30 Oct 2016, 20:01
ސަރުކާރުގެ މައި ވިޔަފާރި ކުންފުންޏަށް މިއަހަރުގެ ތިންވަނަ ކުއާޓަރުގައި ލިބުނު ފައިދާ ދަށަށް ހިނގައްޖެއެވެ.
އެސްޓީއޯއިން މިއަދު އާންމުކޮށްފައިވާ އެކުންފުނީގެ ތިންވަނަ ކުއާޓަރުގެ މާލީ ހިސާބުތައް ދައްކާ ގޮތުގައި، ތިންވަނަ ކުއާޓަރުގައި އެކުންފުންޏަށް 56.4 މިލިޔަން ރުފިޔާގެ ފައިދާއެއް ވަނީ ލިބިފައެވެ.
އެހެން ނަމަވެސް މިއީ މިއަހަރުގެ ދެވަނަ ކުއާޓަރުގައި ލިބުނު 79.9 މިލިޔަން ރުފިޔާގެ ފައިދާއާ އަޅައިބަލާއިރު ގާތްގަނޑަކަށް 30 ޕަސަންޓުގެ ވެއްޓުމެކެވެ. މިއަހަރުގެ ފުރަތަމަ ކުއާޓަރުގައި އެސްޓީއޯއަށް 112 މިލިޔަން ރުފިޔާގެ ފައިދާ ކޮށްފައިވެއެވެ.
މިއަހަރުގެ ތިންވަނަ ކުއާޓަރު ނިމުމާ ހަމައަށް އެސްޓީއޯއަށް 248 މިލިޔަން ރުފިޔާގެ ފައިދާ ކޮށްފައިވެއެވެ. ނަމަވެސް މިދިޔަ އަހަރުގެ ފުރަތަމަ ތިން ކުއާޓަރުގައި އެސްޓީއޯއަށް ކުރި ފައިދާގެ އަދަދަކީ 418.3 މިލިޔަން ރުފިޔާއެވެ.
ނިމިދިޔަ ކުއާޓަރުގައި އެސްޓީއޯއިން ވަނީ، އެކުންފުނީގެ 99.9 ޕަސަންޓު ހިއްސާއާއި އެކުންފުނީގެ ސަބްސިޑަރީ، އެލައިޑް އިންޝުއަރެންސްގެ 0.1 ޕަސަންޓު ހިއްސާވާ ގޮތަށް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އެސްޓީއޯގެ ދަށަށް ގެނެސްފައެވެ. މިގޮތަށް ކަން ކުރީ މިފްކޯއަށް ދިމާވެފައިވާ ދަރަނީގެ މައްސަލަ ހައްލު ކުރުމަށްޓަކައި ސަރުކާރުގެ ވަޒީރުންގެ މަޖިލީހުން ނިންމި ނިންމުމެއްގެ ދަށުންނެވެ.
މީގެ އިތުރުން، ސަރުކާރުން ވަނީ، ރައްޔިތުންނަށް ކާޑުގެ ބާވަތްތައް ވިއްކުމަށް އެސްޓީއޯއަށް ދެމުން އައި ސަބްސިޑީ ކަނޑާލައިފައެވެ. އެއާ ގުޅިގެން އެސްޓީއޯއިން ވަނީ އެކުންފުނިން ވިއްކާ ހަނޑޫ، ހަކުރު އަދި ފުށުގެ އަގުން ގާތްގަނޑަކަށް 100 ޕަސަންޓަށް އަގު ބޮޑުކޮށްފައެވެ. މީގެ ބަދަލުގައި ސަރުކާރުން ނިންމާފައިވަނީ ސަބްސިޑީ ކަނޑާލި ނަމަވެސް، ފަގީރުންނަށް ކޮންމެ މަހަކު ސަބްސިޑީ ފައިސާ ގަނޑުކޮށް ދިނުމަށެވެ.
މީގެ އިތުރުންވެސް އެސްޓީއޯއިން ވަނީ އެކުންފުނިން ހިންގާ އެކިއެކި ޕްރޮމޯޝަންތައް ފަދަ ކަންކަން މިދިޔަ ކުއާޓަރުގައި ވެސް ކުރިޔަށް ގެންގޮސްފައެވެ.