15 Nov 2016, 16:26
ގޯވާ (ނޮވެމްބަރު 15) : އިންޑިއާ އިން ކޮރަޕްޝަން ނައްތާލުމަށް ޓަކައި ސަރުކާރުން ކުރަމުން ގެންދާ މަސައްކަތްތަކަށް ރައްޔިތުންގެ ވަރަށްބޮޑު އެއްބާރުލުމެއް ބޭނުންވާކަމަށް ބޮޑުވަޒީރު ނަރަންދުރަ މޯދީ ވިދާޅުވެއްޖެ އެވެ.
ގޯވާއަށް ކުރައްވާ ދަތުރުފުޅެއްގައި ދެއްވި ބަޔާނެއްގައި މޯދީ ވިދާޅުވީ އިންޑިޔާގައި މިހާރު އޮތްމިންވަރަށް ކޮރަޕްޝަން އޮވެގެން ތަރައްގީ ހާސިލް ނުކުރެވޭނެ ކަމަށާއި ތަރައްގީ ޙާސިލް ކުރުމަށް ޓަކައި ކޮރަޕްޝަން މުޅިން ނުހުއްޓުވުނު ނަމަވެސް އެކަން ކޮންޓްރޯލް ކުރަންޖެހޭ ކަމުގަ އެވެ.
މޯދީ ވިދާޅުވީ ކަޅުފައިސާ ދޮވުމާއި ޓެކްސް ދެއްކުމުގައި މަކަރުހެދުން ފަދަ ކަންކަން ހުއްޓުވުމަށް ޓަކައި ރައްޔިތުން ހޭލުންތެރި ކުރަން ޖެހޭ ކަމަށާއި ސަރުކާރުން ގެންދަނީ ކަޅު ފައިސާ ދޮވުމާއި ޓެކްސް ދެއްކުމުގައި މަކަރުހެދުންފަދަކަންކަމާ ދެކޮޅަށް ވަރަށް އަވަސް އަދި ހަރުކަށި ފިޔަވަޅުތަކެއް އަޅަމުންކަމުގަ އެވެ.
މޯދީ މިމޭރުމުން ވާހަކަ ދެއްކެވީ އިންޑިއާގެ ފައިސާ ކަމަށްވާ ރުޕީސްގައި ހިމެނޭ 500 ގެ ނޫޓްތަކާއި 1000 ގެ ނޫޓްތައް އުވާލުމަށް މަރުކަޒީ ބޭންކުން ނިންމުމާ ގުޅިގެން އެގައުމުގެ ގިނަބަޔަކު ރުޅިވެރިކަން ފާޅުކުރަމުން ގެންދާ ދަނޑިވަޅެއްގަ އެވެ. އިންޑިއާގެ މަރުކަޒީ ބޭންކް ބުނާގޮތުން 500 ގެ ނޫޓްތަކާއި 1000 ގެ ނޫޓްތައް އުވާލުމަށް ނިންމީ މާލީގޮތުން ހިންގާ ޣައިރު ގާނޫނީ މުޢާމަލާތްތައް ހުއްޓުވުމަށާއި ފައިސާ ގަނޑުކޮށް ޖަމާކޮށްފައި ގޭގޭގައާއި ކުންފުނިތަކުގެ ތިޖޫރީތަކުގައި ބެހެއްޓުން ހުއްޓުވުމުގެ ގޮތުންނެވެ. މިކަންކަމުގެ ސަބަބުން އިންޑިއާގެ އިގްތިސާދަށް ބޮޑެތި ގެއްލުންތަކެއްލިބެމުންދާކަމަށް މަރުކަޒީ ބޭންކުން ބުނެއެވެ.
ކުއްލި ގޮތަކަށް އުވާލި 500 ގެ ނޫޓްތަކާއި 1000 ގެ ނޫޓްތައް އެހެން ނޫޓްތަކަށް ބަދަލުކުރުމަށް އިންޑިއާގެ މަރުކަޒީ ބޭންކުން ދީފައިވާ މުއްދަތަކީ އަންނަ ޑިސެމްބަރު މަހުގެ 30 ވަނަ ދުވަހުގެ ނިޔަލަށެވެ. މީގެ އިތުރުން 500 ގެ ނޫޓްތަކާއި 1000 ގެ ނޫޓްތައް ހުރި ފަރާތްތަކުން އެފައިސާތައް ބޭންކު އެކައުންޓްތަކަށް ޖަމާކުރުމުންވެސް އެފައިސާ އެހެން ނޫޓްތަކަށް ބަދަލުކުރެވޭނެ އިންތިޒާމު މަރުކަޒީ ބޭންކުންވަނީ ހަމަޖައްސާފަ އެވެ.
ބޮޑެތި ނޫޓްތައް ކުއްލި ގޮތަކަށް އުވާލުމުން އެނޫޓްތައް ކުދި ނޫޓްތަކަށް ބަދަލުކުރުމަށް އާންމުންނާއި ވިޔަފާރިވެރިންވަނީ އިންޑިޔާގެ ބޭންކްތަކުގެ ކުރިމަތީގައި ބޮޑެތި ކިޔޫތައް ހަދާލާފައެވެ. މިމައްސަލާގައި އާންމުން ކުރިމަތިލާންޖެހޭ ދަތިކަމާމެދު ދެރަވާކަން މޯދީ ވަނީ ފާހަގަ ކުރައްވާފަ އެވެ. ނަމަވެސް 500 ގެ ނޫޓްތަކާއި 1000 ގެ ނޫޓްތައް އުވާލުމުން ގައުމަށް އިގްތިސާދީ ބޮޑެތި ފައިދާތަކެއް ކުރާނެކަމަށް މޯދީ ވިދާޅުވި އެވެ.
އިންޑިއާގެ ބައެއްމީހުން (ޚާއްސަކޮށް ވިޔަފާރިވެރިން) ގޭގެ ތިޖޫރީތަކުގައި ބޮޑެތި އަދަދުތަކުން ފައިސާ ބަހައްޓަނީ ޓެކްސްއަށް ފިލުމުގެ ގޮތުންނާއި އެމީހުންނަށް ލިބޭ އާމްދަނީ އިންޑިޔާގެ މާލީ ނިޒާމަށް ސިއްރު ކުރުމުގެ ގޮތުންނެވެ. (އޭޕީ)