28 Nov 2016, 16:32
އިބްރާހިމް ނާސިރު އިންޓަނޭޝަނަލް އެއާޕޯޓުގެ އާ ސީޕްލޭން ޓާމިނަލް ގާއިމުކުރުމަށް ބިން ހިއްކުމުގެ މަސައްކަތްތައް ކުރުމަށް މި ހަފްތާގެ ތެރޭގައި ބަޔަކާ ހަވާލުކުރާނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިންގް ޑިރެކްޓަރ އާދިލް މޫސާ ވިދާޅުވެއްޖެ އެވެ.
ސަރުކާރަށް ތިން އަހަރު ފުރުމުގެ މުނާސަބަތުގައި ޕީއެސްއެމުން ދައްކަމުން ގެންދާ "ގައުމު ބިނާކުރުމުގެ ތިން އަހަރު" ޕްރޮގްރާމުގައި މިއަދު ވާހަކަ ދައްކަވަމުން، އެމްއޭސީއެލްގެ މެނޭޖިންގް ޑިރެކްޓަރ ވަނީ، އިބްރާހިމް ނާސިރު އިންޓަނެޝަނަލް އެއާޕޯޓުގެ ތަރައްގީގެ މަސައްކަތްތަކުގެ މައުލޫމާތުތައް ހިއްސާ ކުރައްވައިފައެވެ.
އާދިލް ވިދާޅުވީ އައިއެންއައިއޭގެ އާ ރަންވޭ އެޅުމަށްޓަކައި ހިއްކަންޖެހޭ ބިމުގެ ބޮޑު ބައި ހިއްކައި ނިމިފައިވާ ކަމަށެވެ. ރަންވޭ އެޅުމަށް ބިން ހިއްކުމުގެ މަސައްކަތް ކުރަމުން ދަނީ، ރަންވޭގެ މަސައްކަތް ވެސް ކުރުމަށް ހަވާލުކޮށްފައިވާ، ޗައިނާގެ ބެއިޖިންގް އާބަން ކޮންސްޓްރަކްޝަން ގްރޫޕު (ބީޔޫސީޖީ)އިންނެވެ.
އާ ރަންވޭ އަޅަނީ މިހާރު ސީޕްލޭން ޓާމިނަލް ހުންނަ ހިސާބާ ވަރަށް ކައިރީގައި ކަމަށް ވެފައި، ރަންވޭ ބޭނުންކުރުމުގެ ކުރިން ސީޕްލޭން ޓާމިނަލްއާ ރަންވޭއާ ދެމެދު ވަކި ވަރެއްގެ ދުރުމިނެއް ހުންނަން ޖެހެއެވެ.
އިބްރާހިމް ނާސިރު އިންޓަނޭޝަނަލް އެއާޕޯޓުގައި ހުންނަ ސީޕްލޭން ބޭސް ---ސަން ފޮޓޯ: މުހައްމަދު އަފްރާހް
ސީޕްލޭން ޓާމިނަލްގެ މިހާރު ނިމިފައިވާ ކަމަށް އާދިލް ވިދާޅުވި އިރު، އޭނާ ވިދާޅުވީ އެތަނުގެ އަމަލީ މަސައްކަތް ކުރާނެ ގޮތް ރާވަމުންދާ ކަމަށެވެ.
އާދިލް ވިދާޅުވީ އާ ސީޕްލޭން ޓާމިނަލް އަޅަނީ، އެއާ ޓްރެފިކް ކޮންޓްރޯލް ޓަވަރާ ދިމާލުން ކަމަށާއި، އެސަރަހައްދުން ބައެއް ހިއްކަން ވެސް ޖެހޭނެ ކަމަށެވެ.
"ރިކްލެއިމް ކުރުމާ، މިކަންކަން މިވަނީ ބަޔަކަށް އެވޯޑު ކުރުމުގެ މަގުމަތީގައި. އެވޯޑޫ ކުރުމުގެ މަސައްކަތް މިހަފްތާ ތެރޭގައި ނިންމާލެވޭނެ ކަމަށް މި ބަލަނީ،" އާދިލް ވިދާޅުވިއެވެ.
އާދިލް މީގެ ކުރިން ވިދާޅުވެފައިވާ ގޮތުގައި، ޕެސެންޖާ ޓާމިނަލްގައި ހުންނަ ކަހަލަ އެޑްވާންސްޑް އިކުއިޕްމެންޓްތައް ސީޕްލޭން ޓާމިނަލަށް ބޭނުން ނުވާތީ، ސީޕްލޭން ޓާމިނަލާއި އެތަނާ ގުޅުން ހުރި އެހެން އިމާރާތްތައް، އެހެން ދިމާލަކަށް ބަދަލުކުރުމަކީ އުނދަގޫ ކަމަކަށް ނުވާނެއެވެ.
ދުނިޔޭގެ އެންމެ ބޮޑު ސީޕްލޭން ނެޓްވޯކު އޮންނަނީ ދިވެހިރާއްޖޭގަ އެވެ. އަދި ދުނިޔޭގެ އެންމެ ބޮޑު ސީޕްލޭން ފްލީޓު އޮންނަނީ ރާއްޖޭގެ ޓްރާންސް މޯލްޑިވިއަން އެއާވޭސް (ޓީއެމްއޭ)ގައެވެ. ޓީއެމްއޭގެ ފްލައިޓުތަކުގެ ބޭސްއަކީ އިބްރާހިމް ނާސިރު އިންޓަނޭޝަނަލް އެއާޕޯޓެވެ. މީގެ އިތުރުން ގައުމީ އެއާލައިން، މޯލްޑިވިއަންގެ ސީޕްލޭން ބޭސްއަކީ ވެސް އިބްރާހިމް ނާސިރު އިންޓަނޭޝަނަލް އެއާޕޯޓެވެ.