28 Nov 2016, 09:06
ސަރުކާރުގެ މުވައްޒަފުންނަށް އަމާޒުކޮށްގެން ހުޅުމާލޭގައި އިމާރާތްކުރަން ނިންމާފައިވާ 2500 ފްލެޓްގެ ބޮޑު ބައެއް ހާއްސަ ކުރާނީ ސިއްހީ ދާއިރާގައި ހިދުމަތްކުރާ މުވައްޒަފުންނަށް ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
އައިޖީއެމްއެޗްގައި އަލަށް ފެށި ފަސް ހިދުމަތެއް އިފްތިތާހުކުރުމަށް ރޭ އެ ހޮސްޕިޓަލުގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ވިދާޅުވީ، ހުޅުމާލޭގައި އަލަށް އިމާރާތް ކުރާ އެ ފްލެޓްތަކަކީ ސިއްހީ ދާއިރާގެ މުވައްޒަފުންނަށާއި ސިފައިންނާއި ފުލުހުންނަށް ދޭ ފްލެޓްތަކެއް ކަމަށެވެ.
ނަމަވެސް އެ ފްލެޓްތަކުގެ ތެރެއިން ބޮޑުބައެއް ދިނުމަށް ހަމަޖެހިފައި ވަނީ ސިއްހީ ދާއިރާގެ މުވައްޒަފުންނަށާއި ޑޮކްޓަރުންނާއި ނަރުހުންނަށް ކަމަށާއި އެ ނިންމުމަކީ ސިއްހީ ދާއިރާއަށް ސަރުކާރުންދޭ އަޅާލުން ރަމްޒުކޮށްދިނުމުގެ ގޮތުން ކުރައްވާ ކަމެއް ކަމަށް ރައީސް ވިދާޅުވި އެވެ.
ޒުވާން ތައުލީމީ އަދި ތަމްރީން ކުރަން ފަސޭހަ އާބާދީއެއް ރާއްޖޭގައި އޮތް ނަމަވެސް އިންސާނީ ވަސީލަތްތައް ތަރައްގީ ކުރުމަކީ އެންމެ ބޮޑު އެއް ގޮންޖެހުންކަން ފާހަގަކުރައްވައި ރައީސް ވިދާޅުވީ، ރާއްޖެއަށް ބޭނުންވާ ވަރަށް ނަރުހުން ނުލިބުމަކީ ސިއްހީ ދައިރާއަށް މިވަގުތު ދިމާވެފައި އޮތް އެންމެ ބޮޑު އެއް ގޮންޖެހުން ކަމަށެވެ.
އެއީ އެންމެ ދުވަހަކުން ވާނޭ ކަމެއް ނޫން ކަމަށާއި އެކަން އެންމެ ކުރު މުއްދަތެއްގެ ތެރޭގައި ކުރެވޭނީ ކިހިނެތްތޯ ބެއްލެވުމުގެ މަސައްކަތް ކުރައްވަމުން ގެންދަވާ ކަމަށް ވެސް އެމަނިކުފާނު ވިދާޅުވި އެވެ.
"އެއްއަތުން އަޅުގަނޑުމެން ހަނާ އަޅާ ސާބަސްދޭ ފަދައިން ޕްރައިވެޓް ހޮސްޕިޓަލްތައް އުފެދިގެން މިދަނީ. އަނެއް އަތުން މަނާކުރަން މިޖެހެނީ އަޅުގަނޑުމެންނާ އެކީ މަސައްކަތްކުރައްވާ ހިދުމަތްތެރިން އަޅުގަނޑުމެން ދޫކޮށްފައި ދާތީ. އެހެން ނަމަވެސް މިކަން އޮންނާނީ ވެސް މިހެން. އަޅުނގަޑުމެން މަސައްކަތް މިކުރަނީ ކުރު މުއްދަތެއްގެ ތެރޭގައި ނަރުހުން އުފެއްދޭތޯ،" ރައީސް ވިދާޅުވި އެވެ.