13 Nov 2016, 08:46
ސިޔާސީ މަޝްރަހުގައި ޕީޕީއެމުން ނަމޫނާ ދައްކައިދީފައިވާ ކަމަށް އެ ޕާޓީގެ މުސްތަޝާރު އަދި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެ އެވެ.
ރޭ ރ. ދުވާފަރުގައި ބޭއްވި ޕީޕީއެމްގެ އާއްމު ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ޕީޕީއެމް ސިޔާސީ ހަރަކާތްތަކުގެ ވައްޓަފާޅިއަށް ބަދަލުތަކެއް ގެނެސްދީފައިވާ ކަމަށާއި، ސިޔާސީ މަސައްކަތްކުރާނެ ގޮތް ރައްޔިތުންނަށް އަންގައިދީފައިވާ ކަމަށެވެ.
އެމަނިކުފާނު ވިދާޅުވީ ސިޔާސީ މަސައްކަތް ކުރުމަކީ ހަމައެކަނި މުލައްދަނޑީގެ ބާރުން ކުރާ ކަމެއް ނޫން ކަން ރައްޔިތުންނަށް އަންގައިދީ، ސިޔާސީ ހަރަކާތްތަކުގެ ތެރޭގައި ކުރެވޭ މަސައްކަތްތަކުން އެންމެ ބޮޑެތި ކަންތައްތައް ވެސް ހާސިލް ވާކަން ޕީޕީއެމުން ސާބިތު ކޮށްދީފައިވާ ކަމަށެވެ.
"އަޅުގަނޑުމެން ކުރި މަސައްކަތަކީ ހައްގުގެ މަގުން އެއްކިބާވެ އަދި މުޅި ދިވެހި ރައްޔިތުންނަށް ނާމާން ކަމާއި އަދިރިކަން ގެންނެވެމުން ދާތީ އަޅުގަނޑުމެން ނުކުތީ އޭރު ޖިހާދަކަށް ކުރިމަތިލާން. އަޅުގަނޑުމެން ސިޔާސީ ހަރަކާތްތަކުގެ ތެރޭގައި ދައްކައިދިނީމު ހަމަޖެހުމާ އެކީ މުޒާހަރާކުރުމާއި މިކަންކަމުގެ ނަތީޖާއަކަށް ވެގެންދިޔައީ ބާރުގަދަ އަދި ވަރަށް ޖައްބާރު ވެރިކަމެއް ނިމުމަކަށް އައީ،" ރައީސް ވިދާޅުވި އެވެ.
ރައީސް ޔާމީން ވިދާޅުވީ އަބަދު ގަދަބަސް ބުނެ ގަދަ ބާރާ އެކު މަސައްކަތް ކުރުމަކީ ރައްޔިތުން ރުހޭނެ ކަމެއް ނޫން ކަމަށާއި، ޕީޕީއެމުން ސިޔާސީ މަޝްރަހުގައި ކުރި މަސައްކަތްތަކުގައި ނަމޫނާ ދައްކާދީފައިވާ ކަމަށެވެ.
ރައްޔިތުން ޕީޕީއެމް އަށް 2013ގައި ފުރުސަތު ދިނީ ޕީޕީއެމްގެ ސަރުކާރުން ކޮށްދޭނެ ކަމަށް ހުށަހަޅަމުން ދިޔަ ކަންތައްތަކުގެ ސަބަބުން އަޖުމަ ބަލައިލުމުގެ ގޮތުން ކަމަށް އެ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވި އެވެ. އޭރު ވެސް ސިޔާސީ ގޮތުން ފުންނާބު އުސްް އެތަކެއް ބޭފުޅުންނެއް ޕީޕީއެމްގެ މެނިފެސްޓޯގައި ހުރި ކަންތައްތައް ހާސިލް ނުވާނެ ކަމަށް ބުނަމުން ގެންދިޔަ ކަމަށް ރައީސް ވިދާޅުވި އެވެ.
"އަޖުމަ ބަލައިލުމުގެ ގޮތުން ރައްޔިތުން އެ ފުރުސަތު އަޅުގަނޑުމެންނަށް ދެއްވަން އެއްބަސްވެ ވަޑައިގަތީ. އަޅުގަނޑުމެންގެ ޕާޓީ އުފެދިގެން ތިން އަހަރުވާން އުޅެނިކޮށް ނުވަތަ ތިން އަހަރު ވީތަނާ ކަހަލަ ގޮތަކަށް ނޫނީ ދެ އަހަރު ޕްލަސް ވީތަނާ އިރާދަކުރެއްވިއްޔާ ޕީޕީއެމް އިން ދާން ބޭނުންވި ކުރި ބޯއްޓާ ހަމައަށް ވާސިލް ވެގެން މިދިޔައީ،" ރައީސް ޔާމީން ވިދާޅުވި އެވެ.
ރައީސް ޔާމީން ވަނީ ޕީޕީއެމްގެ ސަރުކާރުން ގެންނަމުން ދާ ތަރައްގީއާއި މަޝްރޫއުތަކަށް އަލި އަޅުއްވާލައްވައި އެ ޖަލްސާގައި ވާހަކަފުޅު ދައްކަވައިފަ އެވެ.