26 Nov 2016, 13:37
ރާއްޖޭގެ އެއް ވަނަ ކްލަބުގެ މަގާމަށް މާޒިޔާ ސްޕޯޓްސް އެންޑް ރެކްރިއޭޝަން ކްލަބު ގެންގޮސްދިނީ އެ ކްލަބުގެ ކޯޗުކަމުގެ މަގާމުން ރޭ އިސްތިއުފާ ދިން އަލީ ސުޒޭން ކަމަށް މާޒިޔާއިން ބުނެފި އެވެ.
ސުޒޭންގެ އިސްތިއުފާ ގަބޫލްކޮށް މާޒިޔާ އިން ނެރުނު ބަޔާނެއްގައި ބުނީ އޭނާ އިސްތިއުފާ އެ ކްލަބުން ބަލައިގަތީ ނުހަނު ހިތަމާއެކު ކަމަށާއި މާޒިޔާ ދޫކޮށް ސުޒޭން އެ ދަނީ އެ ޓީމް ރާއްޖޭގެ އެއް ވަނަ ކްލަބަށް ހަދައިދީފަ ކަމަށެވެ.
ޕްރެޒިޑެންޓް ކަޕް ކާމިޔާބް ކުރުމަށް ފަހު މާޒިޔާގެ ބައެއް އޮފީޝަލުންނާއެކު ސުޒޭން ތަށި އުފުލާލަނީ --- ފޮޓޯ/ ސުޒޭން ފޭސްބުކް ޕޭޖް
"ސުޒޭންގެ ނަން ލިޔިވެގެން ދާނީ ރަން އަކުރުން މި ކްލަބުގެ އެންމެ ކާމިޔާބު ކޯޗުގެ ގޮތުގައި. ކްލަބްގެ އެހީތެރިކަމާ އެކު އޭނާ އެ ވަނީ ވަރަށް ގިނަ ގުނަ އުނދަގޫ ކަންތައްތަކެއް ހާސިލްކޮށްފަ،" މާޒިޔާގެ ބަޔާންގައިވެ އެވެ.
ވިކްޓަރީގެ ކޯޗުކަމުން އިސްތިއުފާ ދިނުމަށްފަހު 2014 ވަނަ އަހަރު މާޒިޔާގެ ކޯޗުކަމާއި ހަވާލުވި ސްޒޭން ވަނީ އެ ޓީމާއެކު އެ އަހަރުގެ އެފްއޭ ކަޕާއި މިދިޔަ އަހަރުގެ ޕްރެޒިޑެންޓް ކަޕް ކާމިޔާބްކޮށްދީފަ އެވެ. އަދި މިއަހަރުގެ ޗެރިޓީ ޝީލްޑުގެ އިތުރުން އުރީދޫ ދިވެހި ޕްރިމިއާ ލީގު ވެސް މާޒިޔާއިން ކާމިޔާބު ކުރީ ސްޒޭންގެ އިރުޝާދުގެ ދަށުންނެވެ.
އުރީދޫ ދިވެހި ޕްރިމިއާ ލީގު ފަހު މެޗުގައި މާޒިޔާ އާއި އީގަލްސް ބައްދަލުކުރި މެޗަށް ފަހު -- ސަން ފޮޓޯ/ ފަޔާޒު މޫސާ
މާޒިޔާގެ ބަޔާނުގައި ބުނެފައި ވަނީ އެ ޓީމް ސުޒޭން ކޮށްދީފައިވާ ހިދުމަތްތަކަކީ ދުވަހަކު ވެސް ހަނދާން ނެތޭނެ ހިދުމަތްތަކެއް ނޫން ކަމަށާއި އެ ކްލަބުން އަބަދުވެސް ހުންނާނީ ސުޒޭންގެ ފަހަތުގައި ކަމަށެވެ.
ގައުމީ ޓީމުގެ ގިނަ ކުޅުންތެރިންތަކަކާ އެކު ސީޒަން ފެށި މާޒިޔާއިން ވަނީ ސީޒަނުގެ މެދު ތެރެއިން ގައުމީ ޓީމްގެ ކެޕްޓަން އަލީ އަޝްފާގު(ދަގަނޑޭ) ވެސް އެ ޓީމަށް ގެނައިސްފައެވެ.
ނަމަވެސް ވަރުގަދަ ސްކޮޑަކާ އެކު ނިކުތް މާޒިޔާއަށް މިއަހަރުގެ ކާމިޔާބްކުރެވިފައި ވަނީ ލީގު އެކަންޏެވެ. ސުޒޭން ވަނީ މި އަހަރުގެ ސީޒަން ފެށުމުގެ ކުރިން އޭނާގެ އަމާޒަކީ ތިން ތައްޓާއެކު ސީޒަން ނިންމާލުން ކަމަށް ބުނެފައެވެ.