14 Nov 2016, 15:07
ފުރިހަމަ ކުޅިވަރު ކުޅުންތެރިޔަކަށް ނުވަތަ އެތުލީޓަކަށް ވުމަށްޓަކައި އެންމެ މުހިންމު ދައުރެއް އަދާކުރާނީ ކުޅިވަރު ވަސީލަތްތަކެވެ. ރާއްޖޭގައި އެންމެ އެދެވޭ އެންމެ ރަނގަޅު ފެންވަރުގެ ކުޅިވަރު ވަސީލަތްތަކެއް ނެތެވެ. ނަމަވެސް ފެންވަރު ރަނގަޅު ވަސީލަތްތައް ރާއްޖޭގައި ގާއިމްކޮށްދީ، ކުޅިވަރު އާއިލާގެ ހުވަފެން ހަގީގަތަކަށް ވެގެންދާނެ ކަމުގެ ފޮނި އުންމީދު ރައީސުލްޖުމްހޫރިއްޔާ އަބްދުﷲ ޔާމީން އަބްދުﷲ ޔާމީން އަބްދުލްޤައްޔޫމްގެ ސަރުކާރުން މިއަދު ދީފި އެވެ.
ކުޅިވަރުގެ ވަސީލަތްތައް ނެތުމުގެ ސަބަބުން ބޮޑެތި ހަރަދުތަކެއް ކޮށްގެން ރާއްޖޭގެ އެތުލީޓުން ދާންޖެހެނީ އެހެން ގައުމުތަކަށެވެ. ސަބަބަކީ ރާއްޖޭގައި ފެންވަރު ރަނގަޅު ވަސީލަތްތައް ނެތުމެވެ. ބޮޑެތި ހަރަދުތައް ކޮށްގެން އެހެން ގައުމުތަކަށް ދަތުރުނުކޮށް، ކައިރި މުސްތަގުބަލެއްގައި ރާއްޖޭގައި ތަމްރީންތައް ފުރިހަމަކުރެވޭނެ ފެހި ސިގްނަލް ސަރުކާރުން ދީފި އެވެ. އެއީ މިއަދު ސޮއިކުރެވުނު ބިޔަ މަޝްރޫއާއެކު އެވެ. އެ ބިޔަ މަޝްރޫއަކީ ހުޅުމާލޭ ސްޕޯޓްސް ކޮމްޕްލެކްސްގެ މަޝްރޫއެވެ.
މުބާރާތެއް ނުބޭއްވިގެން ހާސްވާކަށް ނުޖެހޭނެ!
މާލޭގެ ސޯޝަލް ސެންޓަރު އެތެރޭ ކޯޓު ވެފައިވަނީ ވަރަށް ބާރުބޮޑު ތަނަކަށެވެ. ގައުމީ ފެންވަރުގައި ބާއްވާ ވޮލީބޯޅަ އަދި ބާސްކެޓްބޯޅައިގެ ހަރަކާތްތައް ބޭއްވޭނެ ފެންވަރުގެ ހަމައެކަނި ތަނަކީ ސޯޝަލް ސެންޓަރު އެތެރޭ ކޯޓެވެ. ވޮލީގެ މުބާރާތެއް ކުރިއަށްދާ ނަމަ، ބާސްކެޓް މުބާރާތެއް ބޭއްވޭނެ ގޮތެއް ނޯވެ އެވެ. ނުވަތަ ބާސްކެޓްގެ މުބާރާތެއް ކުރިއަށްދާނަމަ، ވޮލީ އަށް ޖާގައެއް ނުލިބެ އެވެ.
ގިނަ ދުވަސްތަކެއް ވަންދެން މުބާރާތެއް ނުބޭއްވުމުގެ ނަތީޖާ ފެނިގެންދަނީ ވަރަށް ވެސް ހިތިކޮށެވެ. ބައިނަލްއަގުވާމީ މުބާރާތަކަށް ދާނަމަ، ކުޅުންތެރިންގެ ފެންވަރު އެއް ފަންތިއެއްގައި ނުހިފެހެއްޓޭ އެއް ސަބަބަކީ ވެސް ގިނަ ދުވަސްތަކެއް ވަންދެން ކުޅުމާ ދުރުގައި ހުންނަން ޖެހުމެވެ. ނަމަވެސް ހުޅުމާލޭ ހުޅުމާލޭ ސްޕޯޓްސް ކޮމްޕްލެކްސްގެ ދެވަނަ ފިޔަވަހީގެ މަޝްރޫއާ އެކު އެކަން ފުރިހަމަވެގެންދާނެ އެވެ.
"ސްޕޯޓްސް ކޮމްޕްލެކްސްގައި ފުޓްސަލް، ޓީޓީ، ބާސްކެޓް، ވޮލީ، ބެޑްމިންޓަން، ހޭންޑްބޯލް އަށް ހާއްސަ ކުރެވިގެންދާ ގިނަ ކޯޓުތަކެއް ގާއިމުކުރެވޭނެ. ނޭޝަނަލް ސްޕޯޓްސް ކޮމްޕްލެކްސްގެ ސަބަބުން ޒުވާން އެތުލީޓުންނަށް ކުޅިވަރު އެސޯސިއޭޝަންތަކަށް ދިމާވެފައިވާ ވަސީލަތްތަކުގެ ދަތިކަމަށް ހައްލެއް ލިބިގެންދާނެ،" ހުޅުމާލޭގައި ގާއިމްކުރާ ނޭޝަނަލް ސްޕޯޓްސް ކޮމްޕްލެކްސްގެ ފްރޭމްވޯކް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކުޅިވަރާބެހޭ ވަޒީރު އިރުތިޝާމް އާދަމް ވިދާޅުވި އެވެ.
ހުޅުމާލޭގައި ގާއިމްކުރާ ނޭޝަނަލް ސްޕޯޓްސް ކޮމްޕްލެކްސްގެ ފްރޭމްވޯކް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ކުޅިވަރާބެހޭ ވަޒީރު އިރުތިޝާމް އާދަމް ވާހަކަފުޅު ދައްކަވަނީ --- ސަން ފޮޓޯ/ މުއާވިޔަތު އަންވަރު
އެއް ފުރާޅެއްގެ ދަށުން ކުޅިވަރުގެ އެތަކެއް ވަސީލަތްތަކެއް!
ރައީސް ޔާމީންގެ މެނިފެސްޓޯގައި ޒުވާނުންނާއި ކުޅިވަރަށް ހާއްސަ އަހައްމިޔަތު ކަމެއް ދެއްވާފައިވެ އެވެ. އެގޮތުން ޒުވާނުންނަށް އެކި ކުޅިވަރުތަކުން ކުރިއަށްދިއުމަށް މަގުފަހިކޮށްދިނުމަށް ރައީސް ޔާމީން ވައުދުވެވަޑައިގެންނެވި އެވެ.
ރައީސް ޔާމީންގެ ކުޅިވަރު މެނިފެސްޓޯއާ އެއްގޮތަށް ކުޅިވަރާބެހޭ ވުޒާރާ އިން އެންމެ ފުރަތަމަ ފެށި މަސައްކަތަކީ ސްޕޯޓްސް އެރީނާގެ މަޝްރޫއެވެ. އެ މަޝްރޫއު ވަރަށް ވެސް ކާމިޔާބެވެ. އެ މަޝްރޫއުގެ ދަށުން ކުޑަ ދުވަސްކޮޅެއްގެ ތެރޭގައި ރާއްޖޭގައި މަގްބޫލުކަމެއް ލިބިގެންދިޔަ ފުޓްސަލަށް ހާއްސަ ދަނޑުތަކެއް އެތަކެއް ރަށްތަކެއްގައި ތަރައްގީ ކުރެވިގެންދިޔަ އެވެ. ފުޓްސަލް ދަނޑުތަކުގެ އިތުރުން ބަށި ކޯޓުތައް ވެސް ތަރައްގީ ކުރެވެމުން އެބަދެ އެވެ.
"މި ކޮމްޕްލެކްސްގައި ހިމެނޭ ވަކިވަކި ކޯޓުތަކަކީ ހަ ބެޑްމިންޓަން ކޯޓު، އެއީ ބައިނަލްއަގުވާމީ ފެންވަރު މުބާރާތްތައް ބޭއްވޭނެ ފަދަ ގޮތަކަށް އަށް ކޯޓުގެ ޖާގަ އޮންނަ ވަރަށް މިހާރު ފަރުމާ ކުރުމަށް މިވަނީ ދަންނަވާފައި. އެއް ބާސްކެޓް ކޯޓު، އެއް ނެޓްބޯޅަ ކޯޓު، ދެ ވޮލީ ކޯޓު، އެއް ހޭންޑްބޯލް ކޯޓު، ދެ ފުޓްސަލް ދަނޑު، ދިހަ ޓޭބަލް ޓެނިސް މޭޒު ހިމެނޭ ގޮތަށް، މީގެ އިތުރުން ބާސްކެޓާއި ނެޓްބޯޅަ އަށް މަލްޓިޕާޕަސް ފެސިލިޓީ ކޯޓެއް ހިމެނޭ ގޮތަށް ހަމަޖެހިފައިވޭ. ޖިމްތަކާއި ދިހަ ބިލިއާޑް މޭޒު ވެސް ހިމެނޭ ގޮތަށް ފަރުމާ ކުރެވިގެންދާނީ،" ކުޅިވަރާބެހޭ ވަޒީރު ވިދާޅުވި އެވެ.
ރާއްޖޭގެ އެންމެ ބާރު ދުވުންތެރިޔާ ޙަސަން ސާޢިދުއާ އެކު ރައީސް ޔާމީން ތަމްރީނެއް ފުރިހަމަ ކުރައްވަނީ: ރައީސް ޔާމީންގެ ސަރުކާރުން ދަނީ ކުޅިވަރުގެ ވަސީލަތްތައް ގާއިމްކުރުމަށް މަޝްރޫއުތައްް ހިންގަމުންދާ އިރު، ގިނަ މަޝްރޫއުތަކެއް ވަނީ ފުރިހަމަކޮށްފައި --- ފޮޓޯ/ ރައީސް އޮފީސް
އިރުތިޝާމް ވިދާޅުވީ، ސްޕޯޓްސް ކޮމްޕްލެކްސްގައި ކްލަބުތަކަށާއި ކޯޗުންނަށް ތިއްބެވޭނެ އިންތިޒާމް ވެސް ހަމަޖެހިގެންދާނެ ކަމަށާއި އެ ކޮމްޕްލެކްސް އިން ފައިސާ ހޯދޭނެ ފަދަ ގޮތަކަށް ހޮޓެލް ފެސިލިޓީއެެއް ގާއިމް ކުރެވިގެންދާނެ ކަމަށެވެ. އޭގެ އިތުރުން ސްޕޯޓްސް ކޮމްޕްލެކްސްގައި ފުޑް ކޯޓަކާއި، ޓްރީޓްމަންޓް ރޫމެއް އަދި ސްޕޯޓްސް ކްލިނިކެއް ހިމެނޭ ހެލްތު ސްޕާާ އަކާއި، ތިން ކޮޓަރީގެ ފަސް އެޕާޓްމަންޓް ހިމެނެ އެވެ.
ސްޕޯޓްސް ކޮމްޕްލެކްސް މަޝްރޫއު އަކީ ހަމައެކަނި ސަރުކާރުގެ ހިޔާލެއް ނޫން!
ސްޕޯޓްސް ކޮމްޕެލްކްސްގެ މަޝްރޫއަކީ ބިޔަ މަޝްރޫއެކެވެ. އެފަދަ މަޝްރޫއެއް ކާމިޔާބު މަޝްރޫއަކަށް ހެދުމަށްޓަކައި ތަޖުރިބާކާރުންގެ ހިޔާލު ވަރަށް ވެސް މުހިންމެވެ. ހަމައެކަނި ސަރުކާރުގެ ވެރިންގެ ހިޔާލު ނުހިމަނައި، މުޅި ކުޅިވަރުގެ އާއިލާގެ ހިލާލު ވެސް ސަރުކާރުން ވަނީ ހޯދައިފަ އެވެ.
ކުޅިވަރުގެ އާއިލާ އަށް ލިބޭ އުންމީދަކީ ގައުމީ ފެންވަރެއްގައި އަދި ބައިނަލްއަގުވާމީ ފެންވަރުގައި މުބާރާތްތައް ބޭއްވޭނެ އިންތިޒާމު ހަމަޖެހުން. އަޅުގަނޑުމެންނަށް ލިބޭ މެޑަލްތަކާއި ފަހުރުވެރި ކަމަކީ އަޅުގަނޑުމެން ގަބޫލުކޮށް ބަލައިގަންނަ ކަމެއް. ދިވެހި ސަރުކާރުން މިކަންތައްތައް އެބަ ބަލައިގަނޭ. ކުޅިވަރުގެ ގައުމީ މަޖިލީހުންނާއި އޮލިމްޕިކް ކޮމިޓީ އަދި ކުޅިވަރު ކޮމިއުނިޓީގެ އެކި އިރުޝާދުގެ މައްޗަށް ބިނާކޮށް އެ ރިކުވަޔަމަންޓްތައް ހިމަނައިގެން އެގްރިމަންޓް އެކުލަވާލާފައިވާނީ،" އިރުތިޝާމް ވިދާޅުވި އެވެ.
ސްޕޯޓްސް އެރީނާ ޕްރޮޖެކްޓްގެ ދަށުން ނ. ވެލިދޫގައި ތަރައްގީކުރި ފުޓްސަލް ދަނޑު ރަސްމީކޮށް ހުޅުވުމަށް ބޭއްވި ރަސްމިއްޔާތުގެ ތެރެއިން -- ފޮޓޯ: ޔޫތު މިނިސްޓްރީ
ރައީސް ޔާމީންގެ އިސްނެންގެވުމާއެކު ކުރިއަށްގެންދާ 40 މިލިއަން ޑޮލަރުގެ އެ މަޝްރޫއުގެ އަމަލީ މަސައްކަތް ކުރުމަށް ހަވާލުކޮށްފައި ވަނީ ރާއްޖޭން ބޭރު ކުންފުންޏެއް ކަމަށްވާ އޭޖީޓީ މެނޭޖްމަންޓް، ކޮންސަލްޓިންގް ކޮންސްޓްރަކްޝަން ސާވިސް ލިމިޓެޑަށެވެ. އެ މަސައްކަތް 2018ގެ ކުރިން ނިންމާލެވޭނެ ކަމަށް ސަރުކާރުން ބުނެ އެވެ.
އެ މަސައްކަތް ނިންމުމަށް އެންމެ އިސްކޮށް ހަރަކާތްތެރިވީ އެއް ބޭފުޅަކީ ކުޅިވަރާބެހޭ ވަޒީރު އިރުތިޝާމް އެވެ. ހެލްތު މިނިސްޓްރީއާ ހަވާލުވެ ހުންނެވުމަށްފަހު، ކުޅިވަރާބެހޭ ވުޒާރާއާ ހަވާލުވެލެއްވި އިރުތިޝާމް އަށް ގިނަ ގޮންޖެހުންތަކެއް ކުރިމަތިވި ނަމަވެސް، އެކަމަނާ ހޯއްދަވަމުންދާ ކާމިޔާބީގެ ސިއްރަކީ ކުޅިވަރު އާއިލާއާއެކު އެއް ލަނޑުދަނޑިއެއް ހާސިލް ކުރުމުގެ އަޒުމުގައި ކުރިއަށްދިއުން ކަމުގައި ކުޅިވަރު އެސޯސިއޭޝަންތަކުން ދެކެ އެވެ.