13 Nov 2016, 09:57
ސާބިއާ އަތުން 1-1ގެ ނަތީޖާ އަކުން އެއްވަރުވެ 2018 ވަނަ އަހަރު ބާއްވާ ވޯލްޑްކަޕަށް ދިއުމަށް ވޭލްސް ކުރަމުން އައި އުންމީދު ތަކަށް ބޮޑެތި ހުރަސްތަކެއް ކުރިމަތި ވެއްޖެއެވެ.
ރޭގެ މެޗަށް ފަހު ވޭލްސް އަދިވެސް އޮތީ ހަ ޕޮއިންޓާއި އެކު ގްރޫޕް ޑީގެ ތިން ވަނާގައެވެ. ދެވަނާގައި ސާބިއާ އޮތީ އަށް ޕޮއިންޓާއި އެކުއެވެ. އެއްވަނާގައި އޮތް ރިޕަބްލިކް އޮފް އަޔަލޭންޑްއަށް ލިބެނީ 10 ޕޮއިންޓެވެ.
ވޭލްސްގެ ކާޑިފް ސްޓޭޑިއަމްގައި ރޭ ކުޅުނު މެޗު ފެށިގެން ސާބިއާ އިން ވަނީ ރަނގަޅު ކުޅުމެއް ދައްކާފަ އެވެ. ނަމަވެސް މެޗުގެ 30 ވަނަ މިނެޓްގައި ވޭލްސްއިން އުފެއްދި ފުރަތަމަ ހަމަލާގައި ގެރެތް ބޭލް ވަނީ އެޓީމަށް ލީޑް ނަގައިދީފައެވެ.
ވޭލްސްގެ ގޯލަށް ފަހު ވެސް މެޗުގައި ރަނގަޅަށް ކުޅެ ގިނަ ހަމަލާތެކެއް ވަނީ ސާބިއާ އިން އުފައްދާފައެވެ. ނަމަވެސް ނިއުކާސަލް ޔުނައިޓެޑްގެ ޒުވާން ފޯވާޑް އެލެކްސެންޑާ މިޓްރޮވިޗް ފޮނުވާލި ގިނަ ހަމަލާތަކެއް ވޭލްސްގެ ކީޕަރު ވަނީ މަތަކޮށްފައެވެ.
ވޭލްސްގެ ފަރާތުން ޑިފެންސިވް ކުޅެމެއް ފެނިގެންދިޔަ އެ މެޗުގައި ސާބިއާއަށް ނަތީޖާ އެއްވަރުކޮށްދިނީ މެޗު ނިމެން ފަސް މިނެޓަށް ވެފައިވަނިކޮށް މިޓްރޮވިޗްއެވެ.
ކޮލިފައިންގައި ބާކީ ހަ މެޗު ކުރިއަށްއޮތް އިރު ވޭލްސްއަށް ދެން އޮތީ ވަރުގަދަ އިމްތިހާނެކެވެ. މިމަހު 25 ވަނަ ދުވަހު ރަށުން ބޭރުގައި ވޭލްސް ނުކުންނާނީ އަޔަލޭންޑްއާ ދެކޮޅަށެވެ.