޭ އަށް ދޭ ޙަމަލާތަކުގެ ރައްދުގައި ޕީކޭކޭގެ ހަނގުރާމަވެރިން މިހާރު ވަނީ އަމިއްލައަށް މަރުވެގެންދޭ ޙަމަލާތަކާއި ކާރުބޮން ފަދަ ބޮންތައް ބޭނުންކޮށްގެން ދޭ ޙަމަލާތައް ވަރުގަދަ ކޮށްފައެވެ.
މިކަމުގެ ބޭނުމަކީ ތުރުކީގެ އިގްތިސާދުގައި ހިމެނޭ ބޮޑު ސެކްޓަރެއްކަމަށްވާ ޓޫރިޒަމްގެ ސެކްޓަރު ހަލާކުކޮށްލުން ކަމަށް ވަނީ ބެލެވިފައެވެ. މިއަހަރުގެ ކުރީކޮޅުގައާއި މިދިޔަ އަހަރުވެސް ތުރުކީގެ އިސްތަންބޫލްއާއި އަންކަރާއާއި އެނޫން ސިޓީތަކަށްވެސް ޕީކޭކޭގެ ހަނގުރާމަވެރިން އަމިއްލައަށް މަރުވެގެންނާއި ކާރުބޮން ގޮއްވާލައިގެން އެތަށް ހަމަލާތަކެއްދީ އެތަށް ސަތޭކަ ބަޔަކު މަރާލާފައިވެއެވެ. ތުރުކީގެ މެދުތެރޭގެ ރަށެއްކަމަށްވާ ގައިސަރީގައި މިއަދު ގޮއްވާލި ބާރުގަދަ ބޮމުގެ ހަމަލާގެ ފަހަތުގައިވާ ފަރާތެއް އަދި ސާފުވެފައެއް ނުވެއެވެ. އަދި މިހަމަލާގެ ތުހުމަތު އެއްވެސް ފަރާތެއްގެ މައްޗަށް ތުރުކީ ސަރުކާރުން ކޮށްފައެއް ނުވެއެވެ.
ނަމަވެސް މިހަމަލާގެ އަމާޒަކީ ތުރުކީ ސިފައިން ކަމަށްވާތީ މިއީވެސް ޕީކޭކޭގެ ހަނގުރާމަވެރިން ގެ ހަމަލާއެއްކަމަށް ބެލެވޭކަމަށް ތުރުކީގެ މީޑިޔާ ބުނެއެވެ. ތުރުކީގައި ހިންގާ ބޮންގޮއްވުމުގެ ޙަމަލާތަކުގައި އައިއެސް ޖަމާއަތްވެސް ބައިވެރިވެއެވެ. އައިއެސްއިންވެސް އިސްތަންބޫލްއާއި އަންކަރާފަދަ ބޮޑެތި ސިޓީތަކުގައި އަމިއްލައަށް މަރުވުމުގެ އެތަށް ޙަމަލާތަކެއް ހިންގާފައިވެއެވެ. (ބީބީސީ)