23 Nov 2016, 12:30
ބުބަނޭޝްވަރު (ނޮވެމްބަރު 23): އިންޑިއާ އިން މިމަސް ތެރޭގައި އަލަށް ތައާރަފު ކުރި 2000 ރުޕީސްގެ ވަގުނޫޓުތަކެއް ދައުރު ކުރަން މަސައްކަތް ކުރަމުން ދިޔަ މީހަކު އެ ގައުމުގެ އޮޑީޝާ ސްޓޭޓުން ހައްޔަރުކޮށްފި އެވެ.
ފުލުހުން ބުނި ގޮތުގައި މަދުސުދާން މެހެރު ނަމަކަށް ކިޔާ ޒުވާނަކު ފުލުހުންނާ ހަވާލުކޮށްފައި ވަނީ ޕެޓްރޯލް ސްޓޭޝަނެއްގައި ވަގު ފައިސާ ބޭނުން ކުރަން އުޅުމުގެ ތެރޭގައި ކަމަށެވެ.
"އެއީ އޮރިޖިނަލް 2000 ރުޕީސްގެ ކުލަ ފޮޓޯކޮޕީއެއް. އެމައްސަލަ ރެޖިސްޓާކޮށް މިހާރު ތަހުގީގު ކުރަމުން ދަނީ،" ޕޮލިސް އޮފިސަރު ބިޖޭ ނަންދާ ވިދާޅުވި އެވެ.
މީގެ އިތުރުން ފުލުހުން ވަނީ ގިނަ އަދަދެއްގެ ފައިސާ ރައްކާކުރުމުގެ ދައުވާގައި އިންޑިއާ އަށް ބިދޭސީން ގެންދާ މީހެއް ކަމަށްވާ ކިރާސަގަރު ބާގު ތަހުގީގަކަށް ހޯދަން ފަށައިފަ އެވެ.
ބާގު ވަގު ނޫޓުތައް ގެންގުޅޭ ކަމަށް ފުލުހުންނަށް ލިބުނު މައުލޫމާތަކާ ގުޅިގެން އޭނާގެ ގެ ފާސް ކުރަން ދިޔުމުން ބާގު ވަނީ ފިލާފަ އެވެ. ނަމަވެސް އޭނާގެ ގެއިން ގާތްގަނޑަކަށް 12 ލައްކަ ރުޕީސް ފެނިފައިވާ ކަމަށާއި އޭގެ ތެރޭގައި އަލަށް ނެރުނު 2000 ރުޕީސްގެ ޖުމްލަ 4.8 ލާކް ރުޕީސް (7000 ޑޮލަރު) ހިމެނޭ ކަމަށް ސުޕްރިޓެންޑެންޓް އޮފް ޕޮލިސް އަސިޝް ސިންހު ވިދާޅުވި އެވެ.
"ގިނަ މީހުން އޭޓީއެމްތަކާއި ބޭންކުތައް ކައިރީ ފައިސާ ނަގަން ލައިން ހަދާފައި ވަނިކޮށް ބާގް އަށް އެހާ ގިނަ 2000 ރުޕީސްގެ ނޯޓުތައް ލިބުނު ގޮތް ބަލަން ފުލުހުން ދަނީ ތަހުގީގު ކުރަމުން،" އެސްޕީ ސިންހު ވިދާޅުވި އެވެ.
އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވި ގޮތުގައި އެގައުމުގެ 500 ރުޕީސް އާއި 1000 ރުޕީސް މަގުސަދަކީ ކަޅު ފައިސާ ދައުރު ކުރުން ހުއްޓުވުމާއި ކޮރަޕްޝަން ނައްތާލުމެވެ.