15 Dec 2016, 21:25
މުޅި ރާއްޖެއަށް 4ޖީ އެލްޓީއީގެ ހިދުމަތް ފޯރުކޮށްދިނުމުގެ އަމާޒާއެކު ދިރާގުން ކުރިއަށްގެންދާ ބޮޑު މަޝްރޫއުގެ ދަށުން ދުނިޔޭގެ ފުންނާބު އުސް ދެ ކުންފުންޏެއް ކަމަށްވާ ނޮކިޔާ އަދި ވާވޭ އާއެކު އެއްބަސްވުމަކަށް އައިސްފިއެވެ.
މިއަދުވި ދެ އެއްބަސްވުމާއެކު އަންނަ އަހަރު ނިމުމުގެ ކުރިން މުޅި ރާއްޖެއަށް 4ޖީގެ ޒަމާނީ ހިދުމަތް ފޯރުކޮށްދިނުމަށް ބޭނުންވާ ސިސްޓަމްތަކާއި އެހެނިހެން އާލާތްތައް ހޯދުމުގައި އެ ދެ ކުންފުނިން ވަރަށް ބާރުމިނުގައި ކުރިއަށް ގެންދާނޭ ކަމަށް ދިރާގުން ބުނެއެވެ.
ދިރާގާއެކު މިއަދު ސޮއިކުރި ވާވޭ ކުންފުންޏަކީ ދުނިޔޭގެ އެކި ކަންކޮޅުތަކުގައި މުއާސަލާތީ ހިދުމަތް ފޯރުކޮށްދިނުމަށް އެންމެ ޒަމާނީ މުއާސަލާތީ ނެޓްވޯކް ތައް ގާއިމް ކުރަމުން އަންނަ މަޝްހޫރު ކުންފުންޏެކެވެ.
މުއާސަލާތީ އިންފްރާސްޓްރަކްޗާއާއި އެންމެ ޒަމާނީ ޓެކްނޮލޮޖީ ދުނިޔޭގެ ބާޒާރަށް ނެރުމުގެ އިތުރުން އޮޕަރޭޝަނަލް އަދި ކޮންސަލްޓެންސީ ހިދުމަތްވެސް ފުޅާ ދާއިރާއެއްގައި ދެމުންއަންނަ އެއް ކުންފުންޏަކީ ވެސް ވާވޭއެވެ.
ދިރާގުން ސޮއިކުރި އަނެއް ކުންފުނި، ނޮކިޔާ އަކީ މަޝްހޫރު ފޯނު އެފައްދާ ކުންފުންޔަކަށް ވީހިނދު މިހާރު ނޮކިޔާގެ އަމާޒު ހުރީ ޓެލެކޮމިއުނިކޭޝަންސް އިންފްރާސްޓްރަކްޗަރު ކުރުމުގެ ވިޔަފާރިއަށެވެ.
މުޅި ރާއްޖެއަށް 4ޖީގެ ހިދުމަތް ދިނުމަށް ދިރާގުން ނޮކިޔާއާއެކު އެއްބަސްވުމުގައި ސޮއިކުރި ހަފްލާގެ ތެރެއިން --- ފޮޓޯ/ ދިރާގު
"މިފަދަ ތަޖުރިބާކާރު އަދި އެންމެ ފަހުގެ ޒަމާނީ އުސޫލުތަކުގެ މަތިން ހިދުމަތް ފޯރުކޮށްދޭ ދެކުންފުންޏަކާއި އެކު ސޮއިކުރުން ރަމްޒުކޮށްދެނީ ދިރާގުން ދިވެހިރައްޔިތުންނަށް އެންމެ ފުރިހަމަ ހިދުމަތް ފޯރުކޮށްދިނުމަށް ދޭ އިސްކަމެވެ،" ދިރާގުން ނެރުނު ބަޔާނެއްގައި ބުނެފައިވެއެވެ.
މީހުން ދިރިއުޅޭ ހުރިހާ ރަށަކަށް 3ޖީ ބްރޯޑްބޭންޑުގެ ހިދުމަތް ފޯރުކޮށްދީ ރާއްޖެއަށް އެންމެ ފުރިހަމަ 3ޖީ ނެޓްވޯކެއް މުޅި ރާއްޖެއަށް ގާއިމްކޮށްދިން ދިރާގަކީ ރާއްޖޭގެ އެންމެ ފުޅާ 4ޖީ ނެޓްވާކު ކުރި ކުންޏެވެ.
އެގޮތުން އެ ކުންފުނިން މިހާރުވެސް ރާއްޖޭގެ އާބާދީގެ 60 ޕަސެންޓަށް 4ޖީ އެލްޓީއީގެ ހިދުމަތް ފޯރުކޮށްދެމުންދާއިރު، ރާއްޖޭގައި މުއާސަލާތީ ހިދުމަތްދޭ ކުންފުނިތަކުގެ ތެރެއިން އެ ލަނޑުދަނޑި ހާސިލުކޮށްފައިވާ ހަމައެކަނި ކުންފުންޏަކީވެސް ދިރާގެވެ.
ރާއްޖެއަށް 4ޖީގެ ހިދުމަތް ތައާރަފުކުރުމަށްފަހު އަތޮޅުތަކަށް އެ ހިދުމަތް ފުޅާކުރުމުގެ މަޝްރޫއު ގެދަށުން މިހާރު ވަނީ ހއ. ދިއްދޫ، އައްޑޫ ސިޓީ، ޏ، ފުވައްމުލައް، ގއ. ވިލިނގިލި، ގދ ތިނަދޫ، ޅ. ނައިފަރު، ޅ.ހިންނަވަރު، ރ.ދުވާފަރު، ލ.މަތިމަރަދޫ، ލ.ތުނޑި، ނ.ވެލިދޫ، ދ.ކުޑަހުވަދޫ އަދި ހދ. ކުޅުދުއްފުށީގައިވެސް އެ ހިދުމަތް ރަސްމީކޮށް އިފްތިތާހުކޮށްފައެވެ.
ދިރާގަކީދިވެހިރާއްޖެ ބޭރުގެ ދުނިޔެއާއި އިންޓަނޭޝަނަލް ސަބްމަރިން ކޭބަލެއް މެދުވެރިކޮށް ގުޅުވާލަދިން އެންމެ ފުރަތަމަ ކުންފުނިވެސް މެއެވެ.