05 Nov 2016, 10:07
ނިއު ދިއްލީ (ނޮވެމްބަރު 5): އިންޑިއާ އަސްކަރިއްޔާގެ އެއާ ފޯސް ބޭސްއަކަށް ބަޔަކު ދިން ހަމަލާއެއް އެންޑީޓީވީން ކަވަރު ކުރި ގޮތާ ގުޅިގެން އަންނަ ބުދަ ދުވަހު އެ ޗެނަލް ދެއްކުން މަނާ ކޮށްފި އެވެ.
އިންޑިއާގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިން (އެމްއައިބީ)ން ބުނި ގޮތުގައި މިމަހުގެ ނުވަ ވަނަ ދުވަހު އެންޑީޓީވީ ދެއްކުން 24 ގަޑިއިރަށް މަނާކޮށްފައި ވަނީ ޕަތަންކޮޓުގައި ހުންނަ އެއާފޯސް ބޭސް އަކަށް މި އަހަރުގެ ޖެނުއަރީ މަހު ދިން ހަމަލާ ކަވަރު ކުރުމުގެ ތެރޭގައި "އަސްކަރިއްޔާގެ ރޭވުންތަކާ ބެހޭ މުހިއްމު ތަފްސީލުތަކެއް" އެޗެނަލުން ހާމަ ކުރުމާ ގުޅިގެންނެވެ.
އެގޮތުން ހަމަލާ ކުރިއަށް ދިޔަ ވަގުތު އެންޑީޓީވީން ވަނީ އަސްކަރިއްޔާގެ ބޭސްގައި ހަތިޔާރު ހުރި ގުދަނަކާ ބެހޭ ގޮތުންނާއި އަސްކަރިއްޔާގެ ބޯޓުތައްް އެވަގުތު ތިބި ހިސާބު ބުނެފައި ކަމަށް އެމްއައިބީން ބުންޏެވެ.
ނަމަވެސް އެންޑީވީން ވަނީ އިންޑިއާގެ އެހެން ޗެނަލްތަކުން ވެސް އެހަމަލާ ކަވަރު ކޮށްފައި ވަނީ އެފަދައިން ކަމަށާއި އެޗަނަލަށް ވަކިން އަދަބު ދޭތީ ހިތާމަ ކުރާ ކަމަށް ބުނެފަ އެވެ. އަދި އެޗެނަލުން މައުލޫމާތު ގެނެސްދީފައި ވަނީ ވަކި ފަރާތަކަށް ނުޖެހި ކަމަށް ބުނެފަ އެވެ.
އިންޑިއާގެ ހަތް ސިފައިންނާއި ހަ ހަނގުރާމަވެރިން މަރުވި އެހަމަލާގެ ފަހަތުގައި ވަނީ ޕާކިސްތާނުގެ ޖަމާއަތެއް ކަމަށްވާ ޖައިޝް އީ މުހައްމަދު ކަމަށް އިންޑިއާ އިން ބުނެ އެވެ.
އިންޑީއާގެ ސޯޝަލް މީޑިއާ ބޭނުން ކުރާ ބައެއް ފަރާތްތަކުގެ އިތުރުން އެގައުމުގެ ނޫސްތަކުގެ އިސް އެޑިޓަރުން ހިމެނޭ އެޑިޓާސް ގިލްޑް އޮފް އިންޑިއާ އިން ވަނީ އެމްއައިބީގެ ނިންމުން ކުށްވެރިކޮށްފަ އެވެ. އަދި އެއަމުރު އަނބުރާ ގެންދިޔުމަށް ގޮވާލާފަ އެވެ. (ބީބީސީ)