03 Dec 2016, 12:08
އޭޝިއަން ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން ސްރީ ލަންކާ އަށްކުރި ތަމްރީން ދަތުރުގެ ތެރެއިން ރާއްޖޭގެ ގައުމީ ވޮލީބޯޅަ ޓީމު ކުޅުނު ދެވަނަ މެޗުގައި ވެސް ވާދަވެރި ކުޅުމެއް ދައްކައިފި އެވެ.
ރާއްޖޭން ކުޅުނު ތަމްރީން ދެވަނަ މެޗުގައި ސްރީލަންކާގެ އާމީ ފޯސްއާ ދެކޮޅަށް އިއްޔެ ކުޅުނު މެޗުން ބަލިވެފައި ވަނީ 3-1 ސެޓުންނެވެ.
ތަމްރީން ދެވަނަ މެޗުގައި ކުޅުނު ހަތަރު ސެޓުގައި ވެސް ރާއްޖޭގެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އެވެ. މެޗުގެ ފުރަތަމަ ސެޓު 25-23 އިން ރާއްޖޭގެ ގައުމީ ޓީމުން ގެންދިޔަ ނަމަވެސް، ފަހު ތިން ސެޓު ލަންކާގެ އާމީ ފްސޯގެ ޓީމުން ގެންގޮސްފައި ވަނީ 17-25، 19-25 އަދި 21-25 އިންނެވެ.
ރާއްޖޭގެ ގައުމީ ވޮލީ ޓީމާއި ލަންކާގެ އާމީ ފޯސް ބައްދަލުކުރި މެޗުގެ ތެރެއިން: އެ މެޗުން ރާއްޖޭގެ ޓީމު ބަލިވެފައި ވަނީ 3-1 ސެޓުން --- ފޮޓޯ/ ވީއޭއެމް
ލަންކާގައި ކުރިއަށްގެންދާ ތަމްރީންތަކުގެ ތެރެއިން އަދި ރާއްޖޭގެ ޓީމުން އަށް މެޗު ކުޅުމަށް ހަމަޖެހިފައިވެ އެވެ. ތަމްރީން ފުރަތަމަ މެޗުގައި ވެސް ރާއްޖޭގެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، ލަންކާއާ ދެކޮޅަށް ކުޅުނު އެ މެޗުން ރާއްޖެ ބަލިވީ 3-1 ސެޓުންނެވެ. އަންނަ ހޯމަ ދުވަހު ރާއްޖެ ކުޅޭ ތަމްރީން ތިންވަނަ މެޗުގައި ރާއްޖެ ނުކުންނާނީ ލަންކާގެ ފުރަތަމަ ޑިވިޝަނުގައި ވާދަކުރާ ޓީމެއް ކަމަށްވާ ކްލަބު ސަބަރަގާއާ ދެކޮޅަށެވެ.
ރާއްޖޭގެ ޓީމު ލަންކާގައި މިދިޔަ އާދީއްތަ ދުވަހުން ފެށިގެން 20 ދުވަހުގެ މުއްދަތަކަށް ތަމްރީންތައް ކުރިއަށްގެންދާނެ އެވެ. ލަންކާގައި ރާއްޖޭގެ ވޮލީ ޓީމުން ތަމްރީންތައް ކުރިއަށްގެންދަނީ އެ ޓީމުގެ އާ ކޯޗަކަށް ހަމަޖެއްސި ލަންކާ ގައުމީ ވޮލީ ޓީމުގެ ކުރީގެ ކޯޗު ކުމާރާ ވެންޑަކޫން އެވެ.
ތަމްރީން ދަތުރުގައި މިދިޔަ އާދީއްތަ ދުވަހު ފުރި ރާއްޖޭގެ ޓީމުގައި ހިމެނެނީ 15 ކުޅުންތެރިންނާއި، ދެ އެސިސްޓަންޓް ކޯޗާއި، މެނޭޖަރު އަދި ރެފްރީ އުނައިޝް މުހައްމަދެވެ.
އެ ޓީމުގައި ހިމެނޭ ކުޅުންތެރިންނަކީ އިޝާން މުހައްމަދު (ބަޓިސް) އާއި، ހުސައިން ވިޝާމް އާއި، އަހްމަދު ފާޒިލް އާއި، އަހްމަދު އަބްދުލް ކަރީމް (ލޯންގޭ) އާއި، އާދަމް ފައިރޫޒް އާއި، އަހްމަދު އަނިލް ނަސީރު އާއި، އިސްމާއިލް ސާޖިދު (ކުޑަކާއްޓޭ) އާއި، މުހައްމަދު އަހުސަން އާއި، އަލީ ޖަވާމް އާއި، މުހައްމަދު ޝާއިން އާއި، ހަސަން ނިލާމް އާއި، އަޝްފާގު އާދަމް (އައްކަޅޭ) އާއި، އާދަމް ނަސީމް އަދި ލުގުމާން ލަތީފެވެ.
ޓީމުގެ މެނޭޖަރެއްގެ ގޮތުގައި އަބްދުﷲ ރަޝީދު ދަތުރުގައި ބައިވެރިވި އިރު، އެސިސްޓަންޓް ކޯޗުންނަށް ހަމަޖެއްސި އިބްރާހިމް ޝިހާމާއި ރާއްޖޭގެ ކުރީގެ ވޮލީބޯޅަ ކުޅުންތެރިޔާ ނިޒާރު އިބްރާހިމް ވެސް ދަތުރުގައި ބައިވެރިވި އެވެ.