20 Nov 2016, 19:18
އިންޑިއާގެ އުއްތަރަ ޕްރަދޭޝްގައި ހިނގި ރޭލު އެކްސިޑެންޓެއްގައި ގިނަ ބަޔަކު މަރުވެ، އެތައް ބަޔަކު ޒަހަމްވުމާ ގުޅިގެން އެކަމުގެ ހިތާމައިގާ ރައީސުލްޖުމްހޫރިއްޔާ އަބްދުﷲ ޔާމީން އަބްދުއްގައްޔޫމް، އިންޑިއާގެ ބޮޑުވަޒީރު ނަރެންދުރަ މޯދީއަށް ހަމްދަރުދީގެ މެސެޖެއް ފޮނުއްވައިފި އެވެ.
އިންޑިއާގެ ފުލުހުން ބުނީ، ކާންޕުރް ސިޓީ ހިސާބުގައި ރޭގެ ދަންވަރުގެ ވަގުތެއްގައި ރޭލު ދަނގަޑުން ކަހާލައި ހިނގި އެ އެކްސިޑެންޓުގައި މަރުވި މީހުންގެ އަދަދު 100 އަށްވުރެ މައްޗަށް އަރާ ކަމަށެވެ.
ހާދިސާގައި އަނިޔާވި މީހުންގެ އަދަދު 150 އަށްވުރެ މައްޗަށް އަރާއިރު ފުރޮޅާލާފައިވާ ރޭލުގެ ތެރޭގައި އަނިޔާވެ ތާށިވެފައިތިބި މީހުން ސަލާމަތްކުރުމުގެ މަސައްކަތް ދަނީ ކުރަމުންނެވެ.
އިންޑިއާގެ ބޮޑުވަޒީރަށް ފޮނުއްވެވި ހަމްދަރުދީގެ މެސެޖުގައި ރައީސް ޔާމީން ވަނީ އިންޑިއާގެ ގައުމީ ހިތާމައިގެ މިދަނޑިވަޅުގައި ދިވެހި ސަރުކާރާއި ރައްޔިތުންނާއި އެމަނިކުފާނުގެ އަމިއްލަ ނަންފުޅުގައި އިންޑިއާގެ ސަރުކާރަށާއި ރައްޔިތުންނަށް އިހުލާސްތެރިކަމާއެކު ހަމްދަރުދީ ފޮނުއްވާ ކަމަށެވެ.
އަދި އެ ހާދިސާގައި މަރުވި މީހުންގެ އާއިލާތަކަށް ތައުޒިޔާ ރައްދުކޮށްދެއްވުމަށް ވެސް ރައީސްގެ މެސެޖުގައި އެދިވަޑައިގެންފައިވެއެވެ.