06 Nov 2016, 12:29
ދެކުނު ކޮރެއާގެ ރައީސާ، ޕާކް ގެއުން ހާއިގެ އެންމެ އަރިސް ދެ ބޭފުޅުން ކަމުގައިވާ އެމަނިކުފާނުގެ ސީނިއާ ސެކެއްޓަރީއާއި ޕްރައިވެޓް ސެކެއްޓަރީ ހައްޔަރުކުރުމުގެ އަމުރެއް ނެރެފި އެވެ.
ސީނިއާ ޕޮލިސީ ސެކެއްޓަރީ، އަން ޖޯނގް ބިއޯމް އާއި ޕްރައިވެޓް ސެކެއްޓަރީ ޖުންގް ހޯ ސުންގް ހައްޔަރު ކުރުމަށް އަމުރެއް ނެރެފައި މިވަނީ، ރައީސް ޕާކް މަގާމުގެ ނުފޫޒު ބޭނުންކޮށްގެން ކޮރަޕްޝަންގެ އަމަލުތައް ހިންގާފައިވާ ކަމަށާއި އެކަމަނާގެ އަންހެން ރަހްމަތްތެރިއަކު އެރަހްމަތްތެރިކަމުގެ ނާޖާއިޒު ފައިދާ ނަގައިގެން ދެކުނު ކޮރެޔާގެ ސަރުކާރުގެ ހުރިހާ ކަމެއްގެ ތެރެއަށް ވަދެ ނުފޫޒު ހިންގަމުންގެންދާ ކަމަށް ކުރެވިފައިވާ ތުހުމަތުތަކާ ގުޅިގެންނެވެ. އެގައުމުން ވަނީ މިހާރު އެ މައްސަލަ ތަހުގީގުކުރަން ފަށައިފަ އެވެ. މި ދެ ބޭފުޅުން ހައްޔަރު ކުރުމަށް އަމުރު ނެރުނީ މި މައްސަލައިގެ ތަހުގީގަށް ކަމަށްވެ އެވެ.
އެކަމަނާ ވަނީ މި މައްސަލާގައި މައާފަށް އެދިވަޑައިގެން މައްސަލައަށް އެއްބަސްވެވަޑައިގެންފަ އެވެ. އެކަމަނާ ވިދާޅުވީ ސަރުކާރުގެ ކަންކަމުގެ ތެރެއަށް ވަނުމަށް އެކަމަނާގެ ރަހުމަތްތެރިޔާ، ޗޮއި ސޫން ސިލް އަށް ފުރުސަތު ދިނުމަކީ ކުށެއް ކަމަށާއި އެކަމަށް މައާފަށް އެދިވަޑައިގަންނަވާ ކަމަށެވެ.
ޮޗޮއި ސޫންސިލް މިހާރު ވަނީ އެގައުމުގެ ފުލުހުންގެ ބެލުމުގެ ދަށުގައި ބަންދުކޮށްފަ އެވެ. އޭނާ މައްޗަށް ކުރެވޭ ތުހުމަތްތަކުގެ ތެރޭގައި، ރައީސާ ޕާކްގެ ރަހުމަތްތެރިކަމުގެ ނާޖާއިޒް ބޭނުން ހިފައިގެން އޭނާ ވަނީ އޭނާގެ ބާރުގެ ދަށުގައިވާ ނޮން ޕްރޮފިޓް ފަންޑަކަށް ޑޮނޭޝަންތަކެއްގެ ފައިސާ ޖަމާކޮށްފައިވާ މައްސަލަ ވެސް ހިމެނެ އެވެ.
ސޫންސިލްގެ ފަތްފުތް ހާމަ ކުރީ އެގައުމުގެ ޓީވީ ޗެނަލަކުންނެވެ. ގައުމުގެ ރައްޔިތުންނަށް، ގައުމުގެ ކަންކަން ދާގޮތް ހާމަވެގެންދިޔަ އެ ސްކޭންޑަލްގެ ސަބަބުން ގިނަ ބައެއްގެ ތާއީދު ވަނީ ރައީސާ ޕާކްއަށް ގެއްލިފަ އެވެ. ބެލެވޭ ގޮތުގައި އެކަމަނާ އަށް ތާއިދު ކުރާ މީހުންގެ އަދަދަކީ މިހާރު އެގައުމުގެ އާބާދީގެ ފަސް ޕަސެންޓެވެ.
ބާރުގެ ނުފޫޒުކޮށްގެން ކަންކަން ކުރައްވާ ކަމަށް ބުނެ ލައްކައެއްހާ މީހުން ދަނީ އަދިވެސް އެގައުމުގެ ވެރި ރަށް ސިއޯލް ގައި މުޒާހަރާކޮށް، އެކަމަނާގެ އިސްތިއުފާއަށް ގޮވާލަމުންނެވެ.
ޕާކް މައާފަށް އެދިވަޑައިގެންނެވި ނަމަވެސް އެގައުމުގެ އިދިކޮޅު އެންމެ ބޮޑު ޕާޓީއިން ބުނެފައި ވަނީ، އެކަމަނާ މައާފަށް އެދިވަޑައިގަތް އިރު އެކަމަނާގެ މޫނުމަތިން އިޚްލާސްތެރިކަމެއް ނުފެންނަ ކަމަށެވެ. އަދި ދައުލަތް ހިންގުން ދޫކުރައްވައި، ފަހަތަށް ޖެހިވަޑައިގަތުމަށް ވެސް އެ ޕާޓީން ވަނީ ގޮވާލާފަ އެވެ.
ެރައީސާ ޕާކް އަކީ އެގައުމުގެ ވެރިކަމަށް ވަޑައިގަތް އެންމެ ފުރަތަމަ އަންހެން ކަނބަލެވެ. އެކަމަނާ ވެރިކަމަށް ވަޑައިގަތީ 2012 ވަނަ އަހަރު ބޭއްވި ރިޔާސީ އިންތިހާބު ކާމިޔާބު ކުރައްވައިގެންނެވެ.