22 Nov 2016, 17:07
މީހުން ޓްރެފިކްކުރުމުގެ ކުށް ސާބިތުވި ތިން ބިދޭސީއަކު 10 އަހަރަށް ޖަލަށް ލުމަށް ކްރިމިނަލް ކޯޓުން އިއްޔެ ކުމްކޮށްފިއެވެ.
މިއީ މީހުން ޓްރެފިކް ކުރުން ހުއްޓުވުމުގެ ގާނޫނު 2013 ވަނަ އަހަރު ވުޖޫދަށް އައިފަހުން ފުލުހުންނަށް ހުށަހެޅި ފުރަތަމަ މައްސަލައެވެ. އަދި މިއީ ޝަރީއަތަށް ވެސް ހުށަހެޅި މިފަދަ ފުރަތަމަ މައްސަލައެވެ.
މީހުން ޓްރެފިކް ކުރުމުގެ ކުށް ސާބިތުވުމާއި ގުޅިގެން 10 އަހަރަށް ޖަލަށްލުމަށް ހުކުމްކޮށްފައިވަނީ ބަންގްލަދޭޝްގެ ތިން މީހުން ކަމަށްވާ އެމްޑީ ސައިމް މޮއްލާ،38، އާއި ޢަބްދުލްމަލަކު،32، އާއި ބާދުޝާ،46، އެވެ.
އެ ތިން މީހުންގެ މައްޗަށް މީހުން ޓްރެފިކް ކުރުމުގެ ދައުވާ އުފުލާފައިވަނީ 2013 ވަނަ އަހަރުގެ ޑިސެމްބަރު މަހުގެ ހަތް ވަނަ ދުވަހު ބަންގްލަދޭޝް އަންހެނަކު ރާއްޖެ ގެނެސް އޭނާ ޓްރެފިކް ކުރި މައްސަލައާ ގުޅިގެންނެވެ.
ކްރިމިނަލް ކޯޓުން ކުރި ހުކުމްގައި ބުނެފައި ވަނީ 2013 ވަނަ އަހަރުގެ ޑިސެމްބަރު މަހުގެ ހަތް ވަނަ ދުވަހު ބަންގްލަދޭޝްގެ ރައްޔިތަކު މާލެގެނެސް އޭނާ ޓްރެފިކްކުރުމުގައި ދައުވާ ލިބޭ ތިން މީހުން އެންމެ ފުރިހަމަގޮތުގައި ބައިވެރިވެފައިވާކަން އެ މައްސަލައިގަ ލިބިފައިވާ ހެކިތަކާއި ޤަރީނާތަކުން ޝަރީއަތަށް ސާބިތުވާކަމަށެވެ.