05 Dec 2016, 09:33
ރޯމް(ޑިސެމްބަރު 5): އިޓަލީގެ ގާނޫނު އަސާސީއަށް ބައެއް ބަދަލު ގެނައުމަށްޓަކައި ބޮޑުވަޒީރު މެތިއު ރެންޒީގެ ސަރުކާރުން ރައްޔިތުންނަށް ހުށަހެޅި ފެންނަ ނުފެންނަ ވޯޓު ނާކާމިޔާބުވުމާ ގުޅިގެން އިސްތިއުފާ ދެއްވުމަށް އޭނާ ނިންމަވައި އެކަން އިޢުލާން ކުރައްވައިފިއެވެ.
ވޯޓުގެ ނަތީޖާ އިޢުލާންކުރުމަށްފަހު ރެންޒީ ވިދާޅުވީ، ހޯމަދުވަހުގެ (މިއަދުގެ) ވަގުތެއްގައި އިސްތިއުފާގެ ސިޓީ އިޓަލީގެ ރައީސްގެ އަތްޕުޅަށް އަރުވާނެ ކަމުގައެވެ. އިޓަލީގެ ގާނޫނު އަސާސީއަށް ގެނައުމަށް ރެންޒީ ހުށަހެޅުއްވި ބަދަލަކީ އެގައުމުގެ ސެނެޓަށް ދީފައިވާ ބާރުތައް ކުޑަކުރުމާއެކު ޕްރޮވިންސްތަކަށް ދީފައިވާ ބާރުތަކުގެ ތެރެއިން ބައެއް މަރުކަޒީ ސަރުކާރުގެ ދަށަށް ގެނައުމުގެ އިސްލާހެވެ. މިއިސްލާޙީ ބަދަލުތައް ގެނައުމުން އިޓަލީއަށް އިތުރު ހަމަޖެހުން ލިބޭނެ ކަމަށް ރެންޒީއާއި އޭނާގެ ޓީމުން ދެކެއެވެ. ނަމަވެސް އިދިކޮޅު ފަރާތްތަކުންވަނީ މިއީ ޑިމޮކްރަސީއާ އިދިކޮޅު ކަމެއް ކަމަށް ސިފަކޮށްފައެވެ.
ރެންޒީ ހުށަހެޅުއްވި ދަސްތޫރީ އިސްލާހަށް ތާއީދުކޮށްފައިވަނީ ފެންނަ ނުފެންނަ ވޯޓުގައި ބައިވެރިވި ރައްޔިތުންގެ ތެރެއިން 44 އިންސައްތަ މީހުންނެވެ. އަދި މިއިސްލާހާ ދެކޮޅަށް 54 އިންސައްތަ މީހުން ވޯޓު ދީފައިވާކަމަށް ވެއެވެ. ރެންޒީގެ އިސްތިއުފާއާއެކު އިޓަލީ އަނެއްކާވެސް ސިޔާސީ ހަލަބޮލިކަމެއްގެ ތެރެއަށް ވެއްޓިގެން ހިނގައިދާނެކަމަށް އެގައުމުގެ ސިޔާސީ ފަރާތްތަކުން ލަފާކުރެއެވެ.
އިޓަލީއަކީ ފާއިތުވި އަހަރުތަކުގައި ސިޔާސީ ހަލަބޮލިކަން ބޮޑު ގައުމެކެވެ. އިންތިޚާބު ކުރާ އެއްވެސް ސަރުކާރެއް މާގިނަދުވަހު ދެމިނޯންނައިރު އަވަސް އަވަހަށް ޕާލަމެންޓް އުވާލައި އާންމު އިންތިޚާބުތައް ބާއްވަން ޖެހިފައިވުމުގެ ސަބަބުން ގައުމުގެ އިގްތިސާދަށް ހީނަރުކަން އައިސްފައިވެއެވެ. ނަމަވެސް މީގެ ދެއަހަރު ކުރިން ރެންޒީ ބޮޑުވަޒީރުކަމާ ހަވާލުވެ ވަޑައިގެންނެވި ފަހުން ސިޔާސީ މިހަލަބޮލިކަން ކުޑަވެފައިވެއެވެ. (ރޮއިޓާސް)