23 Nov 2016, 09:58
ލޯކަލް ކައުންސިލް އިިންތިޚާބުގައި ވާދަކުރާ މީހުންގެ އުމުރަކީ، ދޮށިވެގެން 65 އަހަރު ކަމަށް ކަނޑައެޅުމަށް ޓަކައި ރައްޔިތުންގެ މަޖިލީހަށް އިސްލާހެއް ހުށަހަޅައިފި އެވެ.
ލޯކަލް ކައުންސިލްގެ އިންތިޚާބާ ބެހޭ ގާނޫނަށް އެ އިސްލާހު ހުށަހެޅުއްވީ ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު އެވެ.
އެ އިސްލާހުގެ ފުރަތަމަ ކިއުން އިއްވަމުން ޝުޖާއު ވިދާޅުވީ ރާއްޖޭގެ ރައީސުލްޖުމްހޫރިއްޔާގެ މަގާމަށް ކުރިމަތިލައްވާ ބޭފުޅަކީ 65 އަހަރުން މަތީގެ މީހުންނަށް ވާން ޖެހޭ ކަމަށް ގާނޫނު އަސާސީގައި އޮތް އިރު އެ އިސްލާހުގެ ބޭނުމަކީ ޒުވާނުންނަށް ފުރުސަތު ދީގެން ގައުމު ހިންގުން ކަމަށެވެ.
އެ އިސްލާހު ހުށަހެޅުއްވި ސަބަބަކަށް ޝުޖާއު ވިދާޅުވީ އެ އުމުރުގެ ބޭފުޅުންނަށް އެންމެ އެކަށީގެންވާ ގޮތުގައި އެފަދަ މަސްއޫލިއްޔަތުތައް ނުއުފުލޭނެ ކަމަށް ގަބޫލު ކުރައްވާ ކަމަށާއި އެ އުމުރުގެ ބޭފުޅުންނަށް ދައުލަތުން ހާއްސަ އިނާޔަތެއް ލިބޭ ކަމަށެވެ.
އެ އިސްލާހުގެ އިބްތިދާއީ ބަހުސް މަރުހަލާގައި މިހާތަނަށް ވާހަކަ ދެއްކެވި މެމްބަރުންގެ ތެރެއިން ޕީޕީއެމްގެ ވިލުފުށީ ދާއިރާގެ މެމްބަރު ރިޔާޒު ރަޝީދު ވިދާޅުވީ އެ ބިލަށް އޭނާ ތާއީދު ނުކުރައްވާ ކަމަށެވެ. ނަމަވެސް ޕީޕީއެމްގެ ވިޕަކުން ވަކި ގޮތަކަށް ވޯޓު ދެއްވައިފި ނަމަ އެ ގޮތަކަށް ވޯޓު ދެއްވާނެ ކަމަށެވެ. ޕީޕީއެމްގެ ބިލަތްދޫ ދާއިރާގެ މެމްބަރު އަހުމަދު މުބީން ވެސް ވިދާޅުވީ އެ ބިލަކީ ރަނގަޅު ބިލެއް ނޫން ކަމަށެވެ. އޭނާ ވިދާޅުވީ އެފަދަ އިސްލާހެއް ހުށަހެޅުމަށް މިއީ އެންމެ ރަނގަޅު ވަގުތެއް ނޫން ކަމަށެވެ. ޕީޕީއެމްގެ މަޑުއްވަރީ ދާއިރާގެ މުހައްމަދު އަމީތު ވިދާޅުވީ ކައުންސިލް އިންތިހާބުގައި 65 އަހަރުން މަތީގެ މީހުންނަށް ކުރިމަތި ނުލެވޭ ނަމަ، ރައްޔިތުންގެ މަޖިލީހުގެ މެމްބަރު ކަމަށް ވެސް 65 އަހަރުން މަތީގެ މީހުންނަށް ކުރިމަތި ލެވިގެން ނުވާނެ ކަމަށެވެ.
ނަމަވެސް ޕީޕީއެމްގެ ކަނޑިތީމު ދާއިރާގެ މެންބަރު މުހައްމަދު ހުސައިން ވިދާޅުވީ އެ އިސްލާހަކީ ރަނގަޅު އިސްލާހެއް ކަމަށެވެ. އަދި އެކިއެކި ބޭނުންތަކުގައި އަސާސީ ހައްގުތައް ހަނި ކުރެވިދާނެ ކަމަށެވެ.
ލޯކަލް ކައުންސިލް އިންތިޚާބުގައި ވާދަކުރެވޭނެ އެންމެ ދޮށީ އުމުރަކީ 65 އަހަރު ކަމަށް ކަނޑައަޅަން މަޖިލީހަށް ހުށަހެޅި އިރު، ރައީސުލްޖުމްހޫރިއްޔާ ކަމުގެ މަގާމަށް ވާދަކުރެވޭ އެންމެ ދޮށީ އުމުރަކީ 65 އަހަރު ކަމަށް ކަނޑައަޅައި ގާނޫނު އަސާސީ ވަނީ އިސްލާހުކޮށްފަ އެވެ.