01 Nov 2016, 10:58
ޔޫއެފާ ޗެމްޕިއަންސް ލީގުގައި ކުރިއަށް ދިއުމަށް ބާސެލޯނާއާ ދެކޮޅަށް ކުޅޭ މެޗުން މޮޅުވުން މަޖުބޫރު ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޗެމްޕިއަންސް ލީގުގައި އެންމެ ފަހުން ބާސާއާ ދެކޮޅަށް ރަށުން ބޭރުގައި ސިޓީ ކުޅުނު މެޗުން ވަނީ ބަލިވެފަ އެވެ. ނިމިގެންދިޔަ މަހުގެ 19 ވަނަ ދުވަހު ކުޅުނު އެ މެޗުން ސިޓީ ބަލިވެފައި ވަނީ 4-0 ލަނޑުންނެވެ.
ބާސާގެ ކުރީގެ ކޯޗު އަދި މިހާރު ސިޓީ އަށް އިރުޝާދުދެމުންދާ ގާޑިއޯލާ ވަނީ މިރޭ ކުޅޭ މެޗުގައި ޓީމުގެ ކުޅުންތެރިންގެ އެންމެ ރަނގަޅު ކުޅުން ދެއްކުމަށް އެދިފަ އެވެ.
"ބާސާ ބަލިކުރަން ހަދަން ޖެހޭނެ ގޮތް އަހަރެމެންނަށް އެނގޭ. އެމީހުންނަށް އަހަރެމެންނަށް އެނގެނު ކަމަށްވިޔަސް، އަހަރެމެންގެ ފޯވަޑް ލައިނުގެ ފެންވަރާއެކު ތަފާތު ގެނެވިދާނެ. އަހަރެމެން މެޗަށް ނުކުންނަން ޖެހޭނީ ފައިނަލެއް ގޮތުގައި ދެކިގެން. މިހާރު ގްރޫޕް ސްޓޭޖްގައި ބާކީ އޮތީ ތިން މެޗު. ސެލްޓިކް އަތުން ވެސް އަހަރެމެންނަށް ދެ ޕޮއިންޓް ގެއްލުނު. އެހެންކަމުން އަހަރެމެން ކުރިއަށް ދިއުމަށް ބާސާ މެޗުން މޮޅުވުން މަޖުބޫރު،" އޭނާ ބުންޏެވެ.
ގާޑިއޯލާ ބުނީ، އެއްވެސް އިރެއްގައި ބާސާ އަތުން މޮޅުނުވެވިދާނެ ކަމަށް ގަބޫލުނުކުރާ ކަަމަށާއި މޮޅު ނުވެވިދާނެ ކަމަށް ބަލައިގެން އެއްވެސް މެޗަކަށް ނުކުމެފައި ނުވާނެ ކަމަށެވެ. އަދި ބާސާ އަތުން މޮޅުވެ، ސެލްޓިކް އާއި ބޮރޫޝިއާ މޮންޗެންގްލެބާކްއާ ދެކޮޅަށް ކުޅޭ މެޗަށް ވިސްނަން ޖެހޭ ކަމަށް ވެސް އޭނާ ބުންޏެވެ.
ޗެމްޕިއަންސް ލީގުގެ ގްރޫޕް ސްޓޭޖްގައި ބާސާއާ ދެކޮޅަށް އަމިއްލަ ދަނޑުގައި ސިޓީ ނުކުންނާނީ ރާއްޖޭގަޑިން މިރޭ 12:45 ގައެވެ.