02 Nov 2016, 17:56
ޔޫރަޕްގެ މާކެޓަށް ޚާއްސަކޮށްގެން "އެޓޯލް"ގެ ނަމުގައި ދަޅުމަސް އުފައްދައި ނެރުމަށް މިފްކޯއިން ތައްޔާރުވެއްޖެެ އެވެ.
މިފްކޯގެ މެނޭޖިން ޑިރެކްޓަރު އަދްލީ އިސްމާއީލް މިއަދު "ސަން" އަށް ވިދާޅުވީ، އެކްސްޕޯޓުގެ ބޭނުމަށް އެކުންފުނިން މީގެ ކުރިން ދަޅުމަސް އުފައްދައި ބަންދު ކުރަމުން އައީ ރާއްޖޭން ބޭރުގެ ބްރޭންޑޫތަކަށް ކަމަށެވެ. ނަމަވެސް ދިވެހި ބްރޭންޑެއް އުފައްދައި އެކްސްޕޯޓު ކުރަން ފެށުމަކީ ރާއްޖެއަށް މުހިއްމު ކަމެއް ކަމަށްވެސް އޭނާ ވިދާޅުވިއެވެ.
އަދްލީ ވިދާޅުވީ އެޓޯލް ދަޅުމަސް އުފައްދައި ނެރެން ނިންމާފައިވަނީ މި މަގްސަދުގައި ކަމަށެވެ.
"އިނގިރޭސި ވިލާތާއި ޔޫރަޕުގައި ރާއްޖޭގައި ބަންދުކުރާ ދަޅުމަހަށް ވަރަށް ތަރުހީބު ލިބޭ. އެހެންވެ އަޅުގަނޑުމެން އެޓޯލްގެ ނަމުގައި ބްރޭންޑެއް އުފައްދައި އެ ސަރަހައްދަށް ނެރެން މި ނިންމީ،" އަދްލީ ވިދާޅުވިއެވެ.
އޭނާ ވިދާޅުވީ، މިހާރު ކުރެވެމުންދަނީ އެޓޯލް މަސްދަޅު އިނގިރޭސިވިލާތަށް ނެރުމުގެ އެންމެ ފަހުގެ މަސައްކަތްތައް ކަމަށެވެ.
"މިހާރު އަޅުގަނޑުމެން ވާނީ ހުރިހާ ކަމެއް ކޮށް ނިންމާފައި، އެގޮތުން ލޭބަލްގެ އެޕްރޫވަލް ވެސް ހޯދާފަ މިވަނީ،" އަދްލީ ވިދާޅުވިއެވެ.
"އެޓޯލް"ގެ ނަމުގައި ޔޫރަޕަށް މަސްދަޅު ބޭރުކުރަން މިފްކޯއިން ނިންމާފައިވާއިރު އެކުންފުނިން ރާއްޖޭގައި މަސްދަޅު ވިއްކަނީ "މަސްމީރު" ބްރޭންޑުގައެވެ.