04 Dec 2016, 17:28
އައްޑޫ ސިޓީގެ ގަން އިންޓަނޭޝަނަލް އެއާޕޯޓަށް ބައިނަލްއަގުވާމީ ތާވަލު ދަތުރުތައް ފެށުމާއި އެކު، ދެކުނުގެ އަތޮޅުތަކުގައި ހުރި އެއާޕޯޓުތަކާއި ގަން އިންޓަނޭޝަނަލް އެއާޕޯޓާ ގުޅުވާލުމުގެ މަސައްކަތް ފެށުމަށް ގައުމީ އެއާލައިން މޯލްޑިވިއަންއިން ނިންމައިފިއެވެ.
މިދިޔަ ބުރާސްފަތި ދުވަހު ސްރީލަންކަން އެއާލައިންސްއިން ވަނީ އައްޑޫ ސިޓީގެ ގަމާއި ސްރީލަންކާގެ ކޮލޮމްބޯއާ ދެމެދު ސީދާ ދަތުރުތައް ފަށައިފައެވެ. ސްރީލަންކާގެ ކޮލޮމްބޯއަކީ ދެކުނު އޭޝިއާ ސަރަހައްދުގެ ޓްރާންސިޓް މައި ނާރެހަކަށް ވާ އިރު، މާލެ ނައިސް އައްޑޫ ސިޓީގެ ގަމުން ފުރައިގެން ސްރީލަންކާއަށް ގޮސް، ދުނިޔޭގެ ކޮންމެ ދިމާލަކަށް ވެސް މިހާރު ދެވޭނެއެވެ.
ރާއްޖޭގައި އެންމެ ފުޅާ ދާއިރާއެއްގައި ޑޮމެސްޓިކް އޮޕަރޭޝަންތައް ހިންގާ، ގައުމީ އެއާލައިން މޯލްޑިވިއަންގެ މެނޭޖިންގް ޑިރެކްޓަރ އަބްދުލްހާރިސް މިއަދު "ސަން" އަށް ވިދާޅުވި ގޮތުގައި، އެ އެއާލައިނުން ވަނީ ދެކުނުގެ އަތޮޅުތަކާ އައްޑޫ ސިޓީއާ ވައިގެ ދަތުރުފަތުރުން ގުޅާލުމަށް ނިންމައިފައެވެ.
ހާރިސް ވިދާޅުވީ، މި މަހުގެ ތެރޭގައި އެކަމުގެ މަސައްކަތް ފަށާނެ ކަމަށާއި، ޖެނުއަރީން ފެށިގެން އެ އަތޮޅުތަކަށް ގަން އިންޓަނޭޝަނަލް އެއާޕޯޓަށް ވައިގެ ދަތުރުފަތުރުގެ ކަނެކްޓިވިޓީ ފޯރުކޮށްދޭނެ ކަމަށެވެ.
"އެކަން ޕްލޭން ކޮށްފައި އޮންނާނީ. އެ މަސައްކަތް މި މަހު ފަށާނަން. ޖެނުއަރީއިން ފެށިގެން ގަމަށް ކަނެކްޓިވިޓީ ދޭނަން،" ހާރިސް ވިދާޅުވިއެވެ.
ހާރިސް ވިދާޅުވި ގޮތުގައި، ރާއްޖޭގެ ދެކުނުން އިންޓަނޭޝަނަލް ފްލައިޓުތައް ފެށުމަކީ މޯލްޑިވިއަންއިން ވެސް ހިތްވަރުދޭ، އަދި މަރުހަބާ ކިޔާ ކަމެކެވެ.
ރާއްޖޭގެ ދެކުނުން ބައިނަލްއަގުވާމީ ފްލައިޓުތަކަށް ވާސިލުވުމަށް ދެކުނުގެ ރައްޔިތުންނަށް މޯލްޑިވިއަނުން އެހީތެރިވެދިނުމަށްޓަކައި ދެކުނުގެ އެއާޕޯޓުތަކާ ގަމާ ދެމެދު ދަތުރުކުރަން މޯލްޑިވިއަނުން ނިންމާފައިވާ އިރު، ރާއްޖޭގެ އުތުރުގައި އޮންނަ ހަނިމާދޫ އިންޓަނޭޝަނަލް އެއާޕޯޓުގައި ހިންގާ ހަމައެކަނި ބައިނަލްއަގުވާމީ އޮޕަރޭޝަނަކީ މޯލްޑިވިއަނުން ހަނިމާދޫއާ އިންޑިއާގެ ޓްރިވެންޑްރަމާ ދެމެދު ކުރާ ދަތުރުތަކެވެ.
"މިކަމުން ރާޢްޖޭގެ ސައުތަށް ވެސް އަންނަނީ އިންޓަނޭޝަނަލް ކަނެކްޓިވިޓީ. ރާއްޖޭގެ ނޯތުން، ހަނިމާދޫއިން ވެސް އަޅުގަނޑުމެން ފޯރުކޮށްދެން އިންޓަނޭޝަނަލް ކަނެކްޓިވިޓީ،" ހާރިސް ވިދާޅުވިއެވެ.