07 Nov 2016, 14:16
ޗައިނާ ސަރުކާރުން ރާއްޖޭގެ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް އަލްޓުރާ ސައުންޑް ސްކޭނަރެއް ހަދިޔާ ކޮށްފިއެވެ.
ޗައިނާ ސަރުކާރުން ހަދިޔާކުރި، ގާތްގަނޑަކަށް މިލިއަން ރުފިޔާގެ އަގުހުރި އެ ސްކޭން މެޝިނަކީ މާބަނޑު މީހުންގެ ކުރާ ސްކޭންތައް ކުލަކޮށް ދައްކައިދޭ، ޑިޖިޓަލް ކަލާރ ޑޮޕްލާ ސްކޭނަރެކެވެ.
އައިޖީއެމްއެޗަށް އެ ސްކޭން މެޝިން ހަދިޔާކުރުމުގެ ގޮތުން މިއަދު ވަނީ ރާއްޖޭގައި ހުންނަ ޗައިނާ އެމްބަސީއާ އެ ހޮސްޕިޓަލާ ދެމެދު އެއްބަސްވުމެއްގައި ސޮއިކޮށްފައެވެ.
އައިޖީއެމްއެޗްގެ އޯކިޑް މާލަމުގައި ބޭއްވި ރަސްމިއްޔާތެއްގައި އެ އެއްބަސްވުމުގައި އައިޖީއެމްއެޗްގެ ފަރާތުން ސޮއިކުރެއްވީ، އެ ހޮސްޕިޓަލުގެ މެޑިކަލް ޑިރެކްޓަރު ޑރ. އަލީ ނަޒީން އެވެ. ޗައިނާ އެމްބަސީގެ ފަރާތުން ސޮއިކުރެއްވީ އެމްބެސެޑަރު ވަންގް ފުކާންގް އެވެ.
ޗައިނާ ސަރުކާރުން އައިޖީއެމްއެޗަށް މިއަދު ހަދިޔާކުރި ވައްތަރުގެ ތިން ސްކޭން މެޝިން މިހާރު ވެސް އައިޖީއެމްއެޗްގައި ބޭނުންކުރަމުންދެއެވެ. އަދި ނޯމަލް އަލްޓްރާ ސައުންޑް ސްކޭނަރަކާއެކު ޖުމްލަ ހަތަރު ސްކޭން މެޝިން އެ ހޮސްޕިޓަލުގައި ބޭނުންކުރަމުންދާ ކަމަށް އައިޖީއެމްއެޗުން ބުނެއެވެ.