08 Dec 2016, 09:51
އަލްގުދުސް (ޑިސެމްބަރު 8): ސީރިއާގެ ހަލަބު ހިފުމަށް ކުރަމުންދާ ހަނގުރާމައިގައި ސަރުކާރުގެ ފައުޖުތަކުން ކާމިޔާބުވުން ވާނީ ސީރިއާ ހަނގުރާމަ ނިންމާލުމަށް އެޅޭ ބޮޑު ފިޔަވަޅަކަށް ކަމަށް ރައީސް ބައްޝާރުލް އައްސަދު ވިދާޅުވެއްޖެ އެވެ.
ރައީސް އައްސަދު އެފަދައިން ވިދާޅުވެފައި ވަނީ ސީރިއާގެ އަލް ވަތަން ނޫހަށް ދެއްވި އިންޓަވިއުއެއްގަ އެވެ.
"ސަރުކާރުގެ ބާރުގެ ދަށަށް ހަލަބު ގެނައި ނަމަވެސް ސިރިއާ ހަނގުރާމަ ނިމުމަކަށް ނާންނާނެ. ނަމަވެސް އެއީ ހަނގުރާމަ ނިންމާލުމަށް ބޮޑު ފިޔަވަޅަކަށް ވާނެ،" އައްސަދު ވިދާޅުވި އެވެ.
ސީރިއާ ސަރުކާރުގެ ފައުޖުތަކުން ހަލަބު ހިފުމަށް ޓަކައި މެދުކެނޑުމެއްނެތި ތިން ހަފްތާ ވަންދެން ދެމުންދާ ހަމަލާތަކުގައި ވަނީ އިރުމަތީ އަލެއްޕޯގެ 80 ޕަސެންޓު ހިފައިފަ އެވެ.
އަދި އިރުމަތީ އަލެއްޕޯގެ ކުޑަ ސަރަހައްދަކަށް ފަހަތަށް ޖައްސާލާފައިވާ އިދިކޮޅު ފަރާތްތަކުން ވަނީ އެސަރަހައްދުގައި ތިބި އާއްމުން އެހެން ސަރަހައްދަކަށް ދިޔުމަށް ފުރުސަތު ދިނުމަށް ޓަކައި ފަސް ދުވަހަށް ހަމަލާ ބަދަލު ކުރުންތައް ހުއްޓާލުމަށް އެދިފަ އެވެ.
ނަމަވެސް ރައީސް އައްސަދު ވަނީ ސަރުކާރުގެ ފައުޖުތަކުން ހަމަލާ ދިނުން ހުއްޓާނުލާނެ ކަމަށް ވިދާޅުވެފަ އެވެ. އަދި ހަލަބްގައި ހިނގަމުންދާ ހަނގުރާމަ ވަގުތީ ގޮތުން ހުއްޓާލުމާ ބެހޭ ގޮތުން އދ.ގެ ސަލާމަތީ މަޖިލީހަށް ހުށަހެޅި ގަރާރެއް ރަޝިޔާ އާއި ޗައިނާއިން ވަނީ ވީޓޯކޮށްފަ އެވެ. (ބީބީސީ)