04 Nov 2016, 00:55
އެސްޓީއޯ މިނިވަން ޗެމްޕިއަންޝިޕް ފުޓްބޯޅަ މުބާރާތުގެ ފައިނަލް ބުރުގެ ގްރޫޕް އެކެއްގެ ތިންވަނަ ގއ. ދެއްވަދޫ ހޯދި އިރު، ގްރޫޕް ދޭއްގެ ތިން ވަނަ ލަންދޫ ހޯދައިފި އެވެ.
ގްރޫޕް އެކެއްގެ ތިންވަނަ ދެއްވަދޫ ހޯދާފައި ވަނީ މިއަދު ހަވީރު ދ. ކުޑަހުވަދޫ ދަނޑުގައި ކުޅުނު މެޗުގައި އދ. މަހިބަދޫ ބަލިކުރުމަށްފަހު އެވެ. އެ މެޗު 3-2 ލަނޑުން ދެއްވަދޫ މޮޅުވި ނަމަވެސް، ގްރޫޕްގެ ގަދަ ދެ ޓީމުގެ ތެރޭގައި ހިމެނިފައި ނުވުމުން އެ ޓީމަށް ސެމީ ފައިނަލުގެ ޖާގައެއް ނުލިބޭނެ އެވެ. މެޗުން ބަލިވި މަހިބަދޫ ނިންމާލީ ޕޮއިންޓެއް ނުލިބި ގްރޫޕްގެ ފުލުގައި އޮވެ އެވެ.
އެ މެޗުގައި ދެ ޓީމުން ވެސް ޖެހި ލަނޑުތައް ފެނިގެންދިޔައީ ފުރަތަމަ ހާފުގެ ތެރޭގައެވެ. މެޗުގެ 15 ވަނަ މިނެޓުގައި މަހިބަދު އަށް މުހައްމަދު ނާއިމް ލީޑު ހޯދައިދިން ނަމަވެސް، ދެއްވަދޫން ވަނީ ފަހަތުން އަރައި ތިން ލަނޑު ކާމިޔާބުކޮށްފަ އެވެ.
މިނިވަން ޗެމްޕިއަންޝިޕްގެ ފައިނަލް ބުރުގެ ގްރޫޕް އެކެއްގައި ދެއްވަދު އާއި މަހިބަދޫ ބައްދަލުކުރި މެޗުގެ ތެރެއިން: އެ މެޗުން ދެއްވަދޫ މޮޅުވެފައި ވަނީ 3-2 ލަނޑުން --- ފޮޓޯ/ އެފްއޭއެމް
މެޗުގެ 24 ވަނަ މިނެޓުގައި ދެއްވަދު އަށް އަލީ އަހުސަން ނަތީޖާ ހަމަހަމަކޮށްދިން އިރު، މެޗުގެ 29 ވަނަ މިނެޓުގައި ސަމޫހު ހަސަން އެ ޓީމަށް ލީޑު ހޯދައިދިނެވެ. ދެއްވަދޫގެ ތިން ވަނަ ލަނޑު މެޗުގެ 38 ވަނަ މިނެޓުގައި އަހްމަދު ވަދީއު ކާމިޔާބުކޮށްދިން އިރު، މަހިބަދޫގެ ދެ ވަނަ ލަނޑު ފުރަތަމަ ހާފުގެ ފަހު މިނެޓުގައި ކާމިޔާބުކޮށްދިނީ އިސްމާއިލް ނަޒީރެވެ.
މިއަދު ހަވީރު ތ. ތިމަރަފުށީ ދަނޑުގައި ކުޅުނު ގްރޫޕް ދޭއްގެ މެޗުގައި ހދ. ހަނިމާދޫ އަތުން 4-2 ލަނޑުން މޮޅުވެ، ލަންދޫ ވަނީ ގްރޫޕްގެ ތިންވަނަ ހޯދައިފަ އެވެ. އެ މެޗުން ލަންދޫ މޮޅުވެފައިވީ ނަމަވެސް، ގްރޫޕްގެ ގަދަ ދެ ޓީމުގެ ތެރޭގައި ހިމެނިފައި ނުވުމުން އެ ޓީމަށް ސެމީގެ ޖާގައެއް ނުލިބޭނެ އެވެ. މެޗުން ބަލިވި ހަނިމާދޫ ނިންމާލީ ޕޮއިންޓެއް ނުލިބި ގްރޫޕްގެ ފުލުގައި އޮވެ އެވެ.
މެޗުގެ ފުރަތަމަ ލަނޑު ޖަހައި ލީޑު ހޯދާފައި ވަނީ ލަންދޫންނެވެ. މެޗުގެ ދެވަނަ މިނެޓުގައި ލަންދު އަށް އެ ލަނޑު ކާމިޔާބުކޮށްދިނީ އިބްރާހިމް ސިޔާހު އެވެ. މެޗުގެ 16 ވަނަ މިނެޓުގައި ހަނިމާދު އަށް އާސިމް ސަލީމް ނަތީޖާ ހަމަހަމަކޮށްދިން އިރު، މެޗުގެ 19 ވަނަ މިނެޓުގައި އެ ޓީމަށް ލީޑު ހޯދައިދިނީ އަހްމަދު ހަލީލް އެވެ.
މިނިވަން ޗެމްޕިއަންޝިޕްގެ ފައިނަލް ބުރުގެ ގްރޫޕް ދޭއްގައި ލަންދު އާއި ހަނިމާދޫ ބައްދަލުކުރި މެޗުގެ ތެރެއިން: އެ މެޗުން ލަންދޫ މޮޅުވެފައި ވަނީ 4-2 ލަނޑުން --- ފޮޓޯ/ އެފްއޭއެމް
މެޗުގެ ފުރަތަމަ ހާފު ނިމުމުގެ ކުރިން ލަންދޫން ވަނީ ދެ ލަނޑު ކާމިޔާބުކޮށް، އަލުން ލީޑު ހޯދައިފަ އެވެ. މެޗުގެ 27 ވަނަ މިނެޓުގައި ލަންދު އަށް އިބްރާހިމް ޝިޔާމް ނަތީޖާ ހަމަހަމަކޮށްދިން އިރު، މެޗުގެ 32 ވަނަ މިނެޓުގައި އެ ޓީމަށް ލީޑު ހޯދައިދިނީ އިބްރާހިމް ސައީދެވެ. މެޗު ނިމެން ތިން މިނެޓަށް ވެފައިވަނިކޮށް ލަންދޫގެ ހަތަރު ވަނަ ލަނޑު ކާމިޔާބުކޮށްދިނީ މުހައްމަދު ސަމާހު އެވެ.
އެ މުބާރާތުގެ ސެމީ އަށް ދަތުރުކުރި ޓީމުތައް މިހާރު ވަނީ ކަށަވަރުވެފަ އެވެ. ގްރޫޕް އެކެއްގެ ސެމީގެ ޖާގަތައް ކުޑަހުވަދު އާއި އެންމެ ފަހުގެ ޗެމްޕިއަން ފޭދޫ ހޯދާފައިވާ އިރު، ގްރޫޕް ދޭއްގެ ސެމީގެ ޖާގަތައް ހޯދާފައި ވަނީ ތިމަރަފުށްޓާއި އޭދަފުށްޓެވެ.
ދެ ގްރޫޕްގެ އެއްވަނަ އަދި ދެވަނަ ހޯދި ޓީމުތައް ކަށަވަރުވާނީ މާދަމާ ކުޅޭ މެޗުތަކަށްފަހު އެވެ. ގްރޫޕް އެކެއްގެ ފަހު މެޗުގައި ކުޑަހުވަދު އާއި ފޭދޫ ބައްދަލުކުރާ އިރު، ގްރޫޕް ދޭއްގެ ފަހު މެޗުގައި ބައްދަލުކުރާނީ ތިމަރަފުށްޓާއި އޭދަފުށްޓެވެ.