23 Nov 2016, 13:38
ހެޔޮ ބަދަލުތަކާ އެކު މޯލްޑިވްސް ހައްޖު ކޯޕަރޭޝަނުން މާރިޗު މަހަށް އުމްރާދަތުރުތަކެއް ތައާރަފްކޮށްފިއެވެ.
ހައްޖު ކޯޕަރޭޝަނުން މިއަދު ބުނީ މާރިޗް މަހުގެ އުމްރާ ދަތުރުގެ އަގަކީ 22,965 ރުފިޔާ ކަމަށާއި މީގެކުރިން އުމްރާ ދަތުރުތަކުގެ އަގަކީ 25،965 ރުފިޔާ ކަމަށެވެ.
މާރިޗް މަހުގެ އުމްރާ ދަތުރުތަކުގެ ދިގުމިނަކީ 10 ދުވަހުގެ މުއްދަތެއް ކަމަށް ވެސް ހައްޖު ކޯޕަރޭޝަނުން ބުންޏެވެ.
ހައްޖު ކޯޕަރޭޝަނުން ބުނީ ހަތަރު މީހުންގެ ގުރޫޕެއް ނުވަތަ ހަތަރު މީހުންގެ އާއިލާއެއް ރަޖިސްޓްރީ ކުރާނަމަ ވަރަށް ޚާއްސަ ޑިސްކައުންޓެއް ލިބޭނެ ކަމަށެވެ.އެގޮތުން ހަތަރު މީހުންގެ ގުރޫޕެއްނަމަ ކޮންމެ މީހަކަށް 1000 ރުފިޔާގެ ޑިސްކައުންޓެއް އަދި 10 ބޭފުޅުންގެ ގުރޫޕެއް ރަޖިސްޓްރީ ކޮށްދޭ ފަރާތްތަކަށް އުމްރާ އަގުގެ 50 ޕަސެންޓް ޑިސްކައުންޓެއް ލިބޭއިރު ސްކޫލްކުދިންނަށް ވަރަށް ޙާއްސަ ޑިސްކައުންޓެއް ލިބޭނެ ކަމަށް ހައްޖު ކޯޕަރޭޝަނުން ބުންޏެވެ.
މާރިޗް މަހުގެ އުމްރާ ދަތުރަށް ރަޖިސްޓްރީ ކުރުމާއި ފައިސާ ދެއްކުމުގެ އެންމެ ފަހު ތާރީޚަކީ އަންނަ ޖެނުއަރީ މަހުގެ 31 ވަނަ ދުވަސް ކަމަށް އެ ކޯޕަރޭޝަނުން ބުންޏެވެ.
އުމްރާއަށް ރަޖިސްޓްރީ ކުރެއްވުމަށް އެދި ހުށަހަޅާ ފޯމް ފުރުމަށްފަހު އެކޯޕަރޭޝަންގެ އޮފީހުންނާއި މޯލްޑިވްސް އިސްލާމިކް ބޭންކްގެ ބްރާންޗްތަކަށް ވަޑައިގެން ރަޖިސްޓްރީ ކުރެއްވޭނެ ކަމަށް ހައްޖު ކޯޕަރޭޝަނުން ބުންޏެވެ. އަދި ފޯމާއި އެކު މަދުވެގެން 5,000 ރުފިޔާ ދެއްކުވުމުން ރަޖިސްޓްރީ ކުރެވޭނެ ކަމަށާއި ބާކީ ފައިސާ ޖެނުއަރީ މަހުގެ 31 ވަނަ ދުވަހުގެ ކުރިން މަހުން މަހަށް ނުވަތަ ބައިބަޔަށް ބަހާލައިގެން ދައްކާލެވޭނެ ކަމަށް ހައްޖު ކޯޕަރޭޝަނުން ބުންޏެވެ.