28 Nov 2016, 23:54
ރާއްޖޭގެ ޓޫރިޒަމް ދާއިރާގައި 500 މިލިޔަން ޑޮލަރަށް ވުރެ އަގުބޮޑު ހަތަރު މަޝްރޫޢަކަށް އިންވެސްޓަރުން ތައްޔާރުވަމުން އެބަ ދާ ކަމަށް ޓޫރިޒަމް މިނިސްޓަރު މޫސާ ޒަމީރު ވިދާޅުވެއްޖެއެވެ.
ރައީސް އަބްދުﷲ ޔާމީންގެ ސަރުކާރަށް ތިން އަހަރު ދުވަސް ފުރުން ފާހަގަކުރުމަށް މިރޭ އަލިމަސް ކާނިވަލުގައި ބޭއްވި ޖަލްސާގައި ވާހަކަ ދައްކަވަމުން، ޓޫރިޒަމް މިނިސްޓަރު މޫސާ ޒަމީރު ވިދާޅުވީ، ރައީސް ޔާމީންގެ ސަރުކާރުގެ ފަސް އަހަރު ތެރޭގައި ރާއްޖޭގައި 50 ރިސޯޓު ހުޅުވުމަށް ނިންމާފައިވާ އިރު، މިއަހަރު ނިމުމުގެ ކުރީން އޭގެ ތެރެއިން 22 ރިސޯޓު ފުރިހަމަވެ، ހުޅުވިގެން ދާނެ ކަމަށެވެ.
"އަދި ގުނާ ނުލެވޭހާ ގިނަ ޕްރޮޖެކްޓްތައް ވެސް ހިނގަމުން އެބަ ދޭ،" ޒަމީރު ވިދާޅުވިއެވެ.
ސަރުކާރަށް ތިން އަހަރު ފުރުން ފާހަގަ ކުރުމަށް މިރޭ ކާނިވާ ސަރަހައްދުގައި ބޭއްވި "ހަބޭސް 3 އަހަރު" ޖަލްސާގެ ތެރޭން -- ސަން ފޮޓޯ: ފަޔާޒް މޫސާ
ރާއްޖޭގެ ފަތުރުވެރިކަމުގެ ދާއިރާއާއި ރިސޯޓުތަކުގެ ވާހަކަ ދައްކަވަމުން ޒަމީރު ވިދާޅުވީ، ރާއްޖޭގައި މިވަގުތު 100 ވަރަކަށް ރިސޯޓުގެ މަސައްކަތް ހިނގަމުން ދާ ކަމަށާއި، އޭގެ ތެރޭގައި 500 މިލިޔަން ޑޮލަރަށް ވުރެ އަގު ބޮޑު ހަތަރު މަޝްރޫއު ހިންގުމަށް އިންވެސްޓަރުން ތައްޔާރުވެގެން، އެކަމަށް މަސައްކަތް ކުރަމުން ގެންދާ ކަމަށެވެ.
އެހެން ނަމަވެސް އެ މަޝްރޫއުތަކުގެ ތަފްސީލެއް މިނިސްޓަރު ނުދެއްވައެވެ.
"ރާއްޖޭގެ ތާރީޚުގައިވެސް އެންމެ ބޮޑު އެކުއިޒިޝަން ކޮސްޓެއް ލިބިގެން މިދަނީ ރައީސް ޔާމީންގެ ވިސްނުންފުޅުން ރާއްޖޭގެ އެސެޓްސްގެ އަގު މައްޗަށް ނެގުމުން،" މިނިސްޓަރު ވިދާޅުވިއެވެ.
ސަރުކާރަށް ތިން އަހަރު ފުރުން ފާހަގަ ކުރުމަށް މިރޭ ކާނިވާ ސަރަހައްދުގައި ބޭއްވި "ހަބޭސް 3 އަހަރު" ޖަލްސާގެ ތެރޭން -- ސަން ފޮޓޯ: ފަޔާޒް މޫސާ
ޓޫރިޒަމް މިނިސްޓަރު ވިދާޅުވީ، ރާއްޖޭގެ ފަޅުތަކުގެ އަގުތައް މަތިކޮށްފައިވާ އިރު، ރާއްޖެ އޮންނަ ސަރަހައްދުގައި އިންވެސްޓްމެންޓަށް އޮތް އެންމެ ރަނގަޅު މާހައުލު އޮތީ ރާއްޖޭގައި ކަން ކަށަވަރު ކަމަށެވެ.
"މި ރީޖަންގައި އެންމެ ވަރުގަދަ އިންވެސްޓްމެންޓް ކްލައިމެޓެއް އޮންނަނީ ރާއްޖޭގައޭ، އެންމެ ރަނގަޅު ފައިދާއެއް ލިބެނީ ރާއްޖެއަށޭ ބުނެފިއްޔާ ދޮގަކަށް ނުވާނެ،" މިނިސްޓަރު ވިދާޅުވިއެވެ.
އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، ޓޫރިޒަމް މިނިސްޓަރު މޫސާ ޒަމީރު ވިދާޅުވީ، ކުރިޔަށް އޮތް ދެ އަހަރު ތެރޭގައި 30 އާއި 40 އާ ދެމެދުގެ ރިސޯޓު ހުޅުވިގެން ދާނެ ކަމަށެވެ.