23 Nov 2016, 13:21
ރާއްޖޭގެ މައި ހޮސްޕިޓަލް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ދެކުނަށް އޮންނަ ބިމުގައި އަޅާ އެ ހޮސްޕިޓަލްގެ 25 ބުރީގެ އިމާރާތުގެ މަސައްކަތް ދަނީ ޝެޑިއުލްއަށް ވުރެ އަވަހަށް ކަމަށް އެ ހޮސްޕިޓަލުން ބުނެފި އެވެ.
މި އަހަރުގެ މާޗް މަހުގެ ތެރޭގައި ސިންގަޕޫރުގެ ޝެންހުއާ ނަމަކަށް ކިޔާ ކުންފުންޏަކާ ހަވާލުކޮށްގެން އިމާރާތްކުރަމުންދާ އައިޖީއެމްއެޗްގެ 25 ބުރީގެ އިމާރާތުގެ ބިންގާ މިދިޔަ ޖޫން މަހުގެ ތެރޭގައި އަޅުއްވައި ދެއްވީ ރައީސް އަބްދުﷲ ޔާމީނެވެ.
ޖުމްލަ 140 މިލިއަން ޑޮލަރު (2.1 ބިލިއަން ދިވެހި ރުފިޔާ) ހަރަދުކޮށްގެން ހަދާ އެ އިމާރާތް 2018 އަށް ނިންމަން ކަނޑައަޅާފައިވާ އިރު، އިމާރާތަށްދާ އަގު ދައްކައި ހަލާސްކުރަން ޖެހޭނީ ތިން އަހަރުންނެވެ. އަދި އޭގެން ބައެއް ވަނީ މިހާރު އެ ކުންފުންޏަށް ދައްކައިފަ އެވެ.
އާ އިމާރާތުގެ މައުލޫމާތު "ސަން" އަށް ދެއްވަމުން އައިޖީއެމްއެޗްގެ ޕަބްލިކް ރިލޭޝަންސް އެންޑް މީޑިއާ ޑިޕާޓްމަންޓުގެ ޑިރެކްޓަރު އަހުމަދު މައުސޫމް މިއަދު ވިދާޅުވީ، ހޮސްޕިޓަލުގެ އާ އިމާރާތުގެ މަސައްކަތްކުރިއަށް ދަނީ ޝެޑިއުލްއަށް ވުރެ އަވަހަށް ކަމަށެވެ.
އެގޮތުން، މިއަހަރުގެ ޖޫން މަހު މަސައްކަތްފެށި އެ އިމާރާތުގެ ޝީޓްޕައިލްކޮށް ފައުންޑޭޝަން އަޅައި ނިމި ދެވަނަ ބުރީގެ ޝީޓް އަޅަން ފަށާފައިވާ އިރު، މިއަހަރު ނިމުމުގެ ކުރިން އިތުރު ދެ ބުރިއެއްގެ ޝީޓް އަޅައި ނިންމާލެވޭނެ ކަމަށް އޭނާ ވިދާޅުވި އެވެ.
އަދި ވިދާޅުވީ، މި އަހަރު ނިމުމުގެ ކުރިން އިމާރާތުގެ ފުރަތަމަ ބުރީގެ އެތެރޭގެ މަސައްކަތްތައް ވެސް ފެށިގެންދާނެކަމަށެވެ.
އައިޖީއެމްއެޗްގެ 25 ބުރީގެ އިމާރާތް ނިމުމުން އެތަން ވެގެންދާނީ 500 އެނދުގެ ޒަމާނީ ސްޕެޝަލިސްޓް ހޮސްޕިޓަލަކަށެވެ. ނޭޝަނަލް ޑައިގްނޯސްޓިކް ފެސިލިޓީއަށް ހަ ބުރިއެއް ހާއްސަކޮށްފައިވާ އައިޖީއެމްއެޗްގެ އާ އިމާރާތް ނިމުމުން އެތަނުން ޑޮކްޓަރަށް ދެއްކުމާއި އެކަމާ ގުޅިގެން ކުރަން ޖެހޭ ހުރިހާ ތަޙުލީލުތަކެއް ވެސް ކުރެވިގެންދާނެ އެވެ.
އޭގެ އިތުރުން ޗައިލްޑް ކެއާ ސެންޓަރަކާއި ޖިމާއި ރިހެބިލިޓޭޝަން ސުއިޓެއް ވެސް ހިމެނޭ އިރު އިމާރާތުގެ ފަސް ފަންގިފިލާއެއް ހާއްސަކޮށްފައި ވަނީ ހޮސްޕިޓަލުން ހިދުމަތް ލިބިގަންނަ ފަރާތްތަކަށް ޕްރައިވެޓް އެކަމޮޑޭޝަން ހަމަޖެއްސުމަށް ކަމަށް އައިޖީއެމްއެޗް އިން ކުރިން ބުނެ އެވެ.